Ҳудудий газ таъминоти бошқармалари фаолиятига амалий раҳбарлик қилишни ва уларнинг молиявий барқарорлигини таъминлаш мақсадида ҳамда Вазирлар Маҳкамасининг 1993 йил 22 июлдаги 371-сон қарори билан тасдиқланган ҳудудий коммунал-фойдаланиш бирлашмасининг намунавий тузилмасига қисман ўзгартириш киритиш юзасидан Вазирлар Маҳкамаси қapop қилади:

1. Ўзбекистон Республикаси Коммунал хизмат кўрсатиш вазирлигига мавжуд Газ таъминоти ва газлаштириш бош бошқармаси негизида тугалланган балансли, алоҳида ҳисоб-китоб счётига ва юридик шахс мақомига эга бўлган Хўжалик ҳисобидаги газ таъминоти ва газлаштириш бош бошқармаси ташкил этишга рухсат берилсин.

2. Белгилаб қўйилсинки:

«Қорақалпоқгаз» республика бошқармаси, вилоятлар ва Тошкент шаҳар газ хўжалиги бошқармалари тугалланмаган балансли ташкилотлар ҳисобланади ва бевосита Ўзбекистон Республикаси Коммунал хизмат кўрсатиш вазирлигининг Хўжалик ҳисобидаги газ таъминоти ва газлаштириш бош бошқармасига ва тегишли равишда Қорақалпоғистон Республикаси Коммунал хизмат кўрсатиш вазирлигига, ҳудудий коммунал-фойдаланиш бирлашмаларига бўйсунади;

Хўжалик ҳисобидаги газ таъминоти ва газлаштириш бош бошқармаси молиявий ресурсларни қайта тақсимлаш мақсадида уларнинг марказлаштирилишини таъминлайди, шунингдек солиқлар ва бошқа тўловлар бўйича бюджет билан ҳисоб-китобларни марказлаштирилган тартибда амалга оширади.

3. Мазкур қарорнинг бажарилишини назорат қилиш Бош вазирнинг ўринбосари Р. Р. Юнусов зиммасига юклансин