Ҳужжат 18.01.2023 00 санаси ҳолатига
Амалдаги версияга ўтиш
Ўзбекистон Республикаси Президентининг
Фармони
Одил судлов фаолиятини амалга оширишни самарали ташкил этиш бўйича қўшимча чора-тадбирлар тўғрисида
Ўзбекистон Республикаси Президентининг 2023 йил 16 январдаги «Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида»ги ПФ-11-сон Фармони ижросини самарали таъминлаш мақсадида:
1. Бош прокурор (Н. Йўлдошев):
Рақамли технологиялар вазирлиги билан биргаликда бюджетдан ташқари маблағлар ҳисобидан Одил судловни амалга оширишга кўмаклашиш бўйича ихтисослашган прокурорлар корпуси (кейинги ўринларда — Ихтисослашган прокурорлар корпуси) фаолиятида 2023 йил 1 сентябрга қадар «Судларда прокурор иштироки» ахборот тизимини яратиб, дастлаб синов тарзида ишга туширсин ҳамда 2024 йилдан амалиётга тўлиқ жорий этсин;
Олий суд билан биргаликда 2023 йил 1 июлдан Бош прокуратура ва Олий суд ахборот тизимларини интеграция қилиш йўли билан ўзаро ҳужжат алмашинувини тўлиқ йўлга қўйсин.
2. Ўзбекистон Республикаси Олий судининг эмблемаси намунаси 1-иловага мувофиқ тасдиқлансин.
Белгилансинки, эмблемани тайёрлаш ва сақлаш ҳамда ундан фойдаланиш тартиби Олий суд раиси томонидан тасдиқланади.
3. Одил судлов фаолиятини амалга ошириш учун жалб этилган ресурслардан самарали фойдаланилишини таъминлаш мақсадида Олий суд Судьялар олий кенгаши, Бош прокуратура ва Адлия вазирлиги билан биргаликда икки ой муддатда:
илғор хорижий тажрибадан келиб чиққан ҳолда айрим тоифадаги фуқаролик, иқтисодий ва маъмурий ҳуқуқбузарлик тўғрисидаги ишларни кўриш ваколатини тегишлилиги бўйича маъмурий органларга ўтказиш;
айрим тоифадаги жиноят, фуқаролик, иқтисодий ва маъмурий ҳуқуқбузарлик тўғрисидаги ишларни қуйи инстанция судларининг ўзида якунлаш тартибини белгилаш;
фуқаролик ва иқтисодий ишлар бўйича тарафларни келиштириш ва медиация институтини кенг жорий этиш бўйича асослантирилган таклифларни ишлаб чиқсин ва белгиланган тартибда Ўзбекистон Республикаси Президенти Администрациясига киритилишини таъминласин.
Олий суд Судьялар олий кенгаши ҳамда Иқтисодиёт ва молия вазирлиги билан биргаликда 2023 йил 1 июлга қадар ушбу бандда назарда тутилган янги механизмлар жорий этилиши натижасида иш юкламаси мақбуллаштирилган судларнинг штат бирликларини самарали тақсимлаш бўйича асослантирилган таклифларни Ўзбекистон Республикаси Президенти Администрациясига киритилишини таъминласин.
4. Бош прокурор (Н. Йўлдошев) Иқтисодиёт ва молия вазирлиги билан биргаликда икки ой муддатда илғор хорижий тажрибани ҳамда судларда кўриладиган иш ҳажмини инобатга олиб, айрим йўналишларда прокурор назоратини қисқартириш, шунингдек, Бош прокуратура ҳузуридаги ташкилотлар штат бирликларини мақбуллаштириш ҳисобидан Ихтисослашган прокурорлар корпуси штат бирликлари сонини кўпайтириш бўйича таклифларни Ўзбекистон Республикаси Президенти Администрациясига киритсин.
5. Ихтисослашган прокурорлар корпуси ходимлари ўз фаолиятини самарали амалга оширишлари учун Олий суд (Б. Исламов) суд биноларида алоҳида хизмат хоналари ажратилишини, Бош прокурор (Н. Йўлдошев) мазкур хоналарнинг жиҳозланишини таъминлаш чораларини кўрсин.
6. Рақамли технологиялар вазирлиги (Ш. Шерматов):
доимий равишда суд ҳокимияти органлари фаолиятини рақамлаштириш бўйича белгиланган вазифаларнинг ўз вақтида ва сифатли ижро этилишига кўмаклашиб борсин;
Олий суд (Б. Исламов) билан биргаликда ҳар чоракда Ўзбекистон Республикаси Президентининг 2020 йил 3 сентябрдаги «Суд ҳокимияти органлари фаолиятини рақамлаштириш чора-тадбирлари тўғрисида»ги ПҚ-4818-сон қарори ижросини мониторинг қилсин.
7. Ўзбекистон Республикаси Президентининг айрим ҳужжатларига 2-иловага мувофиқ ўзгартиш ва қўшимчалар киритилсин.
8. Олий суд манфаатдор идоралар билан биргаликда уч ой муддатда қонун ҳужжатларига ушбу Фармондан келиб чиқадиган ўзгартиш ва қўшимчалар тўғрисида таклифлар киритсин.
9. Мазкур Фармон ижросини самарали ташкил қилишга масъул ва шахсий жавобгар этиб Олий суд раиси Б. Исламов ҳамда Бош прокурор Н. Йўлдошев белгилансин.
Фармон ижросини назорат қилиш ва ижро учун масъул ташкилотлар фаолиятини мувофиқлаштириш Ўзбекистон Республикаси Президенти Администрацияси раҳбари С.У. Умурзаков зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2023 йил 16 январь,
ПФ-12-сон
Ўзбекистон Республикаси Президентининг 2023 йил 16 январдаги ПФ-12-сон Фармонига
1-ИЛОВА
Ўзбекистон Республикаси Олий судининг эмблемаси
ТАВСИФИ
Ўзбекистон Республикаси Олий судининг эмблемаси (кейинги ўринларда — эмблема) қуйидаги кўринишга эга: унинг марказида Ўзбекистон Республикаси харитаси, адолат тарозиси, китоб тасвирланган бўлиб, ўнг ва чап томонларида судьяларнинг махсус кийимидаги нишон рамзлари ва нақшлари акс эттирилган. Эмблема саккизбурчак шаклда бўлиб, ички қисми эса доирасимон шаклда тасвирланган. Доиранинг устки қисмида айланаси бўйлаб «OʻZBEKISTON RESPUBLIKASI» сўзлари, пастки қисмида айланаси бўйлаб «OLIY SUDI» сўзлари ёзилган. Ёзувлар нишонлар ва нақш безаклари билан ажратилган.
Эмблема донолик, улуғворлик ва юксакликни ифода этувчи олтин, оқ, тўқ кўк, оч яшил ва оч кўк ранглар кўринишида акс эттирилган. Саккизбурчак, доиранинг нақшлари, ундаги сўзлар, адолат тарозиси — олтин рангида, китоб — олтин зарҳал билан ҳошияланган ҳолда оқ рангда, Ўзбекистон Республикаси харитаси оч яшил ва оч кўк рангда, доиранинг ички қисми олтин зарҳал билан ҳошияланган ҳолда оч яшил ва оч кўк рангда, доиранинг айлана ён қисмлари — олтин зарҳал билан ҳошияланган ҳолда тўқ кўк рангда тасвирланган.
Доиранинг марказидаги харита — Ўзбекистон Республикасини ҳудудини англатади. Марказдаги тарози одиллик мезонини англатиб турувчи рамз маъносида, китоб эса, судьялар одил судловни фақат Конституция ва қонунларга қатъий риоя қилган ҳолда амалга оширишини ифодалайди. Доиранинг икки ён четининг ўртасида судьяларнинг махсус кийимида акс эттирилган нишон рамзи туширилган. Нишон — Ўзбекистон Республикаси гербида тасвирланган саккизбурчак билан бойитилган доирадан иборат. Икки томон нишоннинг орқа ва пастки қисмларида миллийликни ифодаловчи айланаси бўйлаб нақш безаклари тасвирланган.
Ўзбекистон Республикаси Президентининг 2023 йил 16 январдаги ПФ-12-сон Фармонига
2-ИЛОВА
Ўзбекистон Республикаси Президентининг айрим ҳужжатларига киритилаётган ўзгартириш ва қўшимчалар
1. Ўзбекистон Республикаси Президентининг 2017 йил 21 февралдаги «Ўзбекистон Республикаси суд тизими тузилмасини тубдан такомиллаштириш ва фаолияти самарадорлигини ошириш чора-тадбирлари тўғрисида»ги ПФ-4966-сон Фармони 9-бандида:
а) учинчи хатбошидаги «200» рақами «208» рақами билан алмаштирилсин;
б) бешинчи хатбошидаги «216» рақами «207» рақами билан алмаштирилсин.
2. Ўзбекистон Республикаси Президентининг 2020 йил 24 июлдаги «Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида»ги ПФ-6034-сон Фармонида:
а) 4-банд «а» кичик бандининг учинчи ва тўртинчи хатбошилари қуйидаги таҳрирда баён этилсин:
«Одил судлов соҳасидаги қонунчиликни таҳлил қилиш департаменти;
Жамоатчилик билан ҳамкорлик маркази»;
б) 5-банднинг иккинчи хатбошисидаги «Суд-ҳуқуқ соҳасидаги қонунчиликни таҳлил қилиш бошқармасини» сўзлари «Одил судлов соҳасидаги қонунчиликни таҳлил қилиш департаментини» сўзлари билан алмаштирилсин;
в) 6-банднинг биринчи хатбошиси «аппарати раҳбари,» сўзларидан кейин «Департамент директори ва» сўзлари билан тўлдирилсин;
г) 1-илова қуйидаги таҳрирда баён этилсин:
«Ўзбекистон Республикаси Президентининг 2020 йил 24 июлдаги ПФ-6034-сон Фармонига
1-ИЛОВА
Ўзбекистон Республикаси Олий судининг
ТУЗИЛМАСИ

Раис

Раис котибияти

(маслаҳатчи, бош консультант, катта консультант)

3

Раиснинг биринчи ўринбосари — маъмурий ишлар бўйича судлов ҳайъати раиси

Раис ўринбосари — фуқаролик ишлари бўйича судлов ҳайъати раиси

Раис ўринбосари — жиноят ишлари бўйича судлов ҳайъати раиси

Раис ўринбосари — иқтисодий ишлар бўйича судлов ҳайъати раиси

Пленум котиби

Одил судлов соҳасидаги қонунчиликни таҳлил қилиш департаменти

16

Маъмурий ишлар бўйича судлов ҳайъати

12

Фуқаролик ишлари бўйича судлов ҳайъати

20

Жиноят ишлари бўйича судлов ҳайъати

22

Иқтисодий ишлар бўйича судлов ҳайъати

14

Олий суд ҳузуридаги Судлар фаолиятини таъминлаш департаменти ва унинг ҳудудий бўлимлари

68

Ҳайъат котибияти

6

Ҳайъат котибияти

12

Ҳайъат котибияти

15

Ҳайъат котибияти

7

«Ўзбекистон Республикаси Олий суди Ахборотномаси» ҳамда «Куч адолатда» газетасининг бирлашган таҳририяти

Ижро аппарати

Аппарат раҳбари

Кадрлар бошқармаси

10

Мурожаатлар билан ишлаш бошқармаси

14

Ахборот-коммуникация технологияларини жорий қилиш ва ахборот хавфсизлигини таъминлаш бошқармаси

10

Жамоатчилик билан ҳамкорлик маркази

6

Биринчи бўлим

1

Ишлар бошқармаси

11

Ташкилий-назорат бошқармаси

15

Бухгалтерия

4

Халқаро-ҳуқуқий бўлим

4

Жами бошқарув ходимлари штат бирликлари сони — 208 та, шу жумладан судьялар — 73 та.
Изоҳ: ёрдамчи ходимлар штат бирликлари сони ўрнатилган меъёрларга мувофиқ аниқланади.»;
д) 3-иловадаги «216» рақами «207» рақами билан алмаштирилсин.
3. Ўзбекистон Республикаси Президентининг 2021 йил 13 январдаги «Суд органлари фаолиятини молиялаштириш тизимини тубдан такомиллаштириш чора-тадбирлари тўғрисида»ги ПФ-6134-сон Фармонига 3-илованинг «Лавозимлар номи» устунида:
а) «Суд аппарати раҳбари» сўзларидан кейин «, Департамент директори» сўзлари билан тўлдирилсин;
б) «Бошқарма бошлиғи» сўзларидан кейин «, Департамент директорининг ўринбосари» сўзлари билан тўлдирилсин.

(Қонунчилик маълумотлари миллий базаси, 18.01.2023 й., 06/23/12/0034-сон)