7. «Навоий» ЭИЗ иштирокчиси мақомини олган Навоий вилоятидаги корхоналарга Ўзбекистон Республикаси Солиқ кодекси ва Ўзбекистон Республикасининг «Махсус иқтисодий зоналар тўғрисида»ги Қонунида белгиланган тартибда алоҳида солиқлар, шунингдек, божхона тўловлари бўйича имтиёзларни қўллашнинг ўзига хос хусусиятлари назарда тутилади.

(7-банд Ўзбекистон Республикаси Президентининг 2020 йил 19 июндаги ПФ-6011-сонли Фармони таҳририда — Қонун ҳужжатлари маълумотлари миллий базаси, 19.06.2020 й., 06/20/6011/0780-сон — 2020 йил 1 октябрдан кучга киради)

8. Маълумот учун қабул қилинсинки:

а) ушбу Фармоннинг 7-бандида назарда тутилган имтиёзлар киритилган инвестицияларнинг ҳажмига қараб 3 йилдан 10 йил муддатгача, шу жумладан эквиваленти:

300 минг АҚШ долларидан 3 миллион АҚШ долларигача ҳажмдаги инвестициялар — 3 йил муддатга;

3 миллион АҚШ долларидан 5 миллион АҚШ долларигача ҳажмдаги инвестициялар — 5 йил муддатга;

5 миллион АҚШ долларидан 10 миллион АҚШ долларигача ҳажмдаги инвестициялар — 7 йил муддатга;

Олдинги таҳрирга қаранг.

10 миллион АҚШ доллари ва ундан юқори ҳажмдаги инвестициялар — 10 йил муддатга берилади;

(8-банд «а» кичик бандининг бешинчи хатбошиси Ўзбекистон Республикаси Президентининг 2020 йил 19 июндаги ПФ-6011-сонли Фармони таҳририда — Қонун ҳужжатлари маълумотлари миллий базаси, 19.06.2020 й., 06/20/6011/0780-сон — 2020 йил 1 октябрдан кучга киради)

б) «Навоий» ЭИЗ иштирокчиси мақомини олган хўжалик юритувчи субъектларга экспорт ва импорт қилинадиган товарлар учун ҳақ тўлаш ва ҳисоб-китобларнинг ўзи учун қулай шарт ва шаклларидан фойдаланишига рухсат этилади;

Олдинги таҳрирга қаранг.

(8-банднинг «в» кичик банди Ўзбекистон Республикаси Президентининг 2020 йил 19 июндаги ПФ-6011-сонли Фармонига асосан 2020 йил 1 октябрдан чиқарилади — Қонун ҳужжатлари маълумотлари миллий базаси, 19.06.2020 й., 06/20/6011/0780-сон)

г) 2019 йил 1 июндан бошлаб хорижий инвестициялар иштирокидаги корхоналарнинг таъсисчилари — «Навоий» ЭИЗ қатнашчилари ва уларнинг оила аъзоларига республика ҳудудидан чиқмасдан узайтириш имконияти билан, амал қилиш муддати уч йилгача бўлган «инвестиция визаси» берилади.

9. Ўзбекистон Республикаси Давлат активларини бошқариш агентлиги Навоий вилояти ҳокимлиги билан биргаликда бир ой муддатда:

«Навоий» эркин иқтисодий зонаси дирекцияси» давлат унитар корхонасини «Навоий» эркин иқтисодий зонаси дирекцияси» акциядорлик жамиятига (кейинги ўринларда — «Навоий» ЭИЗ дирекцияси» АЖ) айлантирсин;

«Навоий» ЭИЗ дирекцияси» АЖ тузилмасида Экспортни қўллаб-қувватлаш марказини ташкил қилсин ҳамда «Навоий» ЭИЗ қатнашчиларига маслаҳат, воситачилик хизматларини кўрсатиш, уларнинг Ўзбекистон Республикаси ва хориждаги кўргазма ва ишбилармонлик тадбирларига иштирокини ташкил қилиш, иштирокчининг буюртмасига кўра тижорат асосида маркетинг тадқиқотларини ўтказиш орқали уларга маҳсулотлар экспортида кўмаклашиш Марказнинг асосий вазифаси ва фаолият йўналиши этиб белгилансин.

Олдинги таҳрирга қаранг.

(10-банд Ўзбекистон Республикаси Президентининг 2020 йил 19 июндаги ПФ-6011-сонли Фармонига асосан 2020 йил 1 октябрдан ўз кучини йўқотади — Қонун ҳужжатлари маълумотлари миллий базаси, 19.06.2020 й., 06/20/6011/0780-сон)

11. Белгилаб қўйилсинки:

«Навоий» ЭИЗ дирекцияси» АЖнинг дастлабки устав капитали қайта ташкил этилаётган «Навоий» эркин иқтисодий зонаси дирекцияси» ДУКнинг мулклари ҳисобига шакллантирилади;

«Навоий» ЭИЗ ҳудудида жойлашган муҳандислик-коммуникация тармоқларига хизмат кўрсатиш «Навоий» ЭИЗ дирекцияси» АЖ буюртманомаларига биноан вазирликлар ва идораларнинг тегишли ҳудудий бўлинмалари томонидан амалга оширилади;

«Навоий» ЭИЗ дирекцияси» АЖ «Навоий» эркин иқтисодий зонаси дирекцияси» ДУКнинг ҳуқуқлари ва мажбуриятлари бўйича вориси ҳисобланади;

«Навоий» ЭИЗ дирекцияси» АЖнинг устав капиталида давлат номидан акциядорлик функцияси Ўзбекистон Республикаси Давлат активларини бошқариш агентлиги томонидан амалга оширилади;

«Навоий» ЭИЗ ҳудудида бинолар қуриш «Навоий» ЭИЗ дирекцияси» АЖ томонидан ўз маблағлари ва/ёки хусусий инвесторлар маблағлари ҳисобига амалга оширилиши мумкин ҳамда кейинчалик ушбу бино ва иншоотлар тадбиркорлик субъектларига узоқ муддатли ижарага ёки сотиб олиш учун тақдим этилади;

«Навоий» ЭИЗ дирекцияси» АЖ ўзига берилган ваколатлар доирасида Навоий вилояти ҳудудида жойлашган давлат ихтиёридаги кўчмас мулк объектларини бошқаради ҳамда Навоий вилоятидаги Эркин иқтисодий ва кичик саноат зоналари маъмурий кенгаши билан келишган ҳолда Навоий вилояти ҳудудида инвестиция лойиҳаларини амалга ошириш учун умумий майдони 5000 метр квадратдан кўп бўлмаган, фойдаланилмаётган давлат мулки объектларини (Ўзбекистон Республикаси Президентининг 2017 йил 16 июндаги «Давлат мулки объектларини сотиш тартиб-таомилларини янада такомиллаштириш чора-тадбирлари тўғрисида»ги ПҚ-3067-сон қарорининг 1 ва 2-иловаларида кўрсатилган объектлардан ташқари) «Навоий» ЭИЗ иштирокчиларига тақдим этади;

Кейинги таҳрирга қаранг.

«Навоий» ЭИЗ иштирокчилари учун барча, шу жумладан лицензиялаш ва рухсатномалар олиш бўйича давлат хизматлари «Навоий» ЭИЗ дирекцияси» АЖ ва/ёки Ўзбекистон Республикаси Адлия вазирлиги ҳузуридаги Давлат хизматлари агентлиги томонидан «ягона дарча» тамойили асосида тақдим этилади.

Кейинги таҳрирга қаранг.

12. Қуйидагилар «Навоий» ЭИЗ дирекцияси» АЖ фаолиятини молиялаштириш манбалари этиб белгилансин:

ЭИЗ иштирокчиларини рўйхатдан ўтказганлик учун бир марталик тўловлар;

тасарруфида ва бошқарувида бўлган ер участкалари, бинолар ва иншоотларни ижарага беришдан тушган тушумлар;

«Навоий» ЭИЗ дирекцияси» АЖ томонидан кўрсатиладиган хизматлар, шу жумладан маркетинг, консалтинг, логистика, меҳмонхона, таълим ва кадрлар билан боғлиқ хизматларни реализация қилишдан тушган тушумлар;

мақсадли бюджет ажратмалари;

хорижий ва халқаро ташкилотларнинг грантлари;

жисмоний ва юридик шахсларнинг хайрия маблағлари;

қонун ҳужжатлари билан тақиқланмаган бошқа манбалар.

13. Ўзбекистон Республикаси Давлат активларини бошқариш агентлиги «Навоий» ЭИЗ дирекцияси» АЖ билан биргаликда:

а) белгиланган тартибда «Навоий» ЭИЗ дирекцияси» АЖнинг тузилмаси тасдиқланиши, таъсис ҳужжатлари, эмиссия рисоласининг рўйхатдан ўтказилиши, шунингдек, унинг органлари, шу жумладан янги ташкил этилаётган Экспортни қўллаб-қувватлаш марказини инобатга олган ҳолда шакллантирилишини;

б) икки ҳафта муддатда Ўзбекистон Республикаси Инвестициялар ва ташқи савдо вазирлиги билан биргаликда:

«Навоий» ЭИЗ ҳудудида янги корхоналарни жойлаштириш бўйича «Навоий» ЭИЗ дирекцияси» АЖ билан иштирокчилар ўртасида тузиладиган намунавий инвестиция келишуви;

«Навоий» ЭИЗ дирекцияси» АЖ томонидан «Навоий» ЭИЗ иштирокчиларига хизматлар кўрсатиш бўйича намунавий шартнома ишлаб чиқилиши ва тасдиқланишини таъминласин.

14. «Навоий» ЭИЗнинг ишлаб чиқариш, муҳандислик-коммуникация ва транспорт инфратузилмасини ривожлантириш бўйича чора-тадбирлар режаси 2-иловага мувофиқ тасдиқлансин.

15. Ўзбекистон Республикаси Инвестициялар ва ташқи савдо вазирлиги Молия вазирлиги, Иқтисодиёт ва саноат вазирлиги ҳамда бошқа манфаатдор вазирликлар ва идоралар билан биргаликда ҳар йили Ўзбекистон Республикасини ривожлантириш давлат дастурларини келгуси йил учун шакллантиришда «Навоий» ЭИЗнинг транспорт ва муҳандислик-коммуникация инфратузилмасини ривожлантириш учун марказлаштирилган молиялаштириш манбалари ҳисобидан капитал қўйилмалар лимитларини назарда тутсин.

16. Навоий вилояти ҳокимлиги:

Ўзбекистон Республикаси Ер ресурслари, геодезия, картография ва давлат кадастри давлат қўмитаси, Қурилиш вазирлиги, Давлат активларини бошқариш агентлиги билан биргаликда 2019 йил 1 июнга қадар инвестиция лойиҳаларини амалга ошириш мақсадида Навоий вилоятидаги қишлоқ хўжалигига мўлжалланмаган фойдаланилмаётган ер участкалари, фойдаланилмаётган ва бўш турган давлат мулки объектларини хатловдан ўтказсин;

Ўзбекистон Республикаси Иқтисодиёт ва саноат вазирлиги, Инвестициялар ва ташқи савдо вазирлиги, Уй-жой коммунал хизмат кўрсатиш вазирлиги, Энергетика вазирлиги, Транспорт вазирлиги ва Молия вазирлиги билан биргаликда 2019 йил 1 сентябрга қадар Навоий вилоятидаги ҳар бир туман марказлари, йирик аҳоли пунктларининг транспорт тизими ва муҳандислик-коммуникация инфратузилмасини янада ривожлантириш бўйича чора-тадбирлар дастурини Вазирлар Маҳкамасига киритсин.

17. Ўзбекистон Республикаси Инновацион ривожланиш вазирлиги Инвестициялар ва ташқи савдо вазирлиги билан биргаликда икки ой муддатда:

а) 2019 — 2021 йилларда Навоий вилоятида инновацион фаолиятни ривожлантириш дастурини ишлаб чиқсин ва тасдиқлаш учун Ўзбекистон Республикаси Вазирлар Маҳкамасига киритсин;

б) 2019–2020 йилларда Навоий вилояти ҳудудида амалга оширилиши таклиф этилаётган инновацион ва юқори технологияли лойиҳалар рўйхатини ишлаб чиқсин ва тасдиқлаш учун Ўзбекистон Республикаси Вазирлар Маҳкамасига киритсин;

в) Олий ва ўрта махсус таълим вазирлиги, «Навоий кон-металлургия комбинати» давлат корхонаси билан биргаликда Навоий вилоятида Инновацион технологияларни жорий этиш маркази фаолиятини ташкил этиш бўйича Ўзбекистон Республикаси Вазирлар Маҳкамасига таклиф киритсин, қуйидагилар ушбу марказнинг асосий вазифалари этиб белгилансин:

халқаро даражада патентлаш имкониятига эга бўлган илмий ҳажмдор ва илғор технологияли ишланмаларни яратиш, янги инновацион маҳсулотларнинг намуналарини моделлаштириш, макетлаштириш, тайёрлашда иштирок этиш ва замонавий лаборатория ускуналаридан фойдаланган ҳолда уларни синовдан ўтказиш;

юқори технологияли инновацион ишлаб чиқаришларни ташкил қилиш учун янги истиқболли ғоялар ва инновацион илмий ҳажмдор ишланмаларни шакллантириш ҳамда илмий фаолият натижаларини ишлаб чиқаришга татбиқ этиш;

ҳудудда инновацион экотизим, шу жумладан бизнес акселераторлар, стартаплар ва кичик инновацион корхоналарни ташкил этиш;

ҳамкорликда илмий тадқиқотларни бажариш учун академик, олий таълим ва тармоқ фанлари билан самарали ҳамкорликни таъминлаш.

18. Ўзбекистон Республикаси Ташқи ишлар вазирлиги:

«Навоий» ЭИЗ дирекцияси» АЖ буюртманомаларига биноан «Навоий» ЭИЗ иштирокчилари бўлган корхоналарнинг хорижий ходимларига ҳамда уларнинг оила аъзоларига кириш, шу жумладан кўп марталик визаларни консуллик ва бошқа йиғимларни ундирмасдан белгиланган тартибда расмийлаштиришни таъминласин;

Ўзбекистон Республикасининг хориждаги дипломатик ваколатхоналари билан биргаликда салоҳиятли хорижий инвесторларни жалб қилиш учун яратилган шароитлар ва имкониятлар, ҳудуднинг ва мавжуд минерал-хом ашё ресурслар салоҳиятини халқаро ишбилармон доираларда доимий равишда кенг ёритилишини (тақдимотини) таъминласин;

Ўзбекистон Республикаси Инвестициялар ва ташқи савдо вазирлиги, Ўзбекистон Миллий телерадиокомпанияси, Ўзбекистон Миллий ахборот агентлиги, «Дунё» ахборот агентлиги ва бошқа оммавий ахборот воситалари билан биргаликда мазкур Фармоннинг моҳияти ва мақсадларини хорижий ҳамкорлар ва инвесторларга етказиш чора-тадбирларини кўрсин.

Олдинги таҳрирга қаранг.

19. Ўзбекистон Республикаси Ички ишлар вазирлиги «Навоий» ЭИЗ дирекцияси» АЖнинг буюртманомаларига биноан «Навоий» ЭИЗ иштирокчилари бўлган корхоналарнинг хорижий ходимларига ҳамда уларнинг оила аъзоларига давлат божини ундирмасдан вақтинча турган жойи бўйича рўйхатга олиш ва унинг муддатини узайтиришни таъминласин.

(19-банд Ўзбекистон Республикаси Президентининг 2021 йил 26 январдаги ПФ-6146-сонли Фармони таҳририда — Қонун ҳужжатлари маълумотлари миллий базаси, 27.01.2021 й., 06/21/6146/0065-сон)

20. Вазирлар Маҳкамаси икки ҳафта муддатда эркин иқтисодий зоналар ҳудудида лойиҳаларни шакллантириш ва амалга оширишнинг барча жиҳатларини тартибга солувчи норматив-ҳуқуқий ҳужжатнинг ишлаб чиқилишини якунласин, унда қуйидагилар назарда тутилсин:

эркин иқтисодий зоналарнинг ихтисослашувини, инвестиция лойиҳаларини танлашнинг аниқ мезонларини белгилаш;

инвесторларни жалб қилиш учун эркин иқтисодий зоналарни муҳандислик-транспорт инфратузилмаси, ижтимоий-маиший ва маданий-жамоат объектлари билан таъминлаган ҳолда зарур шароитлар яратиш механизмларини;

эркин иқтисодий зоналарни бошқариш тизимини, шу жумладан дирекциялар фаолиятини ташкил этишнинг ягона стандартларини белгилаш, кўрсатилаётган хизматлар рўйхатини кенгайтириш ҳамда эркин иқтисодий зоналар дирекцияларини тадбиркорлик субъектларининг ишончли бошқарувига, шу жумладан хорижий компанияларга топшириш орқали такомиллаштириш.

21. Адлия вазирлиги, Инвестициялар ва ташқи савдо вазирлиги «Навоий» ЭИЗ дирекцияси» АЖ ва бошқа манфаатдор вазирлик ва идоралар билан биргаликда хорижий экспертларни жалб қилган ҳолда икки ой муддатда «Навоий» ЭИЗ» ҳудудида иш юритишда инглиз тилидан фойдаланиб, инглиз стандартлари, тамойиллари ва нормалари асосида «Навоий» ЭИЗ» иштирокчилари ўртасидаги муносабатларни тартибга солишни назарда тутувчи алоҳида ҳуқуқий режим ўрнатиш бўйича таклифлар киритсин.

22. Олий ва ўрта махсус таълим вазирлиги икки ой муддатда Навоий вилоятида саноат, инжиниринг, технологиялар ва IT дастурлашнинг устувор йўналишлари бўйича юқори малакали кадрлар тайёрлашга ихтисослаштирилган хорижий олий ўқув юрти филиалини ташкил қилиш бўйича Ўзбекистон Республикаси Вазирлар Маҳкамасига таклифлар киритсин.

23. Инвестициялар ва ташқи савдо вазирлиги Ташқи иқтисодий фаолият миллий банки, «Ўзсаноатқурилишбанк» АТБ ва Ўзбекистон Республикасининг бошқа тижорат банклари билан биргаликда икки ой муддатда «Навоий» ЭИЗ ҳудудида амалга ошириладиган инвестиция лойиҳаларини молиялаштириш учун халқаро молия институтлари ва хорижий ҳукумат молия ташкилотларининг 1 млрд АҚШ долларидан кам бўлмаган ҳажмдаги кредит линияларини босқичма-босқич жалб қилиш бўйича Вазирлар Маҳкамасига таклифлар киритсин.

24. Ўзбекистон Республикаси Президентининг айрим ҳужжатларига 3-иловага мувофиқ ўзгартириш ва қўшимчалар киритилсин.

25. Инвестициялар ва ташқи савдо вазирлиги бир ой муддатда қонун ҳужжатларига мазкур Фармондан келиб чиқадиган ўзгартиришлар ва қўшимчалар тўғрисида Ўзбекистон Республикаси Вазирлар Маҳкамасига таклифлар киритсин.

26. Мазкур Фармоннинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Бош вазирининг ўринбосари Э.М. Ғаниев зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2019 йил 15 май,

ПФ-5719-сон

Ўзбекистон Республикаси Президентининг 2019 йил 15 майдаги ПФ-5719-сон Фармонига
1-ИЛОВА

Навоий вилояти ҳудудида инновацион, юқори технологияларга асосланган, экспортга йўналтирилган ва импорт ўрнини босадиган ишлаб чиқаришлар учун эркин иқтисодий зона ташкил этиш бўйича комиссия

таркиби

Э.М. Ғаниев	—	Ўзбекистон Республикаси Бош вазири ўринбосари, Комиссия раиси
Ж.А. Қўчқоров	—	Ўзбекистон Республикаси Бош вазири ўринбосари — молия вазири
К.Б. Турсунов	—	Навоий вилояти ҳокими
С.Х. Бекенов	—	Ўзбекистон Республикаси инвестициялар ва ташқи савдо вазирининг биринчи ўринбосари
Р.А. Гулямов	—	Ўзбекистон Республикаси иқтисодиёт ва саноат вазирининг биринчи ўринбосари
Д.Ш. Султонов	—	Ўзбекистон Республикаси молия вазирининг ўринбосари
М.М. Мирзаев	—	Ўзбекистон Республикаси Давлат солиқ қўмитаси раисининг биринчи ўринбосари
А.Д. Асамов	—	Ўзбекистон Республикаси Давлат божхона қўмитаси раисининг биринчи ўринбосари
У.М. Исломов	—	Навоий вилояти ҳокимининг инвестициялар, инновациялар, саноатни, туризмни ривожлантириш ва хусусийлаштирилган корхоналарга кўмаклашиш масалалари бўйича ўринбосари, Комиссия котиби

Изоҳ: Комиссия аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли функцияларни бажариш юкланган шахслар киритилади.

Ўзбекистон Республикаси Президентининг 2019 йил 15 майдаги ПФ-5719-сон Фармонига
2-ИЛОВА

«Навоий» ЭИЗнинг ишлаб чиқариш, муҳандислик-коммуникация ва транспорт инфратузилмасини ривожлантириш бўйича

ЧОРА-ТАДБИРЛАР РЕЖАСИ

Т/р	Муҳандислик-коммуникация ёки ишлаб чиқариш инфратузилмаси тури	Эҳтиёж	Қиймат(млн. сўм)^*	Ижро муддати	Молиялаштириш манбалари	Масъул ижрочилар
Ўзбекистон Республикаси Президентининг 2018 йил 5 июндаги «Навоий» эркин иқтисодий зонаси фаолиятини кенгайтириш ва Навоий вилоятида кичик саноат зоналарини ташкил этиш чора-тадбирлари тўғрисида»ги ПҚ–3774-сон қарорига мувофиқ ЭИЗ таркибига киритилган объектлар
1.	Ички муҳандислик коммуникациялари(ичимлик суви)	8,5 км	1 500,0	2019 йил августгача	Сув таъминоти ва канализация тизимларини ривожлантириш жамғармаси	Уй-жой коммунал хизмат кўрсатиши вазирлиги
2.	Ички муҳандислик коммуникациялари(канализация)	8,5 км	2 300,0	2019 йил августгача	Сув таъминоти ва канализация тизимларини ривожлантириш жамғармаси	Уй-жой коммунал хизмат кўрсатиши вазирлиги
3.	Ички муҳандислик коммуникациялари (табиий газ)	3,7 км	2 330,0	2019 йил августгача	Маҳаллий бюджет маблағлари	Энергетика вазирлиги
4.	Ички муҳандислик коммуникациялари (электр энергияси)	6,8 км, 18 ТП	20 130,0	2020 йил мартгача	Маҳаллий бюджет маблағлари	Энергетика вазирлиги
5.	Ички автойўллар қопламаларини таъмирлаш	4500 м.кв	1 125,0	2020 йил ноябргача	Маҳаллий бюджет маблағлари	Навоий вилояти ҳокимлиги
*Кармана тумани ҳудудида*
1.	Ички автойўллар қуриш	17,5 км	35 000,0 гача	2019 йил декабргача	2019 йилга мўлжалланган Инвестиция дастури доирасида	Навоий вилояти ҳокимлиги
Моддий-техник базани мустаҳкамлаш бўйича комплекс чора-тадбирлар
1.	Моддий-техник базани мустаҳкамлаш		3 000,0	2019 йил июнгача	Маҳаллий бюджет маблағлари	Навоий вилояти ҳокимлиги
2.	IT-кластер учун ишлаб чиқариш биносини капитал таъмирлаш	5000 м.кв	1 500,0	2019 йил декабргача	Ўз маблағларива маҳаллий бюджет маблағлари	«Навоий» ЭИЗ дирекцияси, Навоий вилояти ҳокимлиги
3.	Ҳудудни кўкаламзорлаштириш ва обод қилиш		170,0	2019 йил сентябргача	Маҳаллий бюджет маблағлари	Навоий вилояти ҳокимлиги
4.	«Навоий» ЭИЗ дирекцияси» АЖ маъмурий биносини таъмирлаш		680,0	2019 йил июнгача	Ўз маблағлари	«Навоий» ЭИЗ дирекцияси
	Жами харажатлар:		67 735,0

* Изоҳ: Лойиҳаларнинг якуний параметрлари лойиҳаларнинг лойиҳа-смета ҳужжатларини тасдиқлаш ва белгиланган тартибда тендер савдолари ўтказиш натижалари бўйича аниқлаштирилиши лозим.

Ўзбекистон Республикаси Президентининг 2019 йил 15 майдаги ПФ–5719-сон Фармонига
3-ИЛОВА

Ўзбекистон Республикаси Президентининг айрим ҳужжатларига киритилаётган ўзгартириш ва қўшимчалар

1. Ўзбекистон Республикаси Президентининг 2016 йил 26 октябрдаги «Эркин иқтисодий зоналар фаолиятини фаоллаштириш ва кенгайтиришга доир қўшимча чора-тадбирлар тўғрисида»ги ПФ-4853-сон Фармонининг 3-бандида:

а) учинчи хатбоши қуйидаги таҳрирда баён этилсин:

«бўшаб қоладиган маблағларни янги корхоналарни ташкил этиш, шунингдек, мавжуд ишлаб чиқаришларни модернизациялаш, реконструкция қилиш ва техник, технологик қайта жиҳозлаш, кенгайтириш, ишлаб чиқариш биноларини қуриш, ўз ишлаб чиқариш эҳтиёжлари учун зарур хом ашё ва материаллар харид қилишга мақсадли йўналтирган ҳолда ўз ишлаб чиқариш эҳтиёжлари учун олиб кириладиган ускуналар, хом ашё, материаллар ҳамда бутловчи буюмларни, маҳсулот экспорт қилинганда вужудга келадиган қўшилган қиймат солиғининг манфий суммаси қайтарилмаслиги ҳуқуқи билан божхона тўловларидан (божхона расмийлаштируви йиғимларидан ташқари)»;

б) тўртинчи хатбошидаги «Ўзбекистон Республикаси Вазирлар Маҳкамаси томонидан тасдиқланадиган рўйхатлар бўйича» сўзлари «Ўзбекистон Республикаси Иқтисодиёт ва саноат вазирлиги ҳузуридаги «Лойиҳалар ва импорт контрактларини комплекс экспертиза қилиш маркази» ДУКнинг товарлар рўйхатини комплекс экспертиза қилиш натижалари бўйича ижобий хулосаси бўлган тақдирда» сўзлари билан алмаштирилсин;

2. Ўзбекистон Республикаси Президентининг 2018 йил 21 декабрдаги «Эркин иқтисодий зоналар фаолиятини мувофиқлаштириш ва бошқариш тизимини янада такомиллаштириш чора-тадбирлари тўғрисида» ПФ-5600-сон Фармони 1-банди учинчи хатбоши ўз кучини йўқотган деб ҳисоблансин.

(Қонун ҳужжатлари маълумотлари миллий базаси, 16.05.2019 й., 06/19/5719/3136-сон; 19.06.2020 й., 06/20/6011/0780-сон; 27.01.2021 й., 06/21/6146/0065-сон; Қонунчилик маълумотлари миллий базаси, 21.12.2021 й., 06/21/36/1175-сон, 21.04.2022 й., 06/22/113/0330-сон)