Истеъмол моллари ва хизматлари нархларининг ошиши давом этаётганлиги ва аҳолини ижтимоий ҳимоя қилишни таъминлаш зарурлиги муносабати билан Вазирлар Маҳкамаси қарор қилади:

1. 1992 йил 1 январдан бошлаб халқ таълими, соғлиқни сақлаш, маданият, ижтимоий таъминот, фан, давлат муассасалари ва уй-жой-коммунал хўжалиги тармоқлари ходимларининг иш ҳақи, республика Ҳукумати белгилаган компенсацияларни ҳисобга олган ҳолда, 2 баравар оширилсин.

2. Олий ўқув юртлари талабаларига, техникумлар ва ҳунар-техника билим юртлари ўқувчиларига бериладиган стипендиялар, агар улар республика Ҳукуматининг қарорларига мувофиқ кийим-кечак ва озиқ-овқат билан таъминланмайдиган бўлсалар, 1992 йил 1 январдан бошлаб 2,2 баравар (бунда 1-иловага мувофиқ имтиёзли овқатланишга қўшимча ҳақ аввалги миқдорида сақлаб қолинсин), аспирантлар ва докторантларники эса 2 баравар оширилсин.

3. 1992 йил 1 январдан бошлаб Ўзбекистон Республикаси ҳудудида иш ҳақи ва меҳнат пенсиясининг энг оз миқдори (компенсацияни ҳисобга олган холда) ойига 350 сум, фуқароларнинг солиқ қилинмайдиган энг оз даромади миқдори ойига 350 сўм қилиб белгилансин.

4. Ўзбекистон Республикаси Меҳнат вазирлиги Молия вазирлиги, Олий ва ўрта махсус таълим вазирлиги, Халқ таълими вазирлиги, Маданият вазирлиги, Соғлиқни сақлаш вазирлиги, Ижтимоий таъминот вазирлиги, Уй-жой-коммунал хўжалиги вазирлиги, Мудофаа ишлари вазирлиги, Адлия вазирлиги, Олий Суди, Олий ҳакамлик суди, Прокуратураси, Давлат телерадиоэшиттириш компанияси, Давлат жисмоний тарбия ва спорт қўмитаси, Ўзбекистон архивлар бош бошқармаси ҳамда Ўзбекистон Республикаси давлат муассасалари органлари билан биргаликда халқ таълими, соғлиқни сақлаш, маданият, ижтимоий таъминот, фан, давлат муассасалари ва уй-жой-коммунал хўжалиги тармоқлари (номоддий ишлаб чиқариш соҳалари) ходимлари тариф ставкалари ва маошларининг янги миқдорларини ишлаб чиқсин ва тасдиқласин.

5. Ўзбекистон Республикаси Президентининг «Барча турдаги мактабларнинг ўқитувчиларига, болалар уйларининг тарбиячиларига қўшимча имтиёзлар бериш, юқори синфлар ўқитувчиларининг иш ҳақини ошириш тўғрисида» 1990 йил 13 ноябрдаги Фармонининг амал қилиши 1992 йил 1 январдан бошлаб қуйидагиларга ҳам татбиқ этилсин:

мактабгача ва мактабдан ташқари болалар муассасаларининг тарбиячиларига, ўқитувчиларига, республика ҳунар-техника таълими тизимининг ўқитувчиларига ва ишлаб чиқариш усталарига;

болалар-ўсмирлар спорт мактабларининг, олимпия резервлари мактабларининг директорларига, директор ўринбосарларига, ўргатувчи-ўқитувчиларига, йўриқчи-методистларига;

Ўзбекистон Республикаси Маданият вазирлигининг болалар мусиқа мактаблари ва санъат мактаблари директорларига, директор ўринбосарларига, ўқитувчиларига, концертмейстерларига;

интернат мактаблар ва болалар уйларининг махсус фанлар ўқитувчиларига ва мусиқа раҳбарларига.

6. Ўзбекистон Республикаси Ижтимоий таъминот вазирлиги 1992 йил 1 январдан бошлаб пенсияларнинг энг оз миқдорларини 2-иловага мувофиқ қайта ҳисоблаб чиқишни таъминласин.

7. 1992 йил 1 январдан бошлаб давлат бошқарув органлари (ички ишлар ва миллий хавфсизлик органларидан ташқари), республика адлия, суд ва прокуратура органлари, (Қорақалпоғистон Республикаси Вазирлар Кенгаши ходимларининг, маҳаллий Кенгашлар раҳбарларининг лавозим маошлари, компенсацияларни ҳисобга олган ҳолда, 2 баравар кўпайтирилсин.

Республика вазирликлари, давлат қўмиталари, идоралари, адлия, суд ва прокуратура органлари, (Қорақалпоғистон Республикаси Вазирлар Кенгаши ходимлари, маҳаллий Кенгашлар раҳбарлари айрим тоифаларининг лавозим маошлари 3 ва 4-иловаларга мувофиқ тасдиқлансин.

8. Республика маҳалла қўмиталари раисларининг ва масъул котибларининг лавозим маошлари 2 баравар оширилсин.

9. Ўзбекистон Республикаси Молия вазирлиги республиканинг 1992 йилги бюджетида кўрсатилган аҳоли тоифаларининг пенсияларини, стипендиялари ва иш ҳақларини ошириш учун зарур маблағларни назарда тутсин, бунда ушбу мақсадларга бюджетдан ташқари ва бошқа манбаларни жалб қилишни таъминлашни ҳисобга олсин.

10. Ўзбекистон Республикаси Давлат банки, Ўзбекистон саноат-қурилиш банки, Ўзбекистон деҳқончилик-саноат банки, Ўзбекистон жамғармалар банки мазкур қарорда белгиланган миқдорлардан келиб чиққан ҳолда иш ҳақи, стипендиялар, пенсиялар ва нафақалар тўлашга нақд пул беришни таъминласинлар,

11. Белгилаб қўйилсинки, лавозим маошларини ошириш билан боғлиқ харажатларнинг 20 фоизи бошқарув органлари аппарати ходимлари сонини қисқартириш ҳисобига амалга оширилади, Ўзбекистон Республикаси Молия вазирлиги кўрсатилган тартибга риоя этилишини назорат қилсин.

12. Белгилаб қўйилсинки, вилоятлар ва шаҳарлар ходимларини меҳнатга ҳақ тўлаш гуруҳларига киритиш Ўзбекистон Республикаси Президенти ҳузуридаги Вазирлар Маҳкамаси томонидан белгиланади.

Давлат ҳокимияти ва бошқарув органлари ходимларига меҳнат ҳақи тўлаш шароитлари бўйича Тошкент шаҳри «гуруҳдан ташқари» вилоятлар тоифасига тенглаштирилсин.

Давлат ҳокимияти ва бошқарув органлари ходимларига меҳнат ҳақи тўлаш шароитлари бўйича Қашқадарё вилояти иккинчи гуруҳдан биринчи гуруҳга ўтказилсин.

13. Ўзбекистон Республикаси Меҳнат вазирлиги манфаатдор вазирликлар, идоралар, концернлар, бирлашмалар, корхоналар ва ташкилотлар билан биргаликда КПСС Марказий Комитети, СССР Министрлар Совети ва ВЦСПСнинг 1986 йил 17 сентябрдаги 1115-сон қарори билан тасдиқланган халқ хўжалигининг ишлаб чиқариш тармоқларида амалда бўлган тариф ставкаларини, 4,375** коэффициентини қўллаган ҳолда, қайта ҳисоблаб чиқсин. Корхоналар раҳбарлари, мутахассислари ва хизматчиларининг лавозим маошлари, компенсацияларни ҳисобга олган ҳолда, 2 баравар кўпайтирилсин.

4,375 коэффициенти — КПСС Марказий Комитети, СССР Министрлар Совети ва ВЦСПСнинг 1986 йил 17 сентябрдаги 1115-сон қарори билан халқ хўжалигининг ишлаб чиқариш тармоқлари корхоналарининг ходимлари учун белгиланган амалдаги иш ҳақининг энг оз миқдори даражаси Ўзбекистон Республикаси Президентининг 1991 йил 29 декабрдаги Фармони билан белгиланган иш ҳақининг энг оз миқдори ўртасидаги нисбатларнинг катталигидир (350 сўм : 80 сўм = 4,375).

Янги жорий қилинадиган тариф ставкалари амалдаги тариф ставкаларини 4,375 коэффициентига кўпайтириш йўли билан белгиланади, бунда малака гуруҳлари ўртасида қарор топган миқёслар бузилмайди.

14. Вазирликлар, идоралар, уюшмалар, концернлар, бирлашмалар, корхоналар ва хўжаликлар 1992 йилда ишловчиларнинг иш ҳақини, унинг белгиланган энг оз миқдорини ҳисобга олган ҳолда, янада кўпайтиришни таъминловчи чора-тадбирларни амалга оширишни назарда тутсинлар, бунда эркин ва шартномавий нархлардан кенг фойдаланишни, истеъмол фонди бўйича барча чеклашларни бекор қилишни, ишлаб чиқаришни ўстиришнинг мавжуд резервларини жалб қилишни кўзда тутсинлар.

15. Ўзбекистон Республикаси Президенти ҳузуридаги Вазирлар Маҳкамасининг «Давлат бошқарув органлари аппарати, суд органлари ва нотариал идоралар ходимларининг лавозим маошлари тўғрисида» 1991 йил 23 ноябрдаги 298-сон қарори ўз кучини йўқотган деб ҳисоблансин.

16. Адлия вазирлиги, Меҳнат вазирлиги манфаатдор вазирликлар ва идоралар билан биргаликда бир ой муддат ичида, мазкур қарордан келиб чиққан холда, амалдаги қонунчиликка ўзгартишлар ва қўшимчалар киритиш тўғрисида таклифлар тайёрласинлар ва киритсинлар.

17. Мазкур қарорнинг бажарилишини назорат қилиш Вазирлар Маҳкамаси Раисининг ўринбосарлари — комплексларнинг раҳбарларига юклатилсин.