Сўнгги йилларда автомототранспорт воситалари учун рўйхатдан ўтказиш давлат рақами белгиларини бериш тартибини такомиллаштириш борасида қатор чора-тадбирлар амалга оширилди. Харидоргир давлат рақами белгиларини очиқ аукцион орқали сотиш тартиби жорий этилиб, давлат бюджетига қўшимча маблағ жалб қилинди.

Шу билан бирга, рўйхатдан ўтказиш давлат рақами белгиларини беришнинг амалдаги механизмида камчиликлар мавжудлиги кузатилмоқда. Фуқаролар учун аукцион савдоларида иштирок этиш тартиби мураккаб ва кўп вақт талаб этиши, айрим тоифадаги давлат рақами белгилари учун бошланғич нархлар юқорилиги кенг аҳоли қатлами учун бундай рақамларни сотиб олиш имкониятини чекламоқда.

Автомототранспорт воситалари учун рўйхатдан ўтказиш давлат рақами белгиларини (кейинги ўринларда — давлат рақами белгилари) олишда барчага тенг имконият яратиш, маъмурий оворагарчиликлар ва аҳолига ортиқча моддий юкламанинг олдини олиш ҳамда давлат хизматини рақамли трансформация қилиш ва унинг шаффофлигини таъминлаш мақсадида Вазирлар Маҳкамаси қарор қилади:

1. 2026 йил 1 январдан бошлаб қуйидагилар бекор қилинсин:

автотранспорт воситалари учун рўйхатдан ўтказиш давлат рақами белгиларини оширилган тўлов ставкалари бўйича беришда «Ўзбекистон республика товар-хомашё биржаси» акциядорлик жамияти ахборот тизимида аукцион ўтказиш тартиби;

автотранспорт воситалари учун харидоргир ҳарф ва рақамлар комбинациясига эга бўлган давлат рақами белгиларини оширилган тўлов ставкалари бўйича бериш тартиби.

Бунда автомототранспорт воситалари учун харидоргир ҳарф ва рақамлар комбинациясига эга бўлмаган давлат рақами белгиларини беришнинг амалдаги тартиби сақланиб қолиниши белгилансин.

2. Шундай тартиб ўрнатилсинки, унга мувофиқ:

а) 2026 йил 1 январдан бошлаб автомототранспорт воситалари учун исталган ҳарф ва рақамлар комбинациясига эга бўлган давлат рақами белгилари ягона оширилган тўлов эвазига жисмоний ва юридик шахсларнинг тўғридан-тўғри электрон мурожаатига асосан берилади;

б) жисмоний ва юридик шахслар онлайн режимда узлуксиз равишда янгиланиб турадиган ягона очиқ маълумотлар базасида бўш турган исталган ҳарф ва рақамлар комбинациясига эга бўлган давлат рақами белгиларини қуйидаги ахборот тизимлари орқали танлаб олади:

Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти ички ишлар бош бошқармалари ҳамда вилоятлар ички ишлар бошқармалари жамоат хавфсизлиги хизмати йўл ҳаракати хавфсизлиги бошқармаларининг рўйхатдан ўтказиш ва имтиҳон олиш бўлинмаларида (кейинги ўринларда — рўйхатдан ўтказиш бўлинмалари) жойлашган инфокиосклар;

Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг (кейинги ўринларда — ЙҲХХ) мобил иловаси;

ЙҲХХнинг расмий веб-сайти;

Ўзбекистон Республикаси Ягона интерактив давлат хизматлари портали;

в) 2025 йил 1 октябрдан бошлаб исталган ҳарф ва рақамлар комбинациясига эга бўлган давлат рақами белгилари бериш учун ягона оширилган тўлов миқдори «Uzavtomotobelgi» давлат унитар корхонаси томонидан белгиланади;

г) автомототранспорт воситаси қайта давлат рўйхатидан ўтказилганда барча тоифалардаги давлат рақами белгилари ягона оширилган тўловнинг 50 фоизи миқдоридаги тўлов эвазига унинг эгасининг номида қолдирилиши ёки қонунчилик ҳужжатларида белгиланган тартибда бошқа шахс номига ўтказилиши мумкин.

Бунда ушбу кичик бандда назарда тутилган талаб 2025 йил 1 ноябрга қадар берилган ёки фойдаланишда бўлган барча тоифалардаги давлат рақами белгиларига ҳам татбиқ этилади.

3. Белгилансинки:

а) 2026 йил 1 январдан бошлаб ягона очиқ маълумотлар базасида ҳудудларнинг код рақами доирасида барча тоифадаги давлат рақами белгилари (олдин берилган ёки фойдаланишда бўлганлардан ташқари) жойлаштирилади. Бунда ҳудуднинг кейинги код рақамига фақат олдинги код рақами доирасидаги харидоргир ҳарф ва рақамлар комбинациясига эга бўлган давлат рақами белгиларининг 90 фоизи банд бўлган тақдирда ўтилади;

б) «Ўзбекистон республика товар-хомашё биржаси» АЖ 2025 йил 1 октябрдан бошлаб давлат рақами белгиларининг аукцион савдоларини тўхтатади;

в) «Ўзбекистон республика товар-хомашё биржаси» АЖ ахборот тизимига аукционга қўйилиб, сотилмаган, шунингдек, ишлаб чиқарилиб, сотилмаган харидоргир ҳарф ва рақамлар комбинациясига эга бўлган давлат рақами белгилари:

1 — 3-тоифадаги давлат рақами белгилари — «Uzavtomotobelgi» давлат унитар корхонаси томонидан белгиланган ягона оширилган тўлов эвазига берилади;

4 — 6-тоифадаги давлат рақами белгилари — харидоргир ҳарф ва рақамлар комбинациясига эга бўлмаган давлат рақами белгиларини беришнинг амалдаги тартибида берилади.

4. «Uzavtomotobelgi» давлат унитар корхонасига аҳолининг талаб ва таклифидан келиб чиққан ҳолда автомототранспорт воситалари учун олтитагача ҳарф ва (ёки) рақамлар комбинациясидан иборат бўлган «ноёб» давлат рақами белгиларини очиқ ким ошди электрон савдоларини ўтказиш орқали бериш ҳуқуқи берилсин.

Бунда «ноёб» давлат рақами белгилари амалдаги давлат рақами белгиларини такрорламаслиги, қонунчиликка ва аҳлоқий нормаларга хилоф маънога эга бўлмаслиги керак.

5. Ўзбекистон Республикаси Ички ишлар вазирлиги:

а) 2026 йил 1 январга қадар:

рўйхатдан ўтказиш бўлинмаларида I, IE, III, IIIE типдаги давлат рақами белгилари ишлаб чиқарилишини, шу жумладан, улар учун зарур ускуна ва жиҳозлар ўрнатилишини, ҳом ашё билан таъминланишини ҳамда ишга туширилишини ташкил этиш чораларини кўрсин;

рўйхатдан ўтказиш бўлинмаларида давлат рақами белгилари ишлаб чиқариш мақсадида «Uzavtomotobelgi» давлат унитар корхонасининг ходимлар штат бирликларини кўпайтирсин, уларни касбга ўқитиш чораларини кўрсин;

исталган ҳарф ва рақамлар комбинациясига эга бўлган давлат рақами белгиларини инсон омилини истисно этадиган танлаб олиш ахборот тизимини яратсин;

«ноёб» давлат рақами белгиларини очиқ ким ошди электрон савдоларига қўйиш ва ўтказиш тартибини тасдиқласин;

б) Рақамли технологиялар вазирлиги билан биргаликда:

ЙҲХХнинг давлат рақам белгиларига доир очиқ маълумотлар базасини яратиш, ишга тушириш ҳамда уни зарур техник ва дастурий таъминот билан таъминлаш чораларини кўрсин;

давлат рақами белгилари ишлаб чиқариладиган рўйхатдан ўтказиш бўлинмаларининг ўзаро ҳамда ягона очиқ маълумотлар базаси билан интеграция қилинишини таъминласин.

в) Техник жиҳатдан тартибга солиш агентлиги билан биргаликда уч ой муддатда «OʻzМSt 274:2024 «Автомототранспорт воситалари ва уларнинг тиркамалари учун ёруғлик қайтарувчи қопламали ва ҳимоя элементлари билан давлат рўйхатига олиш рақамлари. Техник шартлар» миллий стандартига ушбу қарорга мувофиқ жорий этилаётган «ноёб» давлат рақами белгиларининг техник кўрсаткичларини назарда тутувчи ўзгартириш ва қўшимчалар киритсин.

6. Ўзбекистон Республикаси Ҳукуматнинг айрим қарорларига иловага мувофиқ 2026 йил 1 январдан ўзгартириш ва қўшимчалар киритилсин.

7. Ўзбекистон Республикаси Ички ишлар вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

8. Ушбу қарорнинг бажарилишини назорат қилиш Ўзбекистон Республикаси ички ишлар вазири А.А. Ташпулатов зиммасига юклансин.

1. Вазирлар Маҳкамасининг «Автомототранспорт воситаларини давлат рўйхатидан ўтказиш ва уларга рўйхатдан ўтказиш давлат рақами белгиларини бериш тартибини такомиллаштириш тўғрисида» 2017 йил 31 августдаги 683-сон қарорида:

а) 1-банд ўз кучини йўқотган деб ҳисоблансин;

б) 2-бандда:

учинчи хатбоши чиқариб ташлансин;

тўртинчи хатбоши учинчи хатбоши деб ҳисоблансин ва қуйидаги таҳрирда баён этилсин:

«Жисмоний ва юридик шахсларга автомототранспорт воситалари учун исталган ҳарф ва рақамлар комбинациясига эга бўлган рўйхатдан ўтказиш давлат рақами белгиларини ягона оширилган тўлов эвазига бериш тартиби тўғрисидаги низом 3-иловага мувофиқ тасдиқлансин»;

в) 3-бандда:

иккинчи — бешинчи хатбошилар чиқариб ташлансин;

олтинчи ва еттинчи хатбошилар тегишлича иккинчи ва учинчи хатбошилар деб ҳисоблансин;

г) 6 ва 7-бандлар ўз кучини йўқотган деб ҳисоблансин;

д) 1-иловада:

2-бандда:

бешинчи хатбоши чиқариб ташлансин;

олтинчи — ўн саккизинчи хатбошилар тегишлича бешинчи — ўн еттинчи хатбошилар деб ҳисоблансин;

бешинчи хатбоши қуйидаги таҳрирда баён этилсин:

«ягона оширилган тўлов эвазига автомототранспорт воситалари учун РЎДРБ — исталган ҳарф ва рақамлар комбинациясидан иборат бўлган, ихтиёрий танловга кўра ягона оширилган тўлов эвазига бериладиган РЎДРБ»;

26-бандда:

тўртинчи ва бешинчи хатбошилар қуйидаги таҳрирда баён этилсин:

«РЎДРБ Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг Ягона автоматлаштирилган ахборот тизими «Давлат рақами белгилари» модулида автоматик тарзда тасодифий танлаш орқали берилади, ягона оширилган тўлов эвазига бериладиган РЎДРБ бундан мустасно;

ягона оширилган тўлов эвазига бериладиган автомототранспорт воситалари учун РЎДРБ жисмоний ва юридик шахсларнинг тўғридан-тўғри электрон мурожаатига асосан тақдим этилади»;

саккизинчи хатбоши қуйидаги таҳрирда баён этилсин:

«Илгари фойдаланишда бўлган барча тоифалардаги рўйхатдан ўтказиш давлат рақами белгилари автомототранспорт воситаси қайта давлат рўйхатидан ўтказилганда, ушбу транспорт воситаси эгасининг хоҳишига кўра ҳамда ягона оширилган тўловнинг 50 фоизи миқдорида тўлов амалга оширилган тақдирда унинг эгасининг номида қолдирилиши ёки қонунчилик ҳужжатларида белгиланган тартибда бошқа шахс номига ўтказилиши мумкин»;

27 ва 28-бандлар қуйидаги таҳрирда баён этилсин:

«27. Берилган РЎДРБ, шу жумладан, ягона оширилган тўлов эвазига бериладиган автомототранспорт воситалари учун РЎДРБ транспорт воситаси эгасининг мулки ҳисобланмасдан, улардан қатъиян мақсадли фойдаланилиши учун унга тақдим этилади.

28. ЙҲХХнинг онлайн режимида узлуксиз равишда янгиланиб турадиган ягона очиқ маълумотлар базасида бўш турган ягона оширилган тўлов эвазига бериладиган автомототранспорт воситалари учун РЎДРБ ҳақида тўлиқ маълумот бўлиши лозим»;

29-банднинг биринчи хатбошиси қуйидаги таҳрирда баён этилсин:

«29. Автомототранспорт воситасини бошқа шахсга ўтказишда олдин берилган (илгари фойдаланишда бўлган) барча тоифалардаги рўйхатдан ўтказиш давлат рақами белгилари транспорт воситасининг аввалги эгасининг аризасига кўра ҳудудий бошқармаларга ўн икки ой муддатга сақлаш учун топширилиши мумкин. РЎДРБни ўн икки ой муддатга сақлаганлик учун тўлов ундирилмайди»;

30-банднинг биринчи хатбошиси қуйидаги таҳрирда баён этилсин:

«30. Автомототранспорт воситасини давлат рўйхатидан ўтказишда олдин берилган (илгари фойдаланишда бўлган) барча тоифалардаги РЎДРБ алмаштиришига олиб келса, транспорт воситасининг аввалги эгасининг хоҳишига кўра ушбу РЎДРБ сақлаб қолинади ва ягона оширилган тўловнинг 50 фоизи миқдорида тўлов амалга оширилган тақдирда такроран берилади:»;

қуйидаги мазмундаги 30¹-банд билан тўлдирилсин:

«30¹. Автомототранспорт воситаси қайта давлат рўйхатидан ўтказилганда, эгасининг хоҳишига кўра унинг номида қолдириладиган ёки қонунчилик ҳужжатларида белгиланган тартибда бошқа шахс номига ўтказиладиган давлат рақами белгиларини ДЙҲХХда қайта расмийлаштириб беришдан келиб тушадиган маблағларнинг:

35 фоизи — Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармасига;

15 фоизи — Ўзбекистон Республикаси Ички ишлар вазирлигининг моддий-техника базасини ривожлантириш, ходимларини моддий рағбатлантириш ва бошқа харажатлар махсус жамғармасига;

50 фоизи — Давлат бюджетига йўналтирилади»;

31-банд қуйидаги таҳрирда баён этилсин:

«31. Олдин берилган (илгари фойдаланишда бўлган) барча тоифадаги РЎДРБ транспорт воситаларининг эгалари томонидан сақланмаганда, белгиланган тартибда ҳудудий ДЙҲХХ органлари томонидан олиб қўйилади ва йўқ қилинади. Ушбу РЎДРБнинг рақам ва ҳарфлари комбинациялари ЙҲХХнинг онлайн режимида узлуксиз равишда янгиланиб турадиган ягона очиқ маълумотлар базасида бўш турган ягона оширилган тўлов эвазига бериладиган автомототранспорт воситалари учун РЎДРБ сифатида қайд этилади.

Бундай РЎДРБ кейинчалик ягона оширилган тўлов эвазига бериладиган автомототранспорт воситалари учун РЎДРБни бериш тартиби асосида такроран ишлаб чиқарилиши ва берилиши мумкин»;

32-банд ўз кучини йўқотган деб ҳисоблансин;

56-банддаги «оширилган тўлов ставкали автотранспорт воситалари учун РЎДРБ, автотранспорт воситалари учун харидоргир ҳарф ва рақамлар комбинациясига эга бўлган РЎДРБ» сўзлари «ягона оширилган тўлов эвазига бериладиган автомототранспорт воситалари учун РЎДРБ» сўзлари билан алмаштирилсин;

е) 2-илова ўз кучини йўқотган деб ҳисоблансин;

ж) 3-илова матни қуйидаги таҳрирда баён этилсин:

1. Ушбу Низом жисмоний ва юридик шахсларга автомототранспорт воситалари учун исталган ҳарф ва рақамлар комбинациясига эга бўлган рўйхатдан ўтказиш давлат рақами белгиларини (кейинги ўринларда — РЎДРБ) ягона оширилган тўлов эвазига бериш тартибини белгилайди.

Исталган ҳарф ва рақамлар комбинациясига эга бўлган РЎДРБ бериладиган транспорт воситалари Ўзбекистон Республикаси Вазирлар Маҳкамаси томонидан белгиланган тартибда давлат рўйхатидан ўтказилади.

2. Исталган ҳарф ва рақамлар комбинациясига эга бўлган РЎДРБ жисмоний ва юридик шахслар томонидан ихтиёрий равишда фақат электрон тарзда танланади. Бунда:

Қорақалпоғистон Республикаси Ички ишлар вазирлиги, Тошкент шаҳар ва Тошкент вилояти ички ишлар бош бошқармалари ҳамда вилоятлар ички ишлар бошқармалари жамоат хавфсизлиги хизмати йўл ҳаракати хавфсизлиги бошқармаларининг рўйхатдан ўтказиш ва имтиҳон олиш бўлинмаларида (кейинги ўринларда — рўйхатдан ўтказиш бўлинмалари) жойлашган инфокиосклар;

Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг (кейинги ўринларда — ЙҲХХ) мобил иловаси;

ЙҲХХнинг расмий веб-сайти;

Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали мурожаат қилиниши мумкин.

3. Исталган ҳарф ва рақамлар комбинациясига эга бўлган РЎДРБ автоматлаштирилган ахборот тизими орқали танланади ва банд қилинади.

Ушбу автоматлаштирилган ахборот тизими инсон омилини тўлиқ истисно этган ҳолда фаолият кўрсатади ҳамда РЎДРБни танлашда субъектив аралашув ёки имтиёз бериш ҳолатлари юзага келишига йўл қўйилмайди.

Ҳар қандай давлат хизматчиси ёки бошқа шахс томонидан РЎДРБни тақсимлаш жараёнига аралашув қатъиян тақиқланади.

4. Исталган ҳарф ва рақамлар комбинациясига эга бўлган РЎДРБни танлаш учун ЙҲХХ томонидан автоматлаштирилган ахборот тизимида РЎДРБларнинг ягона очиқ маълумотлар базаси юритилади.

Очиқ маълумотлар базаси орқали фуқаролар учун РЎДРБни танлаш жараёнининг шаффофлиги ва холислиги таъминланади.

5. Исталган ҳарф ва рақамлар комбинациясига эга бўлган РЎДРБ учун ягона оширилган тўлов миқдори «Uzavtomotobelgi» давлат унитар корхонаси томонидан белгиланади.

6. «Uzavtomotobelgi» давлат унитар корхонаси аҳолининг талаб ва таклифидан келиб чиққан ҳолда автомототранспорт воситалари учун олтитагача ҳарф ва (ёки) рақамлар комбинациясидан иборат бўлган «ноёб» РЎДРБни очиқ кимошди электрон савдоларини ўтказиш орқали бериш ҳуқуқига эга.

Бунда «ноёб» РЎДРБ амалдаги РЎДРБни такрорламаслиги, қонунчиликка ва ахлоқий нормаларга хилоф маънога эга бўлмаслиги керак.

«Ноёб» РЎДРБни бериш бўйича очиқ кимошди электрон савдолари ўтказиш тартиби Ўзбекистон Республикаси Ички ишлар вазирлиги томонидан тасдиқланади.

7. Ушбу тартиб I, IE, III, IIIE, X, XI, XIE, XI¹, XIE¹, XI², XI³ типидаги РЎДРБга нисбатан қўлланади.

8. Автоматлаштирилган ахборот тизимида танланган рақам комбинацияси дастур томонидан банд қилинмагани текширилиб, буюртма берувчи номига дастлабки банд қилинади ва бу комбинация бошқа шахслар томонидан танланмаслиги учун тизимда вақтинча захирага олинади.

9. Ариза берувчи танланган РЎДРБ комбинациясини олиш учун белгиланган тартибда ягона оширилган тўловни электрон шаклда тўлайди. Тўлов ЯИДХП ёки ЙҲХХнинг мобил иловаси ёхуд расмий веб-сайтининг интеграциялашган тўлов тизими орқали онлайн амалга оширилиши лозим.

Тўлов қабул қилингач, автоматлаштирилган тизим томонидан мазкур рақам комбинацияси учун ариза берувчи номига расмий банд қилинганлиги тасдиқланади ва РЎДРБ бериш жараёнини якунлаш учун махсус тасдиқнома (электрон шаклда) ариза берувчига тақдим этилади.

10. Захирага олинган вақт танланган харидоргир РЎДРБ учун белгиланган миқдордаги ягона оширилган тўлов амалга оширилгунга қадар амал қилиб, жисмоний шахслар учун 24 соатдан ва юридик шахслар учун 72 соатдан иборат. Ушбу вақт мобайнида ягона оширилган тўлов амалга оширилмаган танланган РЎДРБ комбинациялари очиқ маълумотлар базасига қайтарилади.

11. РЎДРБ белгиланган тартибда транспорт воситасига бириктириш учун берилади. Бунда транспорт воситасини давлат рўйхатидан ўтказиш ёки қайта рўйхатдан ўтказиш жараёнида танланган ва ягона оширилган тўлови тўланган РЎДРБ мазкур транспорт воситасига бириктирилади. ЙҲХХ ҳудудий бўлинмалари ариза берувчи томонидан тақдим этилган тасдиқнома асосида белгиланган тартибда РЎДРБни тайёрлаб беради.

12. Танланган ва ягона оширилган тўлов амалга оширилган РЎДРБ қуйидаги муддатларда ишлаб чиқарилади ва ариза берувчининг транспорт воситаси расмийлаштириладиган ЙҲХХ ҳудудий бўлинмаларига етказиб берилади:

I, IE, III, IIIE типидаги давлат рақами белгилари — 30 дақиқада;

X, XI, XIE, XI¹, XIE¹, XI², XI³ типидаги давлат рақами белгилари — 14 иш куни мобайнида.

Бу ҳақда ариза берувчига электрон хабар юборилади.

13. Ягона оширилган тўлов эвазига олинган РЎДРБни ариза берувчининг транспорт воситасига бириктириш ва расмийлаштириш қонунчиликда белгиланган умумий тартибда ЙҲХХ ҳудудий бўлинмалари томонидан амалга оширилади.

14. Исталган ҳарф ва рақамлар комбинациясига эга бўлган РЎДРБ транспорт воситаси эгасига муайян транспорт воситасига бириктириш учун берилади, лекин мазкур РЎДРБ транспорт воситаси эгасининг мулки ҳисобланмайди. РЎДРБ белгиланган тартибда фақат белгиланган транспорт воситасига тегишли ҳуқуқий мақсадларда фойдаланиш учун тақдим этилади.

15. Транспорт воситаси бошқа шахсга ўтказилганда (сотилганда) ёки белгиланган тартибда қайта рўйхатдан ўтказилганда, транспорт воситасининг аввалги эгаси исталган ҳарф ва рақамлар комбинациясига эга бўлган РЎДРБни ўзида сақлаб қолиш ҳуқуқига эга бўлади.

Бунда аввалги эгаси транспорт воситасини бегоналаштириш (рўйхатдан чиқариш) санасидан эътиборан уч ой мобайнида ЙҲХХ ҳудудий бўлинмасига мурожаат этиб, РЎДРБни сақлаб қолиш бўйича ариза тақдим этади ва ягона оширилган тўловнинг 50 фоизи миқдорида тўловни амалга оширади.

16. Аввалги эгаси томонидан уч ой ичида тегишли тартибда ариза берилмаганда ёки ягона оширилган тўловнинг 50 фоизи миқдорида тўлов тўланмаганда, РЎДРБни сақлаб қолиш ҳуқуқи бекор қилинади. Бунда мазкур рақам комбинацияси қайтадан умумий очиқ базага қайтарилади ва бошқа шахслар томонидан танлаш учун мавжуд бўлади.

17. ЙҲХХ оширилган тўлов эвазига бериладиган РЎДРБни автоматлаштирилган ахборот тизими орқали электрон тартибда танланишини ҳамда тизимнинг узлуксиз ва шаффоф ишлашини таъминлайди, очиқ маълумотлар базасининг доимий янгиланиб боришини назорат қилади.

18. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар».

2. Вазирлар Маҳкамасининг «Атмосфера ҳавосига транспорт воситаларининг салбий таъсирини камайтириш бўйича чора-тадбирлар тўғрисида» 2024 йил 29 мартдаги 166-сон қарорида:

а) 1-бандда:

«а» кичик бандда:

биринчи хатбошидаги «2025 йил 1 мартдан» сўзлари «2026 йил 1 январдан» сўзлари билан алмаштирилсин;

иккинчи ва учинчи хатбошилар қуйидаги таҳрирда баён этилсин:

«ҳудудларни улардаги атмосфера ҳавоси билан боғлиқ реал экологик ҳолатдан келиб чиқиб, илғор хорижий тажриба ва инновацион технологиялар асосида экологик зоналарга (кейинги ўринларда — экологик зоналар) ажратиб бориш;

транспорт воситаларининг нормативларга мослиги даражасини уларнинг ишлаб чиқарувчи томонидан белгиланган экологик синфига мансублигига («Евро») кўра автоматик баҳолаш тизими ёрдамида қалбакилаштиришдан ҳимояланган ҳамда электрон белгига эга бўлган экологик стикерлар бериш орқали транспорт воситаларини «яшил», «сариқ» ва «қизил» ранглар билан белгиланадиган «тоза», «ўрта» ва «зарарли» экологик тоифаларга ажратиб бориш»;

«б» кичик банд қуйидаги таҳрирда баён этилсин:

«б) «Экологик транспорт» тизимини қуйидаги босқичларда жорий этиш:

биринчи босқичда (2025 — 2027 йилларда) — Тошкент шаҳрида;

иккинчи босқичда (2028 — 2030 йилларда) — Нукус шаҳри ва вилоятлар марказларида ҳамда, заруратга кўра, алоҳида экологик зоналарда (сайёҳлик маркази, табиат қўриқхонаси, соғломлаштириш ҳамда дам олиш масканлари ва бошқалар);

учинчи босқичда (2031 — 2034 йилларда) — бошқа барча ҳудудларда»;

б) 2-бандда:

«а» кичик банддаги «2025 йил 1 мартдан» сўзлари «2026 йил 1 январдан» сўзлари билан алмаштирилсин;

«б» кичик бандда:

иккинчи хатбошидаги «2027» рақами «2028» рақами билан алмаштирилсин;

учинчи хатбошидаги «2029» рақами «2031» рақами билан алмаштирилсин;

тўртинчи хатбошидаги «2031» рақами «2035» рақами билан алмаштирилсин;

«г» кичик банд қуйидаги таҳрирда баён этилсин:

«г) ишлаб чиқарилганига уч йилдан ошмаган транспорт воситаларига уларнинг эгалари томонидан онлайн ахборот тизимлари орқали юборилган мурожаатлар асосида реал вақт режимида «яшил» экологик тоифасига мансуб экологик стикерлар мазкур хизматлар учун алоҳида тўлов ундирилмасдан диагностика текширувисиз берилади ва почта орқали юборилади»;

в) 3-банднинг учинчи хатбошиси қуйидаги таҳрирда баён этилсин:

«экологик синфга мансублигини («Евро») аниқлаш имкони бўлмаган транспорт воситаларининг нормативларга мослиги Ўзбекистон Республикаси Ички ишлар вазирлигининг «Инновация лойиҳалари ва аҳолига сервис хизматлари кўрсатиш маркази» давлат унитар корхонаси томонидан диагностика текширувидан ўтказилади ва аниқланади».