Туризмни янада ривожлантириш ва уни ташкил этишни такомиллаштириш, сайёҳлик хизматлари бозорида кичик ва ўрта сайёҳлик ташкилотларининг қатнашишини фаоллаштириш, шунингдек хорижий инвесторларни туризм соҳасига кенг жалб қилиш мақсадида Вазирлар Маҳкамаси қарор қилади:

1. «Ўзбектуризм» миллий компаниясининг, шунингдек хусусий туристик фирмаларнинг Хусусий сайёҳлик ташкилотлари уюшмасини ташкил этиш ва унинг «Ўзбектуризм» миллий компаниясига қўшилган аъзо сифатида кириши тўғрисидаги таклифи қабул қилинсин.

«Ўзбектуризм» миллий компанияси Хусусий сайёҳлик ташкилотлари уюшмасига, сайёҳлик ташкилотларининг фаолиятини ташкил этиш, маркетинг, малакали кадрлар тайёрлаш ва уларни қайта тайёрлаш, шунингдек сайёҳлик фаолияти соҳасида қонун ҳужжатларига риоя қилиш билан боғлиқ бўлган масалаларда услубий ва ҳуқуқий ёрдам кўрсатиши маълумот учун қабул қилинсин.

2. Қуйидагиларга:

«Ўзбектуризм» миллий компанияси таркибига кирувчи корхоналар ва ташкилотлар рўйхатига 1-иловага* мувофиқ;

«Ўзбектуризм» миллий компанияси бошқаруви ходимларининг чекланган сони 55 нафардан иборат бўлган (хизмат кўрсатувчи ходимларсиз) ижро этувчи аппарати тузилмасига 2-иловага мувофиқ;

Хусусий сайёҳлик ташкилотлари уюшмасининг намунавий ташкилий тузилмасига ва унинг бошқаруви ижро этувчи аппаратининг намунавий тузилмасига 3 ва 4-иловаларга мувофиқ розилик берилсин.

3. Белгилансинки, Хусусий сайёҳлик ташкилотлари уюшмаси бошқаруви раиси лавозимига кўра «Ўзбектуризм» миллий компанияси раисининг ўринбосари ҳисобланади.

4. Хусусий сайёҳлик ташкилотлари уюшмаси фаолиятининг асосий йўналишлари:

Буюк ипак йўлини тиклашда, республикада туризмнинг замонавий инфратузилмасини ривожлантиришда фаол қатнашиш;

Уюшма аъзолари бўлган хусусий сайёҳлик ташкилотларига кўмаклашиш ва улар фаолиятини мувофиқлаштириш;

туризм соҳасида маркетинг тадқиқотлари ўтказиш;

хусусий сайёҳлик ташкилотларини ривожлантиришга хорижий инвестицияларни ва мамлакатимиз юридик ва жисмоний шахсларининг маблағларини жалб қилиш;

«Ўзбектуризм» миллий компаниясида, шунингдек давлат органларида ва жамоат ташкилотларида Уюшма аъзолари бўлган хусусий сайёҳлик ташкилотларининг манфаатларини ифодалаш;

Уюшма аъзоларига ахборот, маслаҳат ва услубий ёрдам кўрсатиш;

сайёҳлик бизнеси соҳасида ходимларнинг касб тайёргарлигига ва уларни қайта тайёрлашга кўмаклашиш эканлиги маълумот учун қабул қилинсин.

5. Хусусий сайёҳлик ташкилотлари уюшмаси «Ўзбектуризм» миллий компанияси иштирокида икки ҳафта муддатда ўзининг таъсис ҳужжатларини мазкур қарорга мувофиқлаштирсин ва белгиланган тартибда уларни қайта рўйхатдан ўтказсин.

6. «Ўзбектуризм» миллий компанияси 1999 йил 1 январгача:

Ўзбекистон Республикаси Адлия вазирлиги билан биргаликда «Туризм тўғрисида»ги қонун лойиҳасини ишлаб чиқсин ва белгиланган тартибда киритсин;

«Ўздавстандарт» маркази, Ўзбекистон Республикаси Коммунал хизмат кўрсатиш вазирлиги, бошқа манфаатдор вазирликлар ва идоралар билан биргаликда сайёҳлик хизматлари соҳасида ягона давлат стандартларини ишлаб чиқсин;

Ўзбекистон Республикаси Макроиқтисодиёт ва статистика вазирлиги, Молия вазирлиги ҳамда бошқа манфаатдор вазирликлар ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда 2005 йилгача бўлган даврда республикада туризмни ривожлантириш Дастурини ишлаб чиқсин ва тасдиқлаш учун Ўзбекистон Республикаси Вазирлар Маҳкамасига киритсин.

7. Ўзбекистон Республикаси Давлат мулки қўмитаси «Ўзбектуризм» миллий компанияси билан биргаликда икки ой муддатда сайёҳлик ташкилотларини давлат тасарруфидан чиқаришни янада чуқурлаштириш ва акциялаштириш, акциялар пакетларини ва кичик сайёҳлик ташкилотларини хорижий инвесторларга сотиш, меҳмонхона хўжалигини бошқаришга хорижий сайёҳлик фирмаларини жалб қилиш бўйича аниқ таклифлар киритсин.

8. «Ўзбектуризм» миллий компаниясига Вазирлар Маҳкамасининг туризм соҳасида лицензия бериш бўйича комиссиясининг қарорлари асосида, мулкчилик шаклларидан қатъи назар, хўжалик юритувчи субъектларга уларнинг туризм соҳасида фаолиятни амалга оширишига махсус рухсатномалар (лицензиялар)ни техник расмийлаштириш ҳуқуқи берилсин.

«Ўзбектуризм» миллий компаниясига туризм соҳасида фаолият кўрсатишга лицензиялар олган ташкилотлар томонидан амалдаги қонун ҳужжатларида белгиланган талабларга риоя қилиниши устидан назорат қилиш функцияси юклансин.

9. Ўзбекистон Республикаси Ташқи иқтисодий фаолият миллий банки ва «Ўзбектуризм» миллий компаниясининг «Ўзсаёҳатинвест-банк» негизида Ташқи иқтисодий фаолият миллий банкининг «Ўзсаёҳат» бўлимини ташкил этиш тўғрисидаги таклифига розилик берилсин.

10. Ўзбекистон Республикаси Вазирлар Маҳкамасининг 1992 йил 20 октябрдаги 484-сон қарорининг 1-банди ва 5-бандининг тўртинчи хатбоши, шунингдек кўрсатиб ўтилган қарорга 1 ва 2-иловалар ўз кучини йўқотган деб ҳисоблансин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.А. Азизхўжаев зиммасига юклансин.