«Ўзбекистон Республикасида коммунал хизмат кўрсатишни бошқаришни такомиллаштириш тўғрисида» 1993 йил 15 июлдаги Фармонга ва «Давлат уй-жой фондини хусусийлаштириш тўғрисида»ги Ўзбекистон Республикаси Қонунига мувофиқ Вазирлар Маҳкамаси қарор қилади:

1. 1994 йил 1 январгача мулк эгалари ва уй-жойларни ижарага олувчилар билан ҳудудий коммунал фойдаланиш ташкилотлари ўртасидаги муносабатларни уй-жой фондига хизмат кўрсатиш ва уни сақлаш учун ҳисоб-китобларнинг контракт (шартнома) тизимига ўтказиш зарур деб ҳисоблансин.

Уй-жой фондига хизмат кўрсатишга ва уни сақлаш учун томонларнинг ўзаро жавобгарлиги тўғpиcидa Ўзбекистон Республикаси Коммунал хизмат кўрсатиш вазирлиги томонидан ишлаб чиқилган намунавий шартнома-контракт маъқуллансин (илова қилинмоқда).

2. Белгилаб қўйилсинки;

ҳисоб-китобларнинг уй-жой фондини сақлаш ва ундан фойдаланиш бўйича норматив (ҳақиқий) харажатларни мулк эгалари ва уй-жойларни ижарага олувчилар ҳисобига қоплашни назарда тутувчи янги тизимига ўтиш, унга хизмат кўрсатишга давлат дотациялари миқдорларини ҳар йили қисқартириб борган ҳолда, босқичма-босқич амалга оширилади;

1993 йилда маҳаллий ҳокимият органлари уй-жой фондидан фойдаланиш ва уни сақлаш бўйича ҳақиқий харажатларининг 70 фоизи бюджет ҳисобидан қопланади, кейинчалик дотация миқдори йил сайин 10 фоизга камайтириб борилади ва кейинги йилларда мазкур харажатлар тўлиқ мулк эгалари ва уй-жойларни ижарага олувчилар ҳисобига қопланади.

3. 1994 йилдан бошлаб аҳолига коммунал хизмат кўрсатиш бўйича харажатларни мaблaғ билан таъминлаш Қорақалпоғистон Республикаси, вилоятлар ва Тошкент шаҳар бюджетлари мaблaғлари ҳисобига амалга оширилсин.

Ўзбекистон Республикаси Молия вазирлиги:

Ўзбекистон Республикаси Коммунал хизмат кўрсатиш вазирлиги билан биргаликда 20 кун муддатда, контракт тизимини ҳисобга олган ҳолда, уй-жой фондига хизмат кўрсатиш ва уни сақлаш даромадлари ва харажатлари балансини тайёрласин ҳамда Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига ушбу мақсадлар учун ажратиладиган бюджет маблағлари ҳажмларига тегишли ўзгартиришлар киритсин;

1993 йилнинг иккинчи ярим йили ва кейинги йиллар учун республика бюджетида Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига кўрсатиб ўтилган мақсадлар учун мақсадли субсидиялар бериш кўзда тутилсин.

4. Мулк эгалари ва уй-жойлари ижарага олувчилар билан ўзаро муносабатларнинг кўрсатиб ўтилган тартиби ўз балансида идорага қарашли уй-жой фонди бўлган вазирликлар, идоралар, бирлашмалар, корхоналар ва ташкилотларга ҳам жорий этилсин. Уларга ҳар йили уй-жойлардан фойдаланиш ва уларни сақлашга тегишли маблағлар ажратиш юклатилсин.

5. Ўзбекистон Республикаси Коммунал хизмат кўрсатиш вазирлиги икки ой муддатда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда, уй-жой фондининг тўлиқлик ва шинамлик даражасига, шунингдек, уйнинг тоифасига, қулайликлар мавжудлигига ва хизмат кўрсатиш сифатига кўра, умумий майдоннинг 1 кв. метри учун ҳақ тўлаш тарифини аниқлаш тартибини ишлаб чиқсин ва тасдиқласин.

Қopaқaлпoғистон Республикаси Вазирлар Кенгашига, вилоятлар ва Тошкент шаҳар ҳокимликларига ушбу Тартиб асосида умумий майдоннинг бир квадрат метри учун ҳақ тўлаш бўйича аниқ ставкаларни белгилаш ҳуқуқи берилсин.

6. Квартира ҳақи тўлаш бўйича Фуқароларнинг айрим тоифалари учун ҳозирги вақтда амалда бўлган имтиёзлар сақлаб қолинсин, тарифлардаги тафовут бюджет манбалари, шунингдек, уй-жой фондининг кимга қарашли эканлигига кўра, корхоналар ва ташкилотларнинг маблағлари ҳисобига уй-жойлардан фойдаланиш ташкилотларига тўлансин.

7. Уй-жойларга хизмат кўрсатиш қийматини тўлаш бўйича аҳолининг анчагина харажатларини қоплаш учун Ўзбекистон Республика Меҳнат вазирлиги, Ижтимоий таъминот вазирлиги, Коммунал хизмат кўрсатиш вазирлиги Молия вазирлиги билан биргаликда бир ой муддатда кўп болали, кам таъминланган оилаларга мақсадли пул нафақалари тўлаш тартиби тўғрисидаги таклифларини ишлаб чиқсинлар ва тасдиқлаш учун Вазирлар Маҳкамасига киритсинлар.

8. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Ўзбекистон Республикаси Коммунал хизмат кўрсатиш вазирлиги, тегишли ҳудудий коммунал фойдаланиш бирлашмалари билан биргаликда:

шу йилнинг 1 ноябригача мулк эгалари ва уй-жойларни ижарага олганлар билан ўзаро ҳисоб-китобларнинг янги тизимига ўтиш тўғрисида шартнома-контрактлар тузсинлар;

аҳоли ўртасида зарур тушунтириш ишларини ўтказсинлар, бу ишларга маҳалла ва уй-жой комитетларини жалб этсинлар;

уй-жойлардан фойдаланиш ташкилотлари томонидан аҳолининг яшаш шароитларини яхшилаш ва хизматлар кўрсатиш сифатини ошириш бўйича олиб борилаётган ишлар учун маҳалла ва уй-жой комитетларининг жавобгарлигини оширсинлар.

9. Ўзбекистон Республикаси Молия вазирлиги, Коммунал хизмат кўрсатиш вазирлиги, Энергетика ва электрлаштириш вазирлиги, Қорақалпоғистон Республикаси Вазирлар Кенгаши, вилоятларга Тошкент шаҳар ҳокимликлари билан биргаликда икки ой муддатда аҳолининг коммунал хизматлар (уларнинг ўз харажатларини ўзи қоплашга босқичма-босқич ўтишини назарда тутган ҳолда) учун ҳисоб-китоблари тартиби тўғрисида Вазирлар Маҳкамасига таклифлар киритсин.

10. Ўзбекистон Республикаси вазирликлари, идоралари, корхоналар ва ташкилотлари аҳоли томонидан ҳамда республика халқ хўжалигида фойдаланиладиган сув, табиий газ ва бошқа энергия манбаларини тежаб сарфлаш мақсадида Вазирлар Маҳкамасининг 1993 йил 26 майдаги 166-ф-сон фармойишини сўзсиз бажаришга доир қўшимча чора-тадбирлар кўрсинлар.

11. ЎзССР МИК ва ХКСнинг «Квартира ҳақи ҳамда шаҳарларда ва шаҳар типидаги посёлкаларда уй-жойлардан фойдаланишни тартибга солишга доир чора-тадбирлар тўғрисида» 1927 йил 26 майдаги 63-сон, ЎзССР ХКСнинг 1945 йил 31 декабрдаги 2078-сон қарорлари кейинги ўзгаришлари билан бирга ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Бош вазир ўринбосари ўртоқ К. Н. Тўлаганов зиммасига юклатилсин.

Мазкур шартнома Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда Ўзбекистон Республикаси Коммунал хизмат кўрсатиш вазирлиги томонидан тайёрланган. Умумий майдонининг 1 кв. метри учун тўлов тарифлари уй-жой фондининг тўлиқлик ва шинамлик даражаси, уйнинг тоифаси, қулайликларнинг мавжудлиги ва хизмат кўрсатиш сифатига кўра белгиланади.

1. Мазкур шартнома уй-жой фондидан фойдаланувчи корхона билан ____________________________ ҳудудий коммунал фойдаланиш бирлашмаси номидан устав асосида ишловчи, бундан кейин «ижрочи» деб номланувчи директор _________________________ ва бундан кейин «буюртмачи» деб номланувчи квартира эгаси ўртасида хусусийлаштирилган квартирага техник хизмат кўрсатиш учун тузилди.

2. Буюртмачи топширади, ижрочи эса далолатнома бўйича ________________ кўчасидаги умумий майдони _____ кв. метр бўлган ____________ -уйдаги ______та хона, ваннахона, ошхона, балкон, айвон ва пешайвондан иборат ________ -квартирани техник хизмат кўрсатиш учун қабул қилиб олади.

1. Ижрочи қуйидаги мажбуриятларни олади:

давлат ва жамоат уй-жой фонди уйлари учун белгиланган шартларда уй-жойлардан техник фойдаланишнинг ягона қоидалари ва нормаларига албатта риоя қилган ҳолда техник хизмат кўрсатишни таъминлаш, шу жумладан, уй-жойни, жиҳозларни, уй атрофларини зарур ҳолатда сақлашни ва у ерда яшовчи аҳолига хизмат кўрсатишни таъминловчи ишларни олиб бориш;

бир ойда __________ ҳисобидан умумий равишда фойдаланиладиган жойларни, муҳандислик асбоб-ускуналарини, ташқи ободонлаштириш жиҳозларини тузатиш;

бир ойда __________ ҳисобидан уй-жой конструкцияларини баҳорги ва кузги назоратдан ўтказиш;

бир ойда ___________ ҳисобидан муҳандислик асбоб-ускуналарини, коммуникацияларини, уй остидаги хоналарни, томларни, умумий равишда фойдаланиладиган жойларни кузги-қишки даврда фойдаланиш учун тайёрлаб қўйиш;

бир ойда ___________ ҳисобидан умумий равишда фойдаланиладиган жойларга, уй атрофларига, ахлатхоналарга санитария хизмати кўрсатишни таъминлаш;

ҳар бир кўрсатилган хизмат учун ____________ ҳисобидан прописка қилиш, пропискадан чиқариш, маълумотномалар бериш юзасидан хизмат кўрсатиш;

тасдиқланган тавсифлар ва шартномавий нархлар бўйича бошқа пулли хизматлар кўрсатиш;

1 октябрдан кечиктирмасдан квартирани ва уй-жойни иситиш мавсумига тайёрлаб қўйиш;

пайдо бўлган авария ҳолатларини тезлик билан, лекин талабнома олингандан сўнг 4 соатдан кечикмай, бошқа носозликларни эса 24 соат ичида бартараф этиш;

норматив муддатлар етиб келиши билан уй-жойнинг умумий равишда фойдаланиладиган жойларини, муҳандислик асбоб-ускуналарини, ертўлаларни, тoмлар ва бошқаларни жорий ҳамда асосли тузатиш,

2. Буюртмачи қуйидаги мажбуриятларни олади:

а) уйга, квартирага техник хизмат кўрсатиш юзасидан мазкур Шартнома бўйича бажарилган ишларни ўз вақтида қабул қилиб олиш ва унга ҳақ тўлаш;

б) квартирадан белгиланган мақсадларга мувофиқ фойдаланиш, уй-жойнинг санитария-техника асбоб-ускуналарига, ташқи ободонлаштириш объектларига эҳтиёткорлик билан муносабатда бўлиш.

Техник хизмат кўрсатганлик ва тузатганлик учун ҳақни буюртмачи умумий майдоннинг 1 кв. метри учун ишлар ҳақиқий таннархининг________________фоизи миқдорида тўлайди, сарф-харажатларнинг қолган қисми маҳаллий бюджет маблағлари ҳисобидан қопланади.

Коммунал хизматлар тўлови ижрочи орқали Вазирлар Маҳкамаси томонидан белгиланган тарифлар бўйича амалга оширилади.

Ижрочи айби билан иссиқлиқ совуқ ва иссиқ сув беришдаги ва бошқа коммунал хизматлар кўрсатишдаги узилишлар далолатнома билан икки томонлама расмийлаштирилади ва улар учун ҳақ тўланмайди.

1. Ўз мажбуриятларини муддатида бажармаган ёки зарур даражада бажармаган ҳолларда ижрочи буюртмачига муддати ўтказиб юборилган ҳар бир кун учун ишлар қийматининг 0,5 фоизи миқдорида жарима тўлайди.

2. Буюртмачи томонидан тўловлар муддати чўзиб юборилганда муддати ўтказиб юборилган ҳар бир кун учун муддати ўтказиб юборилган тўловлар суммасининг 0,5 фоизи миқдорида пеня ундирилади.

3. Аварияни бартараф этиш бўйича шартнома мажбуриятлари ижрочи томонидан бузилган ҳолларда буюртмачи шартномада назарда тутилган ишларни ижрочи маблағлари ҳисобига бажариши мумкин ёки зарарларни тўлашни талаб қилиш ҳуқуқига эгадир.

Буюртмачи томонидан унинг шартнома мажбуриятлари ўз вақтида бажарилмаганлиги туфайли ишларда узилиш бўлганлиги учун ижрочи жавоб бермайди.

4. Жарима санкцияларини тўлаш томонларни шартнома бўйича қабул қилинган мажбуриятларни бажаришдан озод қилмайди.

1. Ушбу Шартнома _____________ дан ____________ гача бўлган давр учун 1 йилга, 2 нусхада тузилди, иккала нусха ҳам бир хил кучга эга, улардан бири буюртмачида, иккинчиси ижрочида сақланади.

Агар томонлардан бири шартноманинг амалда бўлиш муддатлари тамом бўлишидан икки ой олдин уни тўхтатиш тўғрисида ариза бермаган бўлса, шартнома кейинги даврга узайтирилган ҳисобланади.

2. Муддати тамом бўлгунга қадар шартномани бекор қилиш қонун билан белгиланган тартибда амалга оширилади.

Мазкур Шартномани бажариш, бекор қилиш ва унинг муддатини узайтиришга доир пайдо бўлган барча низолар белгиланган тартибда кўриб чиқилади.