|
Ҳужжат кучини йўқотган " " 05.01.2018
|
Ҳужжат 11.06.2004 00 санаси ҳолатига
Амалдаги версияга ўтиш |
Ўзбекистон Республикаси Вазирлар Маҳкамасининг
қарори
ЎЗБЕКИСТОН МАТБУОТ ВА АХБОРОТ АГЕНТЛИГИ ФАОЛИЯТИНИ ЯНАДА ТАКОМИЛЛАШТИРИШ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2017 йил 30 декабрдаги 1038-сонли «Ўзбекистон матбуот ва ахборот агентлиги тўғрисидаги низомни тасдиқлаш, шунингдек, унинг фаолиятини такомиллаштириш тўғрисида»ги қарорига асосан ўз кучини йўқотган.
Ўзбекистон Республикаси Президентининг «Республика давлат бошқаруви органлари тизимини такомиллаштириш тўғрисида» 2003 йил 9 декабрдаги ПФ–3358-сон Фармонини бажариш мақсадида Вазирлар Маҳкамаси қарор қилади:
1. Қуйидагилар:
Кейинги таҳрирга қаранг.
Ўзбекистон матбуот ва ахборот агентлиги тўғрисидаги низом 3-иловага мувофиқ;
Оммавий ахборот воситалари мониторинги ва уларни лицензиялаш марказининг, Қорақалпоғистон Республикаси матбуот ва ахборот агентлигининг тузилмалари, вилоятлар ва Тошкент шаҳар матбуот ва ахборот бошқармаларининг намунавий тузилмаси 4—6а-иловаларга мувофиқ тасдиқлансин.
Кейинги таҳрирга қаранг.
2. Ўзбекистон матбуот ва ахборот агентлиги Бош директорига марказий аппарат тузилмасига, зарурат бўлганда, ходимларнинг чекланган умумий сони ҳамда уларни таъминлаш маблағлари доирасида ўзгартиришлар киритиш ҳуқуқи берилсин.
3. Қуйидагиларга:
Ўзбекистон матбуот ва ахборот агентлиги, Ўзбекистон Республикаси Давлат мулки қўмитаси, Иқтисодиёт вазирлиги, Меҳнат ва аҳолини ижтимоий муҳофаза қилиш вазирлиги ҳамда Молия вазирлигининг Агентлик тизимига кирувчи нашриётлар ва матбаа корхоналари негизида нашриёт-матбаа ижодий уйлари ташкил этиш;
Ўзбекистон кўзи ожизлар жамияти ва Ўзбекистон Республикаси Давлат мулки қўмитасининг Жамиятга қарашли босмахонани давлат корхонаси сифатида Ўзбекистон матбуот ва ахборот агентлиги ихтиёрига бериш;
А. Қодирий номидаги ҳамда Абу Али ибн Сино номидаги нашриётлар ижодий жамоаларининг уларни «Ўзбекистон миллий энциклопедияси» давлат илмий нашриётига қўшиш тўғрисидаги таклифларига розилик берилсин.
Ўзбекистон матбуот ва ахборот агентлиги «Ўзбекистон миллий энциклопедияси» давлат илмий нашриёти тўғрисидаги низомни ҳамда унга А. Қодирий номидаги ҳамда Абу Али ибн Сино номидаги нашриётларнинг қўшилишини ҳисобга олган ҳолда унинг тузилмасини бир ой муддатда ишлаб чиқсин ва тасдиқласин.
4. Ўзбекистон Республикаси Молия вазирлиги ҳар йили республика бюджетини шакллантиришда Оммавий ахборот воситалари мониторинги ва уларни лицензиялаш маркази ҳамда унинг ҳудудий бўлимлари таъминотига ва моддий-техника базасини мустаҳкамлашга зарур маблағлар, шунингдек битта енгил автомобиль харажатларига лимит ажратишни назарда тутсин.
5. Ўзбекистон Республикаси Иқтисодиёт вазирлиги ва Молия вазирлиги Ўзбекистон матбуот ва ахборот агентлигининг Оммавий ахборот воситалари мониторинги ва уларни лицензиялаш маркази ҳамда унинг ҳудудий бўлимларини телерадиоэшиттиришларни ёзиб олиш ва архивлаштириш учун техник воситалар билан таъминлашни 2004 йил ва 2005 йил инвестиция дастурларига киритсинлар.
Кейинги таҳрирга қаранг.
6. Қуйидагилар:
Вазирлар Маҳкамасининг «Ўзбекистон миллий энциклопедияси» давлат илмий нашриётини ташкил этиш тўғрисида» 1997 йил 20 мартдаги 154-сон қарорининг 6-банди ҳамда қарорга 2, 2а-иловалар;
Вазирлар Маҳкамасининг «Ўзбекистон матбуот ва ахборот агентлиги фаолиятини ташкил этиш тўғрисида» 2002 йил 3 июлдаги 241-сон қарори (Ўзбекистон Республикаси ҚТ, 2002 й., 7-сон, 37-модда) ўз кучини йўқотган деб ҳисоблансин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.А. Азизхўжаев зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2004 йил 11 июнь,
274-сон
Ўзбекистон матбуот ва ахборот агентлиги бошқарувининг ташкилий тузилмаси
Ўзбекистон матбуот ва ахборот агентлиги марказий аппаратининг тузилмаси
Кейинги таҳрирга қаранг.
Вазирлар Маҳкамасининг
2004 йил 11 июндаги 274-сон қарорига
3-ИЛОВА
2004 йил 11 июндаги 274-сон қарорига
3-ИЛОВА
Ўзбекистон матбуот ва ахборот агентлиги тўғрисида
НИЗОМ
I. Умумий қоидалар
1. Ўзбекистон матбуот ва ахборот агентлиги (кейинги ўринларда Агентлик деб аталади) оммавий ахборот воситалари, ахборотлар алмашиш, матбуот, ноширлик, матбаачилик фаолияти ҳамда даврий нашрларни тарқатиш соҳасида давлат сиёсатини ишлаб чиқиш ва амалга ошириш борасидаги вазифаларни ҳал этиш учун ваколат берилган давлат бошқаруви органи ҳисобланади.
Агентлик ўз фаолияти тўғрисида Ўзбекистон Республикаси Вазирлар Маҳкамасига ҳисоб беради.
2. Агентлик тизимига Қорақалпоғистон Республикаси матбуот ва ахборот агентлиги, вилоятлар ва Тошкент шаҳар матбуот ва ахборот бошқармалари (кейинги ўринларда ҳудудий бошқармалар деб аталади) ҳамда Агентликка қарашли бошқа ташкилотлар киради.
Ҳудудий бошқармалар икки томонлама бўйсунадилар ҳамда тегишли равишда Қорақалпоғистон Республикаси Вазирлар Кенгашига, маҳаллий давлат ҳокимияти органларига ҳисоб берадилар.
3. Агентлик ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлисининг қарорларига ва бошқа ҳужжатларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек мазкур Низомга амал қилади.
4. Агентлик ўз фаолиятини давлат бошқарувининг бошқа органлари, маҳаллий давлат ҳокимияти органлари, жамоат бирлашмалари ва бошқа ташкилотлар билан ўзаро ҳамкорликда амалга оширади.
5. Агентликни, унинг ҳудудий бошқармаларини моддий-техник таъминлаш ва Агентлик тизими ходимлари меҳнатига ҳақ тўлаш Агентликка қарашли ташкилотларнинг шартнома асосидаги ажратмалари, шунингдек қонун ҳужжатларида тақиқланмаган бошқа манбалар ҳисобига амалга оширилади.
Оммавий ахборот воситалари мониторинги ва уларни лицензиялаш маркази фаолияти давлат бюджети маблағлари ҳисобига молиялаштирилади.
Кейинги таҳрирга қаранг.
6. Агентлик ва унинг ҳудудий бошқармалари юридик шахс ҳисобланади, Ўзбекистон Республикаси Давлат герби тасвири туширилган ва ўз номи ёзилган муҳрга эга бўлади.
II. Агентликнинг вазифалари ва функциялари
7. Қуйидагилар Агентликнинг асосий вазифалари ҳисобланади:
оммавий ахборот воситаларининг мустақил фаолиятни амалга оширишга бўлган конституциявий ҳуқуқларига ва тегишли қонун ҳужжатларига, сўз ва матбуот эркинлиги кафолатларига сўзсиз риоя қилиниши мониторингини олиб бориш;
республика фуқароларининг ахборотлар олишга бўлган эҳтиёжини янада тўлиқ қондириш, аҳолининг, энг аввало, ўсиб келаётган авлоднинг таълим, маънавий ва маданий даражасини ошириш, уларни миллий мустақиллик ғоялари руҳида тарбиялаш мақсадида оммавий ахборот воситаларини, ноширлик ишларини ва матбаачиликни кенг ривожлантиришга кўмаклашиш;
ноширлик ва матбаачилик фаолияти, оммавий ахборот воситалари, даврий нашрларни тарқатиш, шу жумладан кўрсатиб ўтилган фаолият турларини рўйхатдан ўтказиш соҳасидаги давлат сиёсатини амалга ошириш;
нашриётлар, оммавий ахборот воситалари, телевидение, радиоэшиттириш ва республика ахборот бозорининг бошқа қатнашчилари томонидан ахборот соҳасида амалдаги қонун ҳужжатларига риоя этилиши юзасидан мониторингни амалга ошириш;
республика фуқаролари ва юридик шахсларининг ахборотларни тайёрлаш, тарқатиш, улардан фойдаланиш соҳасидаги ҳуқуқлари ва манфаатларининг ҳимоя қилинишини таъминлаш;
ноширлик фаолиятини лицензиялашни ташкил этиш;
мулкчилик шаклларидан қатъи назар, оммавий ахборот воситалари учун ахборот бозорида тенг шарт-шароитларни таъминлаш тадбирларини ишлаб чиқиш;
ноширлик ва матбаачилик фаолияти, даврий нашрларни тарқатиш соҳасида ягона техника сиёсатини ўтказиш;
рекламалар тайёрлаш, шунингдек уларни оммавий ахборот воситалари орқали тарқатиш соҳасида давлат сиёсатини ишлаб чиқиш ва амалга оширишда қатнашиш;
ноширлик-матбаачилик фаолиятининг ишлаб чиқариш-техникавий базасини ривожлантириш ва замонавийлаштириш, стандартлаш ва сертификатлаш соҳасидаги чора-тадбирларни ишлаб чиқиш ва амалга ошириш.
8. Агентлик ўзига юкланган вазифаларни бажариш мақсадида қуйидаги функцияларни амалга оширади:
матбаачилик фаолияти билан шуғулланувчи шахсларни, оммавий ахборот воситаларини рўйхатдан ўтказади;
ноширлик фаолиятини лицензиялашни ташкил этади;
Кейинги таҳрирга қаранг.
нашриётлар, оммавий ахборот воситалари, телевидение, радио ва республика ахборот бозорининг бошқа қатнашчилари томонидан ахборот соҳасида амалдаги қонун ҳужжатларига риоя этилиши мониторингини ташкил қилади;
қонун ҳужжатларига, рўйхатдан ўтказиш ва лицензиялаш шартларига риоя этилишини назорат қилади, оммавий ахборот воситалари ва нашриётлар томонидан амалдаги қонун ҳужжатлари мунтазам равишда бажарилмаган тақдирда эса — рўйхатдан ўтказиш тўғрисидаги гувоҳномалар ва лицензияларнинг амал қилишини белгиланган тартибда тўхтатиб туради ва тўхтатади;
техник, шунингдек бошқа нормативлар ва стандартларни ишлаб чиқиш ҳамда техникавий базани ривожлантириш, реконструкция қилиш, ундан фойдаланиш, стандартлаш ва сертификатлаш соҳасидаги тадбирларни ишлаб чиқади ва амалга оширади;
Агентлик ваколатига киритилган соҳаларда фаолиятни амалга оширувчи бошқа органларга кўмаклашади;
Агентлик ваколатига кирувчи тармоқларни ривожлантириш прогнозлари ва дастурларини ишлаб чиқади;
Агентлик фаолиятига тааллуқли иқтисодий, ижтимоий, техникавий, ҳуқуқий муаммоларни таҳлил қилади ҳамда уларни ҳал этиш, шу жумладан таклифлар, тегишли қонун ҳужжатлари ва норматив ҳужжатлар лойиҳаларини тайёрлаш бўйича таклифлар ишлаб чиқади;
Агентлик тасарруфидаги ташкилотлар фаолиятига раҳбарлик қилади ва улар фаолиятини мувофиқлаштиради, уларнинг моддий-техникавий таъминотига кўмаклашади;
матбуот ва ахборот соҳасида халқаро ҳамкорликни ривожлантиради, халқаро ташкилотларнинг Агентлик ваколатига тааллуқли масалалар бўйича ишларида қатнашади.
III. Агентликнинг ҳуқуқлари ва жавобгарлиги
9. Агентлик ўзига юкланган вазифалар ва функцияларни бажариш учун қуйидаги ҳуқуқларга эга:
давлат органларидан ва бошқа органлар, муассасалар, ташкилотлар, мансабдор шахслардан зарур ахборотлар, ҳужжатлар ва материалларни қонун ҳужжатларида белгиланган тартибда сўраб олиш;
қонун лойиҳаларини тайёрлаш, экспертизадан ўтказиш, тадқиқот ишларини амалга ошириш ва консультациялар учун илмий ташкилотларни, давлат органлари ходимларини, мутахассислар ва экспертларни, шу жумладан хорижий мутахассислар ва экспертларни белгиланган тартибда жалб этиш, вақтинчалик ижодий жамоалар ташкил қилиш;
ўз ваколати доирасида, қонун ҳужжатларида белгиланган тартибда, матбуот ва ахборот соҳасидаги қонунчиликни бузаётган давлат бошқаруви органлари, маҳаллий давлат ҳокимияти органлари, хўжалик юритувчи субъектлар ва уларнинг мансабдор шахслари томонидан бажарилиши мажбурий бўлган кўрсатмалар (тақдимномалар) бериш.
Агентлик Ўзбекистон Республикаси қонун ҳужжатларига мувофиқ бошқа ҳуқуқларга ҳам эга бўлиши мумкин.
10. Агентлик ўз ваколатлари доирасида вазирликлар, давлат қўмиталари, идоралар, маҳаллий давлат ҳокимияти органлари, корхоналар, муассасалар, ташкилотлар, мансабдор шахслар ва фуқаролар учун мажбурий бўлган норматив-ҳуқуқий ҳужжатлар чиқаришга ҳақлидир.
Агентлик, зарур ҳолларда, бошқа вазирликлар, давлат қўмиталари ва идоралар билан бирга қўшма қарорлар ва бошқа ҳужжатлар қабул қилишга ҳақлидир.
11. Агентлик ўзига юкланган вазифаларнинг самарали бажарилиши учун жавоб беради.
12. Ўзбекистон матбуот ва ахборот агентлигининг оммавий ахборот воситаларини цензура қилиши, материалларни таҳрир қилиши ва оммавий ахборот воситалари фаолиятига бошқа ҳар қандай шаклда ноқонуний аралашиши қатъиян тақиқланади.
IV. Агентлик фаолиятини ташкил этиш
13. Агентликка қонун ҳужжатларида белгиланган тартибда лавозимга тайинланадиган ва лавозимдан озод қилинадиган бош директор бошчилик қилади.
Кейинги таҳрирга қаранг.
Бош директорнинг уч нафар ўринбосари, шу жумладан бир нафар биринчи ўринбосари бўлади.
Кейинги таҳрирга қаранг.
Бош директор мақомига кўра вазирга, бош директорнинг биринчи ўринбосари — вазирнинг биринчи ўринбосарига, Бош директор ўринбосарлари — вазир ўринбосарларига тенглаштирилади.
Кейинги таҳрирга қаранг.
14. Бош директор:
Агентлик фаолиятига яккабошчилик асосида раҳбарлик қилади ва Агентликка юкланган вазифаларнинг бажарилиши учун шахсан жавоб беради.
Агентликнинг марказий аппарати ходимларини ва ҳудудий бошқармалар раҳбарларини белгиланган тартибда лавозимга тайинлайди ва лавозимдан озод қилади;
Бош директорнинг ўринбосарлари ўртасида вазифаларни тақсимлайди;
Агентликнинг мансабдор шахслари, ҳудудий бошқармалар, Агентлик тасарруфидаги ташкилотлар томонидан бажарилиши мажбурий бўлган буйруқлар чиқаради ва кўрсатмалар беради, шунингдек уларнинг бажарилишини белгиланган тартибда назорат қилади;
Ўзбекистон Республикаси Вазирлар Маҳкамаси томонидан тасдиқланган ходимларнинг сони ва меҳнатга ҳақ тўлаш фонди доирасида Агентлик марказий аппаратининг тузилмаси ва штат жадвалини, матбуот ва ахборот ҳудудий бошқармалари ходимлари сонини, шунингдек маблағ ажратишнинг тегишли даври учун давлат бюджетида тасдиқланган доирада уларнинг таъминоти харажатлари сметасини тасдиқлайди;
Кейинги таҳрирга қаранг.
Агентликнинг таркибий ва ҳудудий бошқармалари тўғрисидаги низомларни, Агентликка қарашли ташкилотларнинг низомларини белгиланган тартибда тасдиқлайди.
Бош директор қонун ҳужжатларига мувофиқ бошқа ваколатларни амалга оширади.
15. Агентликда таркибига Бош директор (ҳайъат раиси) ва Бош директорнинг ўринбосарлари (лавозимига кўра), оммавий ахборот воситалари ва оммавий коммуникациялар, матбуот, нашриётлар ва матбаа соҳасидаги бошқа раҳбар ходимлар, шунингдек Бош директорнинг тавсияси бўйича бошқа шахслар кирадиган 7 кишидан иборат ҳайъат ташкил этилади.
Ҳайъатнинг шахсий таркиби Ўзбекистон Республикаси Вазирлар Маҳкамаси томонидан тасдиқланади. Ҳайъат Агентлик фаолиятини прогнозлаш билан боғлиқ асосий масалаларни кўриб чиқади.
Ҳайъат қарорлари, қоидага кўра, Бош директор буйруқлари билан амалга оширилади. Бош директор билан ҳайъат аъзолари ўртасида келишмовчилик келиб чиққан тақдирда бош директор узил-кесил қарор қабул қилади ҳамда пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот беради. Ҳайъат аъзолари ҳам ўз фикрини Ўзбекистон Республикаси Вазирлар Маҳкамасига маълум қилишлари мумкин.
Кейинги таҳрирга қаранг.
16. Ҳудудий бошқармалар ўз фаолиятини Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан келишган ҳолда Агентлик томонидан тасдиқланадиган низомларга мувофиқ амалга оширади.
Агентликнинг ҳудудий бошқармалари раҳбарлари тегишли равишда Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимларининг тақдимномасига биноан Бош директор томонидан тайинланади.
17. Ўзбекистон матбуот ва ахборот агентлигини тугатиш ва қайта ташкил этиш қонун ҳужжатларида белгиланган тартибда амалга оширилади.
Оммавий ахборот воситалари мониторинги ва уларни лицензиялаш марказининг тузилмаси
Кейинги таҳрирга қаранг.
Қорақалпоғистон Республикаси матбуот ва ахборот агентлигининг тузилмаси
Кейинги таҳрирга қаранг.
Вилоятлар ва Тошкент шаҳар матбуот ва ахборот бошқармаларининг намунавий тузилмаси
Кейинги таҳрирга қаранг.
Вилоятлар ва Тошкент шаҳар матбуот ва ахборот бошқармалари ходимларининг чекланган сони
| | | | | | | |
| |
|
Ходимларнинг чекланган умумий сони |
Бошқарув ходимлари сони |
Шу жумладан: |
| |
|
хўжалик ҳисобидан таъминланади |
бюджетдан таъминланади |
Хизмат кўрсатувчи ва техник ходимлар | ||||
|
1. |
Андижон вилояти |
10 |
8 |
5 |
3 |
2 |
|
2. |
Бухоро вилояти |
11 |
8,5 |
5,5 |
3 |
2,5 |
|
3. |
Жиззах вилояти |
10 |
8 |
5 |
3 |
2 |
|
4. |
Қашқадарё вилояти |
11 |
8,5 |
5,5 |
3 |
2,5 |
|
5. |
Навоий вилояти |
11 |
8,5 |
5,5 |
3 |
2,5 |
|
6. |
Наманган вилояти |
11,5 |
9 |
6 |
3 |
2,5 |
|
7. |
Самарқанд вилояти |
12 |
9,5 |
5,5 |
4 |
2,5 |
|
8. |
Сирдарё вилояти |
10 |
8 |
6 |
2 |
2 |
|
9. |
Сурхондарё вилояти |
11 |
8,5 |
5,5 |
3 |
2,5 |
|
10. |
Тошкент вилояти |
10 |
8 |
6 |
2 |
2 |
|
11. |
Фарғона вилояти |
12 |
9,5 |
5,5 |
4 |
2,5 |
|
12. |
Хоразм вилояти |
11 |
8,5 |
5,5 |
3 |
2,5 |
|
13. |
Тошкент шаҳри |
13,5 |
10,5 |
6,5 |
4 |
3 |
|
Жами: |
144 |
113 |
73 |
40 |
31 | |
Кейинги таҳрирга қаранг.
(Ўзбекистон Республикаси қонун ҳужжатлари тўплами, 2004 й., 24-сон, 272-модда; 2005 й., 32-33-сон, 255-модда; 2010 й., 23-сон, 183-модда)
