«Қимматли қоғозлар бозорида депозитарийлар фаолияти тўғрисида»ги Ўзбекистон Республикаси Қонунини амалга ошириш, корпоратив қимматли қоғозларни сақлаш, ҳисобга олиш ва улар ҳаракатининг ягона тизимини ташкил этиш мақсадида Вазирлар Маҳкамаси қарор қилади:

1. Ўзбекистон Республикаси Давлат мулки қўмитаси ва Молия вазирлигининг ўз фаолиятини хўжалик юритиш ҳуқуқида ва хизматлар кўрсатишдан ҳамда бошқа тушумлардан олинган даромадлар ҳисобига амалга оширувчи унитар корхона шаклидаги корпоратив қимматли қоғозларнинг Давлат марказий депозитарийсини ташкил этиш тўғрисидаги таклифи қабул қилинсин.

2. Белгилансинки, қуйидагилар Марказий депозитарий фаолиятининг асосий вазифалари ва йўналишлари ҳисобланади:

чиқарилган нақд бўлмаган қимматли қоғозларни сақлаш;

чиқарилган ва хусусийлаштириш инвестиция фондларига тегишли бўлган қимматли қоғозларни сақлаш, улар эгалари реестрини юритиш, шунингдек хусусийлаштириш инвестиция фондлари томонидан олинган давлат кредити қайтарилгунга қадар пул маблағларидан мақсадли фойдаланилишини таъминлашда қатнашиш;

давлат тасарруфидан чиқарилган ва хусусийлаштирилган объектларнинг нақд қимматли қоғозларини улар сотиб олингунга қадар бўлган даврда сақлаш;

нақд ва нақд бўлмаган қимматли қоғозларга нисбатан давлат ҳуқуқларини ҳисобга олиш;

иккинчи даража депозитарийларнинг вакиллик ҳисобварақларини юритиш;

биржа ва биржадан ташқари савдолар қатнашчиларининг қимматли қоғозлари савдога қўйилишидан олдин уларнинг мавжудлигини ва ҳақиқий эканлигини тасдиқлаш;

биржа ва биржадан ташқари савдоларда тузилган битишувларга мувофиқ савдолар қатнашчиларига қимматли қоғозлар етказиб берилишини таъминлаш;

нақд ва нақд бўлмаган қимматли қоғозлар муомалага чиқарилганлигини тасдиқловчи ҳужжатларни сақлаш;

Ўзбекистон Республикаси ҳудудида норезидентлар томонидан, шунингдек қимматли қоғозларнинг хорижий фонд бозорларидаги Ўзбекистон Республикаси резидентлари томонидан чиқарилган қимматли қоғозларни ҳисобга олиш;

депозитарийлар тизимида қимматли қоғозлар ҳаракати тўғрисидаги ахборотларни жамлаш ва тартибга солиб туриш.

3. Белгилансинки:

Марказий депозитарий ўз фаолиятида Ўзбекистон Республикаси Давлат мулки қўмитаси ва Молия вазирлигига ҳисобот беради;

Марказий депозитарийнинг жорий фаолиятини маблағ билан таъминлаш унинг Уставга мувофиқ кўрсатиладиган депозитар ва бошқа хизматлари учун олинадиган маблағлар ҳисобига амалга оширилади;

Марказий депозитарий фаолиятига раҳбарлик қилиш Ўзбекистон Республикаси Вазирлар Маҳкамаси томонидан тайинланадиган Бош директор ва унинг ўринбосарлари томонидан амалга оширилади;

Марказий депозитарийнинг Бош директори лавозимига кўра Қимматли қоғозлар фаолиятини мувофиқлаштириш ва назорат қилиш маркази ҳузуридаги аппеляцияларни кўриб чиқиш кенгаши аъзоси ҳисобланади.

4. Марказий депозитарийнинг ходимлар чекланган сони 98 нафардан иборат бўлган тузилмаси (хизмат кўрсатувчи ходимлардан ташқари) 1-иловага мувофиқ, «Вақт» миллий депозитарийси ходимлари сони доирасида тасдиқлансин.

5. «Вақт» миллий депозитарийси акциядорларининг умумий йиғилиши томонидан 1999 йил 1 январдаги қолдиқ қиймати бўйича 138,0 млн сўм миқдоридаги асосий ва айланма маблағлар кўринишидаги акциядорлик жамияти мол-мулкининг бир қисми, кейинчалик Марказий депозитарийнинг устав фондига улуш сифатида қўшиш учун, Ўзбекистон Республикаси Давлат мулки қўмитаси томонидан сотиб олиниши ҳақидаги таклиф қўллаб-қувватланганлиги маълумот учун қабул қилинсин. Ўзбекистон Республикаси Давлат мулки қўмитаси «Вақт» миллий депозитарийси билан биргаликда кўрсатиб ўтилган битишувни бир ҳафта муддатда белгиланган тартибда расмийлаштирсин ва ўзаро мажбуриятлар бажарилишини назарда тутган ҳолда бир ой муддатда уни тугалласин.

Белгилансинки, мол-мулкнинг кўрсатиб ўтилган қисми, сарфланган сумма Давлат мулки қўмитаси томонидан кейинчалик уч йилдан ошмайдиган муддатда «Вақт» миллий депозитарийсининг давлатга тегишли акцияларини сотиш ҳисобига республика бюджетига қайтарилган ҳолда, давлат тасарруфидан чиқариш ва хусусийлаштиришдан тушадиган умумий маблағлар ҳисобига сотиб олинади.

6. Ўзбекистон Республикаси Давлат мулки қўмитаси ва Молия вазирлигининг Марказий депозитарий устав фондининг:

«Вақт» миллий депозитарийсининг Давлат мулки қўмитаси томонидан сотиб олинган техникавий ва айланма маблағлар кўринишидаги мол-мулки;

Ўзбекистон Республикаси Давлат мулки қўмитаси томонидан институционал қайта ўзгартиришлар бўйича Халқаро тикланиш ва тараққиёт банкининг қарзи бўйича қолган маблағлар ҳисобига сотиб олинадиган 97 минг АҚШ доллари миқдоридаги дастурий маблағлар ҳисобига шакллантирилиши тўғрисидаги таклифига розилик берилсин.

7. Ўзбекистон Республикаси Давлат мулки қўмитасига давлат тасарруфидан чиқариш ва хусусийлаштиришдан унинг ихтиёрида қоладиган маблағларнинг бир қисмини Марказий депозитарийнинг моддий-техника базасини ривожлантиришга йўналтиришга рухсат берилсин.

8. Ўзбекистон Республикаси Давлат мулки қўмитаси ва Молия вазирлиги Давлат марказий депозитарийси Уставини Вазирлар Маҳкамаси билан келишган ҳолда бир ҳафта муддатда тасдиқласинлар.

9. Марказий депозитарий ўз фаолиятини қонун ҳужжатлари билан унга юкланган вазифаларга мувофиқ уч ой муддатда ташкил этсин. Амалга оширилган ишлар тўғрисида шу йил август ойида Вазирлар Маҳкамасига ахборот берсин.

Белгилансинки, юридик ва жисмоний шахсларнинг «Депо» ҳисобварақлари хизмат кўрсатиш учун бошқа депозитарийларга ўтказилгунга қадар бўлган даврда ушбу ҳисобварақларни юритиш ва уларга хизмат кўрсатиш бўйича «Вақт» миллий депозитарийсининг ҳуқуқ ва мажбуриятларини Марказий депозитарий ўзига расмийлаштириши мумкин.

10. Ўзбекистон Республикаси Давлат мулки қўмитаси ҳузуридаги Қимматли қоғозлар бозори фаолиятини мувофиқлаштириш ва назорат қилиш маркази Марказий депозитарий билан биргаликда уч ой муддатда:

депозитар ҳисобга олиш, сақлаш ва депозитарийларнинг ҳисобот бериши қоидаларига риоя қилган ҳолда технологиялар, дастурий таъминлашнинг зарур даражасига эга бўлган иккинчи босқич депозитарийлари шакллантирилишини;

биржа ва биржадан ташқари савдолар қатнашчиларининг депозитар, клиринг ва савдо тизимлари ўзаро муносабатларининг амалдаги технологияси ва схемаси бўйича ўзаро ҳамкорлигини таъминласин.

11. Ўзбекистон Республикаси Давлат мулки қўмитаси бир ой муддатда «Вақт» миллий депозитарийсида ва унинг филиалларида сақланаётган ва ҳисобга олинган қимматли қоғозларни хатлаш бўйича комиссия ташкил этсин ҳамда уларни Марказий депозитарийга ўтказиш тартибини тасдиқласин.

12. «Вақт» миллий депозитарийси, унинг технологиялари, дастурий таъминоти ва иқтисодий нормативлари Қимматли қоғозлар бозори фаолиятини мувофиқлаштириш ва назорат қилиш марказининг норматив ҳужжатлари талабларига мувофиқлаштирилган ҳолда, иккинчи босқич депозитарийга айлантирилиши маълумот учун қабул қилинсин.

13. Марказий депозитарий аппарати Тошкент шаҳар, Бухоро кўчасидаги 10-уйга жойлаштирилсин.

14. Ўзбекистон почта ва телекоммуникациялар агентлиги Марказий депозитарийни белгиланган тартибда зарур телефон ва коммуникатив алоқа билан, шу жумладан учта Ҳукумат алоқаси телефони билан таъминласин.

15. Ўзбекистон Республикаси Вазирлар Маҳкамасининг 2-иловага мувофиқ қарорлари ўз кучини йўқотган деб ҳисоблансин ва уларга ўзгартиришлар, тўлдиришлар киритилсин.

16. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т. Султонов зиммасига юклансин.

I. Қуйидагилар ўз кучини йўқотган деб ҳисоблансин:

Ўзбекистон Республикаси Вазирлар Маҳкамасининг «Тошкент» республика фонд биржасининг самарали фаолият кўрсатишини таъминлаш ва қийматли қоғозлар бозори инфраструктурасини ривожлантириш чора-тадбирлари тўғрисида» 1994 йил 8 июндаги 285-сон қарори 4-бандининг иккинчи хатбоши;

Ўзбекистон Республикаси Вазирлар Маҳкамасининг «Давлат корхоналарини очиқ турдаги акционерлик жамиятларига айлантиришга оид ташкилий чора-тадбирлар тўғрисида» 1995 йил 15 июндаги 221-сон қарори (Ўзбекистон Республикаси ҚТ, 1995 й., 6-сон, 21-модда) 6-бандининг биринчи хатбоши.

II. Қуйидаги ўзгартириш ва қўшимчалар киритилсин:

1. Вазирлар Маҳкамасининг «Акциялар пакетларини жойлаштиришни такомиллаштириш ҳамда давлат мулки негизида ташкил этилган акциядорлик жамиятларини бошқаришда акциядорлар ролини ошириш чора-тадбирлари тўғрисида» 1997 йил 18 августдаги 404-сон қарорига 2-илова — «Хусусийлаштирилган корхоналар акциялари билан биржа ва биржадан ташқари бозорларда битишувларни амалга ошириш тартиби»да:

1.1. 4.1-банднинг еттинчи хатбошидаги «Вақт» миллий депозитарийси» сўзлари «Марказий депозитарий» сўзлари билан алмаштирилсин.

1.2. 5.1-банд қуйидаги таҳрирда баён қилинсин:

«Хусусийлаштирилаётган корхоналарнинг акциялар пакетлари юридик ва жисмоний шахсларга биржадан ташқари бозорда инвестиция, тендер савдолари ёки қонун ҳужжатларига мувофиқ очиқ кимошди савдоси шартларида қимматли қоғозлар бозори қатнашчилари томонидан шакллантириладиган электрон савдолар тизимини ташкил этиш йўли билан сотилади»;

1.3. 5.5-банднинг иккинчи хатбоши қуйидаги таҳрирда баён қилинсин:

«Хусусийлаштирилаётган корхоналарнинг биржадан ташқари инвестиция, тендер ёки қонун ҳужжатларига мувофиқ кимошди савдоси шартларида қимматли қоғозлар бозори қатнашчилари томонидан ташкил этилган электрон савдоларига қўйиладиган акциялари пакетлари вакил қилинган агентнинг ёзма топшириғи асосида Марказий депозитарий томонидан Давлат мулки қўмитасининг «Депо» счётида ёки унинг ҳудудий бошқармалари счётида захирага қўйилади»;

1.4. 5.6-банддаги «Миллий депозитарий ёки бошқа» сўзлари чиқариб ташлансин;

1.5. 10.1-банднинг иккинчи хатбошидаги «депозитарий»га сўзидан олдин «Марказий» сўзи қўшилсин.

2. Вазирлар Маҳкамасининг «Акциялар пакетларини жойлаштиришни такомиллаштириш ҳамда давлат мулки негизида ташкил этилган акциядорлик жамиятларини бошқаришда акциядорлар ролини ошириш чора-тадбирлари тўғрисида» 1997 йил 18 августдаги 404-сон қарори билан тасдиқланган «Хусусийлаштирилаётган корхоналар акциялари билан биржа ва биржадан ташқари бозорларда битишувларни амалга ошириш тартиби»га 1-илова – «Акцияларни сотишга қўйиш ҳуқуқи учун буюртманомалар танловини ўтказиш қоидалари» 11-бандининг иккинчи хатбошидаги «Миллий» сўзи «Марказий» сўзи билан алмаштирилсин.

3. Вазирлар Маҳкамасининг «Акциялар пакетларини жойлаштиришни такомиллаштириш ҳамда давлат мулки негизида ташкил этилган акциядорлик жамиятларини бошқаришда акциядорлар ролини ошириш чора-тадбирлари тўғрисида» 1997 йил 18 августдаги 404-сон қарори билан тасдиқланган «Хусусийлаштирилаётган корхоналар акциялари билан биржа ва биржадан ташқари бозорларда битишувларни амалга ошириш тартиби»га 3-илова – «Хусусийлаштирилаётган корхоналар акцияларини фонд биржаси орқали жойлаштиришда бозор қатнашчилари ўзаро ҳаракатлари схемаси»да:

схеманинг 9-бандидаги «депозитарий» сўзидан олдин «Марказий» сўзи қўшилсин;

схемага тушунтиришларнинг 8.8а-бандидаги «депозитарий» сўзидан олдин «Марказий» сўзи қўшилсин.

4. Ўзбекистон Республикаси Вазирлар Маҳкамасининг 1998 йил 6 майдаги 195-ф-сон фармойиши билан тасдиқланган «Ўзбекистон фонд бозорини халқаро сармоя бозорига интеграциялаш бўйича босқичма-босқич ҳаракат қилиш режаси»да:

I босқич учинчи бандининг учинчи ва тўртинчи устунларидаги, II босқич тўртинчи бандининг тўртинчи устунидаги «Вақт» миллий депозитарийсига кўрсатмалар Марказий депозитарийга кўрсатмалар билан алмаштирилсин.

5. Ўзбекистон Республикаси Вазирлар Маҳкамасининг «Ўзбекистон Республикаси Давлат мулки қўмитаси ҳузуридаги Қимматли қоғозлар бозори фаолиятини мувофиқлаштириш ва назорат қилиш марказининг Апелляцияларни кўриб чиқиш кенгаши таркибини тасдиқлаш тўғрисида» 1998 йил 15 сентябрдаги 395-сон қарорида:

қарорга 1-иловадаги Ўзбекистон Республикаси Давлат мулки қўмитаси ҳузуридаги Қимматли қоғозлар бозори фаолиятини мувофиқлаштириш ва назорат қилиш марказининг Апелляцияларни кўриб чиқиш кенгаши таркибига:

«Марказий депозитарий бош директори — лавозим бўйича» охирги хатбоши қўшилсин;

қарорга 2-илова — «Ўзбекистон Республикаси Давлат мулки қўмитаси ҳузуридаги Қимматли қоғозлар бозори фаолиятини мувофиқлаштириш ва назорат қилиш марказининг Апелляцияларни кўриб чиқиш кенгаши тўғрисида низом»нинг 8-бандидаги «7» рақами «8» рақами билан алмаштирилсин.

6. Вазирлар Маҳкамасининг «Инвестиция ва хусусийлаштириш инвестиция фондлари фаолиятини такомиллаштириш чора-тадбирлари тўғрисида» 1998 йил 25 сентябрдаги 410-сон қарори билан тасдиқланган 2-илова «Инвестиция фондлари тўғрисида низом»нинг 51-банди қуйидаги таҳрирда баён қилинсин:

«Инвестиция фонди акцияларининг ҳар бир чиқарилиши ҳисоби депозитарийда юритилади».

7. Ўзбекистон Республикаси Вазирлар Маҳкамасининг «Инвестиция ва хусусийлаштириш инвестиция фондлари фаолиятини такомиллаштириш чора-тадбирлари тўғрисида» 1998 йил 25 сентябрдаги 410-сон қарорига 3-илова билан тасдиқланган «Хусусийлаштириш инвестиция фондлари тўғрисида низом»нинг 27, 29, 36-бандларидаги «Вақт» миллий депозитарийсига кўрсатмалар Марказий депозитарийга кўрсатмалар билан алмаштирилсин.

8. Ўзбекистон Республикаси Вазирлар Маҳкамасининг 1996 йил 29 январдаги 54-ф-сон фармойишига 3-илова 9-бандининг «б» кичик бандидаги «Вақт» миллий депозитарийси ва унинг филиалларига» сўзлари «Марказий депозитарийга» сўзлари билан алмаштирилсин.

9. Ўзбекистон Республикаси Вазирлар Маҳкамасининг «Давлат корхоналарини очиқ турдаги акционерлик жамиятларига айлантиришга оид ташкилий чора-тадбирлар тўғрисида» 1995 йил 15 июндаги 221-сон қарори (Ўзбекистон Республикаси ҚТ, 1995 й., 6-сон, 21-модда)га 1-илова 9 ва 10-бандларидаги Миллий депозитарийга кўрсатмалар Марказий депозитарийга кўрсатмалар билан алмаштирилсин.