Farmonga asosan:

1) 1994 yilning 1 iyulidan boshlab O‘zbekiston Respublikasining hududida 1000 so‘m-kuponga bir “So‘m” nisbati bilan O‘zbekiston Respublikasining milliy valyutasi — “So‘m” muomalaga kiritildi;

2) O‘zbekiston Respublikasining milliy valyutasi “So‘m” O‘zbekiston Respublikasi Markaziy bankining qiymati 1, 3, 5, 10, 25, 50, 100 “So‘m” bo‘lgan bank qog‘oz pullari /banknotlar/ va 1, 3, 5, 10, 20, 50 “Tiyin” bo‘lgan metall tangalar holida naqd pul muomalasiga chiqarilishi belgilandi;

3) 1994 yilning 1 iyulidan boshlab O‘zbekiston Respublikasi hududida “So‘m” qonuniy to‘lov vositasi hisoblandi;

“So‘mlar” va “Tiyinlar” O‘zbekiston Respublikasi hududida mulkchilik shakllaridan qatʼi nazar, hamma jismoniy va yuridik shaxslar tomonidan barcha turdagi to‘lovlarga, shuningdek banklar tomonidan omonatlarga va hisobvaraqlariga qo‘shib qo‘yish uchun hech qanday cheklovlarsiz qabul qilinishi majburiyligi belgilandi;

O‘zbekiston Respublikasi hududida milliy valyuta — “So‘m” bilan bir qatorda erkin muomaladagi valyutadan to‘lov vositasi sifatida belgilangan tartibda foydalanishga ruxsat berildi;

4) O‘zbekiston Respublikasining bank muassasalari 1994 yilning 1 iyulidan boshlab so‘m-kuponlarni muomalaga chiqarishni to‘xtatish belgilandi;

5) 1994 yilning 1 avgustiga qadar barcha turdagi to‘lovlarga, shuningdek fuqarolarning omonatlariga va O‘zbekiston Respublikasi doirasida pul o‘tkazish uchun milliy valyuta bilan bir qatorda 1000 so‘m-kuponga 1 “So‘m” nisbati bilan hech qanday cheklovlarsiz so‘m-kuponlarni qabul qilishga ruxsat berildi;

6) Mulkchilik shakllaridan qatʼi nazar, respublikaning barcha xo‘jalik yurituvchi subyektlari va bank muassasalari tomonidan 1994 yilning 1 iyuligacha bo‘lgan holatda hisobvaraqlaridagi, omonatlardagi va majburiyatlardagi mablag‘larni, shuningdek ish haqi, pensiyalar, stipendiyalar va boshqa to‘lovlarning miqdorlarini 1 “So‘m”: 1000 so‘m-kupon nisbati bilan qaytadan hisoblab chiqilishi belgilandi;

7) Jamg‘arma tarmog‘iga ega bo‘lgan “O‘zjamg‘armabank” va respublikaning boshqa tijorat banklari 1994 yil 1 avgustidan boshlab so‘m-kuponlarni omonatlarga qabul qilishni to‘xtatishi belgilandi;

8) Jamg‘arma tarmog‘iga ega bo‘lgan “O‘zjamg‘armabank” va respublikaning boshqa tijorat banklari 1994 yilning 1 sentyabriga qadar aholining omonatlar bo‘yicha shaxsiy hisobvaraqlaridagi operatsiyalarni faqat hisob-kitob cheklari, chek daftarchalari yoki omonatchilarning topshiriqlari bo‘yicha pul o‘tkazish yo‘li bilan amalga oshirsinlar, 1994 yilning 1 sentyabridan boshlab esa omonatchilarning xohishiga ko‘ra “So‘mlar” va “Tiyinlar” bilan berilishi belgilandi;

9) 1994 yilning 1 iyulidan boshlab mulkchilik shakllaridan qatʼi nazar, barcha xo‘jalik yurituvchi subyektlar uchun mehnat haqini to‘lashga beriladigan mablag‘larni davlat yo‘li bilan tartibga solinishi joriy etildi.