Кимё саноати корхоналари ва ташкилотларини бошқариш тизимини такомиллаштириш ҳамда улар фаолиятининг иқтисодий самарадорлигини ошириш, тармоқ корхоналарини акциялаштириш жараёнларини чуқурлаштириш, кимё ишлаб чиқаришини ривожлантириш, техника билан қайта жиҳозлаш ва замонавийлаштириш учун хорижий инвестицияларни кенг жалб этиш мақсадида Вазирлар Маҳкамаси қарор қилади:

1. «Ўзкимёсаноат» уюшмаси раҳбариятининг, шунингдек тармоқ корхоналари раҳбарларининг, мамлакатда ислоҳ қилиш ва хусусийлаштириш бўйича амалга оширилаётган умумий стратегияга қарамай, кимё саноатининг етакчи корхоналарини акциялаштириш, хусусийлаштиришдан олдин реклама қилиш ҳамда чет эл ва мамлакатимиз инвесторларини жалб этиш бўйича зарур чора-тадбирларни амалга ошириш борасида ҳанузгача амалий қадам қўйишмаганлиги мутлақо йўл қўйиб бўлмайдиган ҳол ҳисоблансин.

2. Ўзбекистон Республикаси Президентининг 2000 йил 27 декабрдаги Ф-1313-сон фармойиши билан тузилган кимё тармоғини бошқариш тизимини ва қишлоқ хўжалигини кимёвий препаратлар билан таъминлашни такомиллаштириш бўйича махсус комиссиянинг очиқ акциядорлик жамияти шаклидаги «Ўзкимёсаноат» давлат-акциядорлик компанияси «Ўзкимёсаноат» ДАКни ташкил этиш тўғрисидаги таклифларига розилик берилсин.

Ўзбекистон кимё саноати корхоналари уюшмаси «Ўзкимёсаноат» уюшмаси қатнашчилари томонидан уюшмани тугатиш тўғрисида қарор қабул қилинганлиги маълумот учун қабул қилинсин.

3. Қуйидагилар «Ўзкимёсаноат» давлат-акциядорлик компаниясининг асосий вазифалари ва фаолияти йўналишлари этиб белгилансин:

кимё саноати корхоналарини чуқур ислоҳ қилиш ва хусусийлаштириш, ушбу мақсадлар учун чет эл ва мамлакатимиз инвесторларини кенг жалб этиш;

тармоқни ривожлантиришнинг кимё саноатини барқарор ривожлантиришга, республиканинг минерал ўғитларга ҳамда кимё маҳсулотларининг бошқа турларига бўлган эҳтиёжини таъминлашга йўналтирилган ўртача ва узоқ муддатли дастурларини ишлаб чиқиш ва амалга ошириш;

кимё маҳсулотлари ташқи бозорларининг маркетинг тадқиқотларини амалга ошириш ҳамда шу асосда экспорт салоҳиятини кенгайтиришни таъминлаш, жаҳон бозорларида рақобатга бардошли маҳсулотлар ишлаб чиқаришни кўпайтириш ва уларни экспортга етказиб бериш;

кимё саноатини замонавийлаштириш, реконструкция қилиш ва техника билан қайта жиҳозлашга йўналтирилган ягона техника сиёсатини ўтказиш, ресурсларни тежайдиган самарали технологияларни жорий этиш, ишлаб чиқаришни ва бутловчи буюмлар тайёрлашни маҳаллийлаштиришни ривожлантириш;

менежментнинг замонавий усулларини эгаллаган ва бозор шароитларида самарали ишлашга қодир бўлган муҳандис-техник ва бошқарув кадрлари малакасини ошириш ҳамда уларни қайта тайёрлаш.

4. «Ўзкимёсаноат» давлат-акциядорлик компаниясининг ташкилий тузилмаси ҳамда унинг штатдаги ходимларининг чекланган сони (хизмат кўрсатувчи ходимлардан ташқари) 57 кишидан иборат бўлган ижро этувчи аппарати тузилмаси 1 ва 2-иловаларга* мувофиқ тасдиқлансин.

Белгилаб қўйилсинки, «Ўзкимёсаноат» давлат-акциядорлик компанияси бошқаруви 4 нафар аъзодан, шу жумладан раис ва унинг 3 нафар ўринбосаридан иборат бўлади. Раис ва унинг ўринбосарлари юқори бошқарув органи томонидан сайланади, кейинчалик Ўзбекистон Республикаси Вазирлар Маҳкамаси томонидан тасдиқланади ҳамда мақоми, маиший таъминот, тиббий ва транспорт хизмати кўрсатиш шароитлари бўйича: раис — вазирга, раиснинг биринчи ўринбосари — вазирнинг биринчи ўринбосарига, раис ўринбосарлари эса — вазир ўринбосарига тенглаштирилади.

«Ўзкимёсаноат» давлат-акциядорлик компанияси бошқаруви раисига, зарур бўлганда, унинг бошқаруви ижро этувчи аппарати тузилмасига штатдаги ходимларнинг белгиланган сони доирасида ўзгартиришлар киритишига рухсат этилсин.

5. Кимё тармоғини бошқариш тизимини ва қишлоқ хўжалигини кимёвий препаратлар билан таъминлашни такомиллаштириш бўйича махсус комиссия, Ўзбекистон Республикаси Давлат мулки қўмитаси «Ўзкимёсаноат» давлат-акциядорлик компанияси билан биргаликда белгиланган тартибда:

2001 йил 1 майгача асосий фондларни 2001 йил 1 январгача бўлган ҳолати бўйича қайта баҳолашни ҳисобга олган ҳолда «Ўзкимёсаноат» давлат-акциядорлик компаниясининг устав фондини шакллантирсинлар, давлат мулки бўлган акциялар пакетини шаклланган устав фондининг 51 фоизи миқдорида сақлаб қолган ҳолда эмиссия проспекти рўйхатдан ўтказилишини таъминласинлар;

3-иловага* мувофиқ компания корхоналарини хорижий инвесторларни жалб қилган ҳолда босқичма-босқич очиқ акциядорлик жамиятларига айлантириш тадбирларини белгиланган тартибда амалга оширсинлар.

2001 йилда биржа ва биржадан ташқари бозорларда «Шарқ таронаси» ва «Лактам» акциядорлик жамиятлари, «Кимёсавдотаъминот» ёпиқ акциядорлик жамияти акцияларининг давлат улушлари сотилишини таъминласинлар;

2001-2002 йилларда «Ўзкимёсаноат» давлат-акциядорлик компаниясининг 4-иловага* мувофиқ ижтимоий инфратузилма объектларини сотсинлар, шу жумладан хусусий мулк сифатида сотсинлар.

6. Ўзбекистон Республикаси Давлат мулки қўмитаси ва «Ўзкимёсаноат» давлат-акциядорлик компаниясига кимё саноати корхоналарини хусусийлаштириш учун хорижий консалтинг ва баҳолаш компанияларини, молиявий агентликларни жалб этишга рухсат берилсин, бунинг учун зарур маблағлар ажратилсин.

7. Ўзбекистон Республикаси Давлат мулки қўмитаси 2-Фарғона тузатиш-қурилиш-монтаж бошқармаси, 3-Самарқанд тузатиш-қурилиш-монтаж бошқармаси ва 4-Навоий тузатиш-қурилиш-монтаж бошқармаси ихтисослаштирилган тузатиш-қурилиш акциядорлик жамиятлари акцияларининг давлатга тегишли пакетларини белгиланган тартибда «Ўзкимёсаноат» давлат-акциядорлик компаниясига ишончли бошқарувга берсин.

8. «Ўзкимёсаноат» давлат-акциядорлик компаниясига мақсадли Кимё саноати ташкилотларини ривожлантириш ва қўллаб-қувватлаш жамғармасини (кейинги ўринларда «Жамғарма» деб аталади) ташкил этиш ҳуқуқи берилсин, Жамғарма маблағлари:

«Ўзкимёсаноат» давлат-акциядорлик компаниясининг солиқлар ва мажбурий тўловлар тўлангандан кейин қолган соф фойдасининг бир қисми;

2005 йилгача бўлган даврда — «Ўзкимёсаноат» давлат-акциядорлик компаниясининг ишончли бошқарувида бўлган акцияларнинг давлат улуши бўйича дивидендлар;

давлат мулкини хусусийлаштиришдан ва «Ўзкимёсаноат» давлат-акциядорлик компанияси бошқарувида бўлган ташкилотлар акцияларини сотишдан, шунингдек компаниянинг ўз акцияларини сотишдан тушган маблағлар, бюджетга йўналтириладиган операция харажатлари ва улушлар бундан мустасно;

қонун ҳужжатларига зид бўлмаган бошқа тушумлар ҳисобига шакллантирилади.

Белгилансинки, Жамғарма маблағларидан фақат:

инвестиция лойиҳаларини, кимё саноати корхоналарини замонавийлаштириш, реконструкция қилиш ва техника билан қайта жиҳозлашни;

экспортга йўналтирилган ишлаб чиқаришларни ташкил этиш ва ривожлантиришни;

маҳсулотларнинг янги турларини ўзлаштиришни, илмий-тадқиқот ва тажриба-конструкторлик ишланмаларини маблағ билан таъминлашда мақсадли фойдаланилади.

Молия вазирлиги «Ўзкимёсаноат» давлат-акциядорлик компанияси билан биргаликда Кимё саноати ташкилотларини ривожлантириш ва қўллаб-қувватлаш жамғармаси маблағларини шакллантириш ва улардан мақсадли фойдаланиш тартибини бир ой муддатда ишлаб чиқсин ва тасдиқласин.

9. Ўзбекистон Республикаси Давлат мулки қўмитаси, истисно тариқасида, 4-иловага мувофиқ объектларни хусусийлаштиришдан тушган маблағларни (қонун ҳужжатларига мувофиқ корхоналар ва Давлат мулки қўмитаси ихтиёрида қолдириладиган маблағлардан ташқари), шунингдек «Шарқ таронаси», «Лактам» акциядорлик жамиятлари ва «Кимёсавдотаъминот» ёпиқ акциядорлик жамиятидаги давлатга тегишли акцияларни сотишдан тушган маблағларни «Ўзкимёсаноат» давлат-акциядорлик компанияси ихтиёрига йўналтирсин, кўрсатиб ўтилган маблағлардан Кимё саноати ташкилотларини ривожлантириш ва қўллаб-қувватлаш жамғармаси орқали мақсадли фойдаланилсин.

10. Белгилансинки:

«Ўзкимёсаноат» давлат-акциядорлик компанияси «Ўзкимёсаноат» уюшмаси билан тузилган шартномалар ва мажбуриятлар бўйича ҳуқуқий ворис ҳисобланади;

«Ўзкимёсаноат» давлат-акциядорлик компанияси даромадлари (фойдаси) компания акцияларини сотиш, хусусийлаштиришдан тушган маблағлар, мол-мулки компаниянинг устав фондига тўлиқ кирган ташкилотларнинг ажратмалари (улар соф фойдасининг 50 фоизигача миқдорда), компания устав фондига берилган акцияларнинг давлат пакетлари бўйича дивидендлардан, шунингдек амалдаги қонун ҳужжатларига мувофиқ бошқа даромадлардан шакллантирилади;

«Ўзкимёсаноат» давлат-акциядорлик компанияси бошқаруви ижро этувчи аппаратининг харажатлари 2002 йил 1 январгача компания таркибига кирувчи корхоналар ва ташкилотларнинг ажратмалари ҳисобига, кейинчалик — қонун ҳужжатларига мувофиқ компания даромадлари ҳисобига маблағ билан таъминланади.

11. Белгилансинки, 5-иловага мувофиқ таркибда 11 кишидан иборат шакллантириладиган Компания кенгаши «Ўзкимёсаноат» давлат-акциядорлик компаниясининг юқори бошқарув органи ҳисобланади.

Кимё тармоғини бошқариш тизимини ва қишлоқ хўжалигини кимёвий препаратлар билан таъминлашни такомиллаштириш бўйича махсус комиссия икки ҳафта муддатда Вазирлар Маҳкамасига Компания кенгашининг шахсий таркиби юзасидан таклиф киритсин.

Кенгаш таркибига «Ўзкимёсаноат» давлат-акциядорлик компаниясининг акцияларига эга бўлган инвестор корхоналар ва компанияларнинг вакиллари ҳам кириши белгилаб қўйилсин.

14. «Ўзкимёсаноат» давлат-акциядорлик компанияси Ўзбекистон Республикаси Молия вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда 2002 йил 1 январгача қабул қилиш-топшириш далолатномалари асосида уй-жой фонди, поликлиникалар ва коммунал соҳанинг муҳандислик коммуникациялари маҳаллий ҳокимият ва бошқарув органларига белгиланган тартибда берилишини таъминласин.

15. Тошкент шаҳридаги «ЎзКимёлойиҳаИТИ» институтини ва «ЎзКимёлойиҳаИТИ» институтининг Чирчиқдаги филиалини бирлаштириш ва уларнинг негизида Чирчиқ шаҳар, Тошкент кўчаси, 4-уйда жойлашган «ЎзКимёлойиҳаИТИ» ягона лойиҳа-технология институтини ташкил этиш мақсадга мувофиқ деб ҳисоблансин.

16. «Ўзкимёсаноат» давлат-акциядорлик компанияси аппарати қуйидаги манзилга жойлаштирилсин: 700060, Тошкент шаҳар, Шаҳрисабз кўчаси, 42-уй.

17. Ўзбекистон Республикаси Ҳукуматининг 8-иловага мувофиқ қарорлари ўз кучини йўқотган деб ҳисоблансин.

Ўзбекистон Республикаси Адлия вазирлиги Ҳукумат қарорларига мазкур қарордан келиб чиқадиган ўзгартиришлар ва қўшимчалар киритиш тўғрисида икки ой муддатда таклифлар киритсин.

18. Мазкур қарорнинг бажарилишини назорат қилиш Ўзбекистон Республикасининг Бош вазири Ў.Т.Султонов зиммасига юклансин.

Ўзбекистон Республикаси Вазирлар Маҳкамаси вакили

Давлат мулки қўмитаси вакили

Макроиқтисодиёт ва статистика вазирлиги вакили

Молия вазирлиги вакили

Ўзбекистон Республикаси Ташқи иқтисодий алоқалар вазирлиги вакили

«Ўзсаноатқурилишбанк» вакили

Ўзбекистон Республикаси Ҳукуматининг ваколатли вакиллари:

Қишлоқ ва сув хўжалиги вазирлигидан

«Ўзқишлоқхўжаликкимё» давлат-акциядорлик компаниясидан

«Ўзбекнефтгаз» миллий холдинг компаниясидан

«Ўзбекэнерго» давлат-акциядорлик компаниясидан

«Ўзбекистон темир йўллари» давлат-акциядорлик компаниясидан

1. Ўзбекистон Республикаси Вазирлар Маҳкамасининг «Ўзбекистон кимё саноати корхоналари («Ўзкимёсаноат») уюшмасини ташкил этиш ва унинг фаолияти масалалари тўғрисида» 1994 йил 19 мартдаги 149-сон қарори.

2. Вазирлар Маҳкамасининг «1998—2002 йилларда Ўзбекистон кимё саноати корхоналарини комплекс ривожлантириш дастури тўғрисида» 1998 йил 25 мартдаги 129-сон қарорининг 3-банди.