Ҳужжат кучини йўқотган " " 22.02.2021
Ҳужжат 31.10.2001 00 санаси ҳолатига
Амалдаги версияга ўтиш
Ўзбекистон Республикаси Вазирлар Маҳкамасининг
қарори
ИЖТИМОИЙ АҲАМИЯТГА ЭГА БЎЛГАН ИСТЕЪМОЛ ТОВАРЛАРИ БИЛАН САВДО ҚИЛИШНИ ТАРТИБГА СОЛИШГА ДОИР ҚЎШИМЧА ЧОРА-ТАДБИРЛАР ТЎҒРИСИДА
 LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ижтимоий аҳамиятга эга бўлган айрим истеъмол товарлари нархларининг сунъий ошириб юборилишига йўл қўймаслик, шунингдек уларни республика ташқарисига ноқонуний олиб чиқиб кетиш ҳолларини бартараф этиш мақсадида Вазирлар Маҳкамаси қарор қилади:
1. Белгилансинки, 2001 йил 1 ноябрдан бошлаб четдан келтириладиган ва республикада ишлаб чиқариладиган ун, ўсимлик ёғи ва қанд-шакарни сотиш фақат юридик шахслар томонидан шартномавий нархлар бўйича, воситачилар сонидан қатъи назар, кўпи билан 25 фоиз миқдорида белгиланадиган чекланган савдо устамаси қўлланган ҳолда амалга оширилади.
Ўзбекистон Республикаси Молия вазирлиги Монополиядан чиқариш ва рақобатни ривожлантириш давлат қўмитаси, Давлат солиқ қўмитаси билан биргаликда савдо ташкилотлари томонидан ижтимоий аҳамиятга эга бўлган истеъмол товарларининг кўрсатиб ўтилган турларига чекланган савдо устамаларини қўлланиш тартиби тўғрисидаги низомни шу йилнинг 1 ноябригача ишлаб чиқсин ва белгиланган тартибда тасдиқласин.
Кейинги таҳрирга қаранг.
2. Ўзбекистон Республикаси Давлат солиқ қўмитаси Молия вазирлиги ҳамда Монополиядан чиқариш ва рақобатни ривожлантириш давлат қўмитаси билан биргаликда:
савдо корхоналари томонидан кундалик эҳтиёж истеъмол товарларига нархларни шакллантиришнинг белгиланган тартибига риоя қилиниши устидан қатъий назоратни таъминласин;
кундалик эҳтиёж истеъмол товарлари нархларининг асоссиз равишда ошириб юборилишига уринишларга йўл қўймаслик ва уларнинг олдини олиш бўйича зарур чора-тадбирларни кўрсин, қонун бузувчиларга нисбатан амалдаги қонун ҳужжатларига мувофиқ иқтисодий жазо чораларини қўлласин.
Кейинги таҳрирга қаранг.
3. 2001 йил 1 ноябрдан бошлаб:
Ўзбекистон Республикаси ҳудудига келтириладиган ўсимлик ёғига акциз солиғи ставкалари уларнинг божхона қийматининг 10 фоизи миқдорида;
Кейинги таҳрирга қаранг.
республика ҳудудига жисмоний шахслар («ўзлари қатнаб олиб келадиганлар») томонидан келтириладиган тижорат фаолияти учун мўлжалланган озиқ-овқат товарларидан, шу жумладан Ўзбекистон Республикаси ташқарисидан жисмоний шахслар номига келадиган товарлардан (халқаро почта жўнатмаларидан ташқари) олинадиган йиғим ставкалари, бож тўловисиз келтиришнинг чекланган нормасини қўлламасдан, уларнинг божхона қийматининг 25 фоизи миқдорида белгилансин;
республика ҳудудига жисмоний шахслар («ўзлари қатнаб олиб келадиганлар») томонидан тижорат мақсадларида бож тўловисиз келтиришнинг белгиланган нормаси доирасида 1000 АҚШ долларигача миқдорда келтириладиган унни божхонада расмийлаштириш божхона тўловлари ундирмасдан амалга оширилади.
Кейинги таҳрирга қаранг.
4. Қуйидагилар:
республика ҳудудига жисмоний шахслар («ўзлари қатнаб олиб келадиганлар») томонидан келтириладиган тижорат фаолияти учун мўлжалланган ноозиқ-овқат товарлардан олинадиган йиғим ставкаси амалдаги миқдорда – бож тўловисиз келтиришнинг чекланган нормасини қўлламасдан, уларнинг божхона қийматининг 50 фоизи миқдорида ва уни ундириш тартиби сақлаб қолинсин;
Кейинги таҳрирга қаранг.
Ўзбекистон Республикаси ҳудудига жисмоний шахслар томонидан келтириладиган тижорат фаолияти учун мўлжалланмаган товарлардан олинадиган йиғим миқдори Ўзбекистон Республикаси Вазирлар Маҳкамасининг «Импортни тарифлар билан бошқариш чора-тадбирлари тўғрисида» 1998 йил 24 февралдаги 80-сон қарорида белгиланган амалдаги миқдорларда ва уни ундириш тартиби сақлаб қолинсин.
5. «Ёғмойтамакисаноат» уюшмаси ва ўсимлик ёғи ишлаб чиқарувчи корхоналар томонидан хўжаликлар ресурсларидан ишлаб чиқарилган ва белгиланган тартибда уларга қайтариладиган ўсимлик (пахта) ёғини ушбу хўжаликларнинг топшириғига биноан ёки ишончномалари бўйича бошқа хўжалик юритувчи субъектларга сотилиши тақиқлансин.
Белгилаб қўйилсинки:
ўсимлик (пахта) ёғининг тузилган шартномаларга мувофиқ хўжаликлар томонидан сотиб олинмаган миқдори ишлаб чиқарувчи корхоналар томонидан қонун ҳужжатларида белгиланган тартибда сотилади;
ишлаб чиқарувчи корхоналарнинг хўжаликлар ресурсларидан ишлаб чиқарилган ўсимлик (пахта) ёғини мазкур хўжаликларнинг топшириғига биноан ёки ишончномаси бўйича бошқа хўжалик юритувчи субъектларга сотишдан олинган тушуми давлат солиқ органлари томонидан қонунчиликда белгиланган тартибда давлат бюджетига ундирилади, мансабдор шахсларга нисбатан қонунчиликка мувофиқ жавобгарлик чоралари қўлланилади.
6. Ўзбекистон Республикаси Давлат божхона қўмитаси кундалик эҳтиёж истеъмол товарларининг республика ташқарисига ноқонуний олиб чиқиб кетилиши ҳолларининг олдини олишни таъминловчи божхона назоратини кучайтирсин.
7. Ўзбекистон Республикаси Адлия вазирлиги тегишли вазирликлар ва идоралар билан биргаликда бир ҳафта муддатда идоравий норматив ҳужжатларни ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари М.З. Усмонов ва Р.С. Азимов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2001 йил 31 октябрь,
433-сон

(Ўзбекистон Республикаси қонун ҳужжатлари тўплами, 2001 й., 20-сон, 144-модда; 2002 й., 13-сон, 108-модда; 14-сон, 111-модда; 2005 й., 32-33-сон, 251-модда; 2010 й., 17-сон, 130-модда; 2013 й., 37-сон, 485-модда; 2017 й., 33-сон, 863-модда; Қонун ҳужжатлари маълумотлари миллий базаси, 20.12.2019 й., 09/19/1014/4173-сон)