Ҳужжат кучини йўқотган " " 22.02.2021
Ҳужжат 25.04.1997 00 санаси ҳолатига
Амалдаги версияга ўтиш
Ўзбекистон Республикаси Вазирлар Маҳкамасининг
қарори
БОЗОР ИҚТИСОДИЁТИ ШАРОИТЛАРИДА АҲОЛИГА КОММУНАЛ ХИЗМАТ КЎРСАТИШНИ ТАКОМИЛЛАШТИРИШ ЧОРА-ТАДБИРЛАРИ ТЎғРИСИДА
[Кўчирма]
 LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Вазирлар Маҳкамаси қайд этадики, аҳолининг фаровонлигини ошириш йўлига мувофиқ республикада уй-жой-коммунал хўжалигининг моддий базасини ривожлантириш, аҳолини унинг хизматлари билан ўз вақтида ва сифатли таъминлаш учун қулай шароитлар яратиш бўйича муайян ишлар қилинган.
Шу билан бирга, ушбу соҳадаги иқтисодий ислоҳотлар суст суръатлар билан бормоқда, бозор иқтисодиёти шароитларида унинг фаолият кўрсатиши учун зарур шароитлар яратилмаган, муқобил коммунал корхоналар ташкил этилмаган, кўрсатилаётган хизматларга нарх белгилаш тизимини такомиллаштиришга муҳтож, хизматлар сифати эса аҳолининг ҳақли эътирозларига сабаб бўлмоқда.
Коммунал хизмат кўрсатиш ходимлари меҳнатига ҳақ тўлаш ва рағбатлантириш билан боғлиқ масалалар мутлақо ҳал этилмаган.
Самарали ижтимоий сиёсат изчил амалга оширилишини таъминлаш, бозор иқтисодиёти шароитларида уй-жой-коммунал тармоғи фаолиятини такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Коммунал хизмат кўрсатиш вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг уй-жой-коммунал тармоғида бозор муносабатларини шакллантиришга доир ишлари қониқарсиз деб ҳисоблансин.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ҳамда «Давархитектқурилиш» қўмитаси жойлардаги органларининг турар-жойлар ва ижтимоий-маданий аҳамиятга эга бўлган объектларни ичимлик сувни, газни ҳисобга олиш приборлари ўрнатилган ҳолда фойдаланишга қабул қилиш борасидаги иши қониқарсиз эканлиги қайд этилсин ҳамда белгиланган тартиб бузилганлиги учун раҳбарлар шахсан жавобгар эканликлари тўғрисида огоҳлантирилсин.
2. Бозор иқтисодиёти шароитларида коммунал хизмат кўрсатишни такомиллаштириш бўйича республика комиссияси иловага* мувофиқ таркибда тузилсин.
* Илова берилмайди.
Қуйидагилар комиссиянинг асосий вазифалари этиб белгилансин:
республика аҳолисига коммунал хизматлар сифатли ва ўз вақтида кўрсатилишини таъминлаш, мулкчиликнинг турли шаклларидаги коммунал корхоналар фаолият кўрсатиши тузилмасини такомиллаштириш, бозор иқтисодиёти шароитларида улар ходимларининг меҳнатини ташкил этиш ва рағбатлантириш бўйича таклифлар тайёрлаш;
коммунал тармоқни давлат тасарруфидан чиқариш ва хусусийлаштириш, аҳолига коммунал хизматлар кўрсатиш юзасидан шартнома муносабатларини ривожлантириш, маблағ билан таъминлаш ва бу соҳада нарх белгилашни такомиллаштириш бўйича ишларни ташкил этиш;
фуқароларнинг айрим тоифаларига имтиёзли коммунал хизмат кўрсатиш тизимини тартибга солиш;
коммунал тармоқда ўтказилаётган ислоҳотларнинг мақсадлари ва вазифалари, уй-жой фондидан фойдаланиш ҳуқуқларини рўёбга чиқариш ва уни сақлашда яшовчиларнинг фаол қатнашиши тўғрисида аҳоли ўртасида кенг тушунтириш ишлари олиб бориш.
Кейинги таҳрирга қаранг.
3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Ўзбекистон Республикаси Коммунал хизмат кўрсатиш вазирлиги билан биргаликда 1997 йил давомида уй-жой фондига хизмат кўрсатиш ва уни тузатиш тизимини такомиллаштириш чора-тадбирларини амалга оширсинлар, бунда уй-жойлардан фойдаланиш ташкилотлари таркибида уй-жой фондини сақлаш ва тузатиш ҳамда аҳолига тегишли хизматлар кўрсатиш бўйича тузатиш-фойдаланиш бўлинмалари ташкил этилган ҳолда ушбу ташкилотларни хўжалик ҳисобига ўтказишни назарда тутсинлар.
4. Ўзбекистон Республикаси Коммунал хизмат кўрсатиш вазирлиги Меҳнат вазирлиги ва Молия вазирлиги билан биргаликда уй-жой-коммунал хўжалигига хизмат кўрсатиш бўйича нормативларни, жорий йилнинг охиригача тармоқни ушбу нормативлар бўйича меҳнатга ҳақ тўлашга босқичма-босқич ўтказишни назарда тутган ҳолда, ишлаб чиқсин ва тасдиқласин. Бунда коммунал хизмат кўрсатиш айрим хизматлари ходимларини меҳнатга ҳақ тўлашнинг вақтбай шаклидан ишбай шаклига ўтказишни назарда тутсин.
Тошкент шаҳар ҳокимлиги Ўзбекистон Республикаси Коммунал хизмат кўрсатиш вазирлиги билан биргаликда бир нечта уйларга хизмат кўрсатишнинг оилавий, бригада пудратини эксперимент тариқасида жорий этсин.
5. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари уй-жой-коммунал хизматларига тарифларни тасдиқлашда харажатлар таркиби бўйича мавжуд норматив-услубий ҳужжатларга қатъий амал қилсинлар, бунда харажатларни изчил қисқартиришни назарда тутсин.
Ўзбекистон Республикаси Молия вазирлиги ҳузуридаги Монополиядан чиқариш ва рақобатни ривожлантириш қўмитаси тармоқнинг хусусиятини ҳисобга олган ҳолда коммунал хизматларга тарифлар белгилашнинг асосланганлигини мунтазам назорат қилсин. Тарифларни шакллантириш ва қўллаш тартиби бузилиши ҳоллари аниқланган тақдирда айбдорларга нисбатан монополияга қарши қонунчиликда назарда тутилган жазо чораларини қўлласин.
Кейинги таҳрирга қаранг.
6. Тошкент шаҳар ҳокимлиги, Ўзбекистон Республикаси Коммунал хизмат кўрсатиш вазирлиги:
1997 йилда Тошкент шаҳрида иккита уйни автоном равишда иссиқлик билан таъминлаш юзасидан эксперимент ўтказсинлар. Эксперимент натижаларини таҳлил қилиш асосида уйлар (хонадонлар)ни иссиқлик билан таъминлашнинг амалдаги тизимини янада такомиллаштириш юзасидан Вазирлар Маҳкамасига таклифлар киритсинлар;
Тошкент шаҳрининг фаолият кўрсатаётган корхоналари негизида чет эл фирмаларини жалб этган ҳолда сув, газ, иссиқлик энергиясини ҳисобга олиш приборларини тайёрлаш, пластмасса трубалар ишлаб чиқариш бўйича корхоналар ташкил этсинлар.
7. Бозор иқтисодиёти шароитларида коммунал хизмат кўрсатишни такомиллаштириш республика комиссияси Аҳолига коммунал хизмат кўрсатиш тизимида иқтисодий ислоҳотларни чуқурлаштириш концепсиясини икки ой муддатда ишлаб чиқсин ва тасдиқлаш учун Вазирлар Маҳкамасига киритсин. Унда қуйидагилар назарда тутилсин:
коммунал хизмат кўрсатишнинг амалдаги тизимини босқичма-босқич қайта ташкил этиш, бошқарув тузилмасини соддалаштириш коммунал корхоналарнинг ўз функцияларига кирувчи вазифаларни ҳал этишда иқтисодий мустақиллигини ва жавобгарлигини ошириш;
аҳоли билан тармоқ корхоналари ва ташкилотлари ўзаро муносабатларининг иқтисодий шаклларига ўтишни таъминловчи коммунал-хизмат кўрсатишнинг норматив-ҳуқуқий базасини такомиллаштириш;
фуқаролар қулай яшашлари учун зарур шарт-шароитлар яратиш, кўрсатилаётган хизматлар сифатини тегишли даражада сақлаб турган ҳолда чиқимлар ва тарифларни камайтириш;
мулкчиликнинг турли шаклларидаги пудратчи тузатиш-фойдаланиш хизматларини танлов йўли билан танлаб олиш, аҳолига коммунал хизмати кўрсатиш бўйича муқобил корхоналарни ривожлантириш асосида коммунал хизматлар кўрсатишда рақобат муҳитини шакллантириш.
Кейинги таҳрирга қаранг.
8. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Ҳ. Жўрабеков зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1997 йил 25 апрель,
211-сон