Ҳужжат кучини йўқотган " " 19.12.2017

Ҳужжат 21.09.2015 00 санаси ҳолатига
Амалдаги версияга ўтиш

Ўзбекистон Республикаси Вазирлар Маҳкамасининг

Тендер савдолари ўтказишни янада такомиллаштириш чора-тадбирлари тўғрисида

LexUZ шарҳи

Мазкур қарор Ўзбекистон Республикаси Вазирлар Маҳкамасининг 2017 йил 18 декабрдаги 992-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шуниннгдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Товарлар (ишлар, хизматлар)нинг давлат ва корпоратив харидларини амалга оширишнинг замонавий шакл ва услубларини янада жорий этиш чора-тадбирлари тўғрисида» 2017 йил 23 августдаги ПҚ-3237-сон қарори)»ги қарорига асосан ўз кучини йўқотган.

Иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида маблағлардан фойдаланиш самарадорлигини янада ошириш ва улардан оқилона фойдаланиш, лойиҳаларни амалга ошириш тартиботларини жадаллаштириш, шунингдек товарлар етказиб берувчиларни, ишлар ва хизматларни амалга оширувчиларни танлаб олиш бўйича тендер савдоларини ташкил этиш ва ўтказиш тизимини такомиллаштириш мақсадида Вазирлар Маҳкамаси қарор қилади:

1. Иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматларни харид қилиш бўйича 1 — 7 иловаларга мувофиқ таркибда тармоқ идоралараро тендер комиссиялари (кейинги ўринларда идоралараро тендер комиссияси деб аталади) тузилсин.

Идоралараро тендер комиссияларининг раислари ва аъзолари зиммасига тендер (танлов) савдоларининг, шу жумладан халқаро тендер (танлов) савдоларининг самарали ташкил этилиши ва ўтказилиши юзасидан жавобгарлик юклансин.

2. Белгилаб қўйилсинки:

идоралараро тендер комиссияси тендер (танлов) савдоларини коллегиал асосда ўтказади ҳамда иқтисодиётнинг тегишли тармоқларида ва ижтимоий соҳада битта контракт бўйича 5,0 млн АҚШ долларидан кўп суммага товарлар, ишлар ва хизматларни харид қилиш юзасидан савдолар натижалари бўйича ғолибларни аниқлайди;

битта контракт бўйича 5,0 млн АҚШ долларидан кам суммадаги битта контракт бўйича тендер савдоларини ўтказиш қонун ҳужжатларига мувофиқ буюртмачилар томонидан тузилган тендер (танлов) комиссиялари томонидан амалга оширилади;

илгари бошланган ва бир нечта босқичлардан иборат бўлган, лекин тугалланмаган тендер (танлов) савдолари ушбу қарор кучга киргунгача фаолият кўрсатган тендер (танлов) комиссиялари томонидан амалга оширилади.

Кейинги таҳрирга қаранг.

3. Иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматлар харид қилиш бўйича идоралараро тендер комиссияси тўғрисидаги низом 8-иловага мувофиқ тасдиқлансин.

4. Идоралараро тендер комиссияларининг раислари икки ҳафта муддатда комиссиялар мажлисларини ўтказиш жадвалларини, ишчи органлар таркибларини ҳамда тендер (танлов) ҳужжатлари пакетларини сифатли ва ўз вақтида тайёрлаш тадбирларининг аниқ режаларини тасдиқласинлар, шунингдек мажлислар протоколларининг ўз вақтида расмийлаштирилиши юзасидан таъсирчан назоратни белгиланган муддатларда амалга оширсинлар.

Кейинги таҳрирга қаранг.

5. Ўзбекистон Республикаси Вазирлар Маҳкамаси ахборот-таҳлил департаментлари бош лойиҳалаш институтлари билан биргаликда икки ой муддатда вазирликлар ва идоралар — инвестиция лойиҳаларининг ташаббускорлари томонидан ишлаб чиқарувчилар — технологик лидерлар бўйича маълумотлар тўлиқ тармоқ базаларининг, шу жумладан уларнинг ишончлилиги ва амалий аҳамияти тўғрисидаги ахборотларнинг мажбурий тартибда шакллантирилиши ва тизимли равишда янгилаб борилишини жорий этсинлар, кейинчалик улардан тендер (танлов) ҳужжатлари пакетларини тайёрлашда, шунингдек идоралараро тендер комиссияларининг иш жараёнида фойдалансинлар.

Кейинги таҳрирга қаранг.

6. Ўзбекистон Республикаси Иқтисодиёт вазирлиги, Молия вазирлиги ва «Давархитектқурилиш» қўмитаси манфаатдор вазирликлар ва идоралар билан биргаликда бир ой муддатда қонун ҳужжатларига ушбу қарордан келиб чиқадиган ўзгартириш ва қўшимчалар киритиш юзасидан Ўзбекистон Республикаси Вазирлар Маҳкамасига таклифлар киритсинлар.

7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.

Ўзбекистон Республикасининг Бош вазири Ш. МИРЗИЁЕВ

Тошкент ш.,

2015 йил 14 сентябрь,

264-сон

Вазирлар Маҳкамасининг 2015 йил 14 сентябрдаги 264-сон қарорига
8-ИЛОВА

Иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматлар харид қилиш бўйича идоралараро тендер комиссияси тўғрисида

НИЗОМ

I. Умумий қоидалар

1. Ушбу Низом иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматлар харид қилиш бўйича идоралараро тендер комиссиясининг (кейинги ўринларда идоралараро тендер комиссияси деб аталади), шунингдек товарлар, ишлар ва хизматлар харид қилиш идоралараро тендер комиссияси ишчи органининг (кейинги ўринларда ишчи орган деб аталади) вазифалари, функциялари ва жавобгарлигини белгилайди.

Ушбу Низомнинг амал қилиши Ўзбекистон Республикаси Президенти ва Ўзбекистон Республикаси Вазирлар Маҳкамасининг қарорларига мувофиқ амалга ошириладиган товарлар, ишлар ва хизматлар харид қилишга татбиқ этилмайди.

2. Идоралараро тендер комиссиясининг таркиби Ўзбекистон Республикаси Вазирлар Маҳкамаси томонидан тасдиқланади.

3. Идоралараро тендер комиссияси иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида тендер (танлов) савдоларини ўтказиш бўйича доимий коллегиал орган ҳисобланади.

4. Идоралараро тендер комиссияси коллегиал асосда тендер (танлов) савдоларини ўтказади ҳамда қуйидагилар ҳисобига молиялаштириладиган инвестиция лойиҳалари доирасида товарлар, ишлар ва хизматларни харид қилиш юзасидан тендер (танлов) савдолари натижалари бўйича ғолибларни аниқлайди:

Ўзбекистон Республикаси Давлат бюджети маблағлари, бюджет ташкилотларининг бюджетдан ташқари маблағлари, шунингдек устав жамғармасидаги давлат улуши 50 фоиздан ортиқ бўлган ташкилотларнинг ўз маблағлари;

давлатнинг ташқи қарзлари, Ўзбекистон Республикасининг халқаро шартномаларига мувофиқ хорижий грантлар ва техникавий кўмаклашиш маблағлари.

5. Идоралараро тендер комиссияси ўз фаолиятида ушбу Низомга ҳамда тендер (танлов) савдоларини ташкил этиш ва ўтказиш бўйича қонун ҳужжатларига амал қилади. Инвестиция лойиҳалари халқаро ташкилотларнинг, халқаро молия ва иқтисодиёт институтларининг ва/ёки хорижий ҳукумат молия ташкилотларининг ва/ёки ҳукуматга қарашли бўлмаган ташкилотларнинг (кейинги ўринларда молиялаштирувчи ташкилотлари деб аталади) молиявий маблағлари ва/ёки грантлари ҳисобига амалга оширилган тақдирда тендер (танлов) савдоларини ўтказиш уларнинг тартиботлари бўйича амалга оширилади.

Иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматлар харид қилиш бўйича тендер (танлов) савдоларини идоралараро тендер комиссиялари томонидан ўтказиш ушбу Низомнинг иловасига мувофиқ схема бўйича амалга оширилади.

II. Идоралараро тендер комиссиясининг вазифалари ва функциялари

6. Қуйидагилар идоралараро тендер комиссиясининг вазифалари ҳисобланади:

иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматлар харид қилиш учун маблағлардан самарали ва оқилона фойдаланилишини таъминлаш;

харид қилинадиган товарлар, ишлар ва хизматлар сифатини ошириш;

тендер (танлов) савдоларини ўз вақтида ва сифатли ўтказиш бўйича тизимли ишларни ташкил этиш.

7. Идоралараро тендер комиссияси ўзига юкланган вазифаларни бажариш учун қуйидаги функцияларни амалга оширади:

ишчи органларнинг таркибларини тасдиқлайди;

тендер (танлов) ҳужжатларини ишлаб чиқишнинг ва тендер (танлов) савдоларини ўтказишнинг тармоқ жадвалини тасдиқлайди, унда ишчи орган молиялаштирувчи ташкилотларнинг норматив-ҳуқуқий ҳужжатлари ва харид қилиш қоидалари талаблари доирасида аниқланган тендер (танлов) савдолари қатнашчилари томонидан таклифлар беришнинг белгиланган муддатларини (оммавий ахборот воситаларида эълон берилган кундан бошлаб 30 кун ёки ёпиқ савдоларни ўтказишда таклифномалар юборилган кундан бошлаб 35 кун) мажбурий тартибда ҳисобга олади;

тендер (танлов) ҳужжатларини ва талабгорларга қўйилган тендер (танлов) таклифларини баҳолаш мезонларини тасдиқлайди;

қонун ҳужжатларига ва инвестиция лойиҳасини амалга оширишнинг тасдиқланган жадвалига мувофиқ тендер (танлов) таклифларини тайёрлаш муддатини белгилайди;

тендер (танлов) савдоларида қатнашиш учун қўйиладиган талабгорларни дастлабки малака бўйича танлашни амалга оширади, агар бу тендер (танлов) ҳужжатлари шартларида назарда тутилган бўлса;

тендер (танлов) савдоларида қатнашишга қўйишни рад этиш тўғрисида қарор қабул қилади, ишчи орган бу тўғрида талабгорларни ёзма шаклда хабардор қилади;

оферталар жойланган конвертларни очади, уларнинг тендер (танлов) савдоларининг шартларига мувофиқлигини текширади, конвертларни очиш тўғрисидаги протоколни тасдиқлайди;

тендер (танлов) таклифларини кўриб чиқиш ва баҳолаш муддатларини тасдиқлайди;

тендер (танлов) ҳужжатларини олиш учун тўлов миқдорини белгилайди;

зарурат бўлганда, тендер (танлов) таклифларини баҳолаш учун эксперт ва консультация ташкилотларининг вакилларини жалб этади;

талабгорларнинг буюртманомаларини ишчи орган томонидан кўриб чиқиш натижалари бўйича малака танловидан ўтган ва тендер (танлов) савдоларига қўйилган қатнашчилар рўйхатини тасдиқлайди, тендер (танлов) савдолари ғолибини аниқлайди;

ишчи орган ишлари натижалари бўйича иқтисодиётнинг тегишли тармоқларида ва ижтимоий соҳада амалга ошириладиган инвестиция лойиҳалари доирасида товарлар, ишлар ва хизматлар харид қилиш бўйича тендер (танлов) савдолари ғолибларини аниқлайди.

8. Ўзбекистон Республикаси Вазирлар Маҳкамасининг тегишли ахборот-таҳлил департаментлари раҳбарлари идоралараро тендер комиссияларининг масъул котиблари ҳисобланади.

9. Идоралараро тендер комиссияларининг масъул котиблари қуйидаги функцияларни бажарадилар:

идоралараро тендер комиссияларининг ишларини ташкил этишни таъминлайдилар;

тендер (танлов) ҳужжатларини ишлаб чиқишнинг ҳамда тендер (танлов) савдоларини ўтказишнинг йиллик, чораклик ва ойлик жадваллари ишчи орган томонидан бажарилиши юзасидан мониторингни амалга оширадилар;

тендер (танлов) таклифларини баҳолаш мезонларини, ишчи орган мажлисларининг белгиланган тартибда расмийлаштирилган протоколларини ҳам ўз ичига оладиган тендер (танлов) ҳужжатлари пакетини, шунингдек идоралараро тендер комиссияси талаби бўйича тендер (танлов) савдоларига тааллуқли бўлган бошқа ҳужжатларни ишчи органлардан қабул қилиб оладилар ва кўриб чиқиш учун идоралараро тендер комиссиясига тақдим этадилар;

идоралараро тендер комиссияси раиси билан келишган ҳолда идоралараро тендер комиссияси мажлисини чақиришни таъминлайдилар;

идоралараро тендер комиссияси таклифларини, шунингдек аъзоларининг фикр-мулоҳазаларини қабул қилиб оладилар ва тизимлаштирадилар;

идоралараро тендер комиссиясининг иш регламентига риоя этилиши юзасидан назоратни амалга оширадилар.

III. Идоралараро тендер комиссиясининг ишчи органи

10. Буюртмачи (буюртмачи ташкилот) ҳисобланадиган вазирлик ёки идора тендер (танлов) савдоларини ўтказишни ташкил этиш бўйича ишчи орган тузади.

Кейинги таҳрирга қаранг.

11. Ишчи орган таркиби идоралараро тендер комиссиясининг қарори билан тасдиқланади ва вазирлик ёки идора — лойиҳа ташаббускорининг, буюртмачи хизматининг, лойиҳалаш ташкилотининг, тижорат банкларининг, шунингдек тегишли вазирликлар ва идораларнинг юқори малакали мутахассисларидан шакллантирилади. Бунда буюртмачининг тегишли вазирлиги ёки идорасининг раҳбари ишчи орган раҳбари ҳисобланади.

12. Ишчи орган ўз фаолиятида қонун ҳужжатларига, шу жумладан Вазирлар Маҳкамасининг «Тендер савдоларини ташкил этишни такомиллаштириш чора-тадбирлари тўғрисида» 2000 йил 21 ноябрдаги 456-сон ва «Капитал қурилишда танлов савдолари тизимини такомиллаштириш чора-тадбирлари тўғрисида» 2003 йил 3 июлдаги 302-сон қарорларига, шунингдек ушбу Низомга амал қилади.

13. Ишчи орган қуйидаги функцияларни бажаради:

тендер (танлов) ҳужжатларини ишлаб чиқишнинг ва тендер (танлов) савдоларини ўтказишнинг йиллик тармоқ жадвалини тузади;

эълон беради ёки таклифномалар юборади;

тендер (танлов) савдолари қатнашчиларига тендер (танлов) ҳужжатларини беради;

тендерда қатнашиш учун талабгор томонидан тўланадиган закалатни тўлаш тартибини, миқдорини ва шаклини идоралараро тендер комиссиясига тасдиқлаш учун тақдим этади;

тендер (танлов) таклифларини баҳолаш мезонларини ишлаб чиқади ва идоралараро тендер комиссиясига тасдиқлаш учун киритади;

тендер (танлов) буюртманомаларини қабул қилишнинг охирги санасини, конвертларни очиш вақти ва жойини белгилайди;

Кейинги таҳрирга қаранг.

тендер (танлов) савдолари натижалари идоралараро тендер комиссияси томонидан тасдиқлангунгача тендер (танлов) таклифларини қабул қилади, рўйхатдан ўтказади ва сақлайди;

идоралараро тендер комиссиясининг қарори асосида тендер (танлов) савдоларига қатнашишга қўйишни рад этиш тўғрисида талабгорларни ёзма шаклда хабардор қилади;

тендер (танлов) таклифларини техник мезонлар, энг рақобатли нархлар, етказиб бериш, тўлов шартлари ва тендер (танлов) савдоларининг шартларида белгиланган бошқа параметрлар бўйича баҳолашни амалга оширади;

тендер (танлов) савдоларининг барча қатнашчилари учун тендер (танлов) таклифларини тақдим этиш муддатини узайтириш тўғрисида идоралараро тендер комиссияси билан келишган ҳолда қарор қабул қилади;

дастлабки малака бўйича танлов ва тендер (танлов) таклифларини баҳолаш натижалари бўйича идоралараро тендер комиссияси учун тавсиялар ишлаб чиқади.

14. Ишчи орган қуйидагиларга ҳақлидир:

талабгордан унинг малакавий маълумотларга мувофиқлигини тасдиқловчи қўшимча ҳужжатлар ва далилларни тақдим этишини белгиланган тартибда талаб қилиш;

талабгорларнинг малакавий маълумотларини ва тендер (танлов) таклифларини баҳолаш учун бошқа вазирликлар ва идоралардан ваколатли мутахассисларни, шунингдек эксперт ва бошқа ташкилотларнинг вакилларини жалб этиш бўйича таклифларни идоралараро тендер комиссиясига киритиш.

15. Талабгорларнинг дастлабки малакасини аниқлаш тендер (танлов) таклифларини очгунгача (тендер савдоларигача) ишчи орган томонидан амалга оширилади. Дастлабки малакани аниқлаш натижалари у тугалланган кундан бошлаб 2 кун мобайнида идоралараро тендер комиссиясига тақдим этилади. Идоралараро тендер комиссияси дастлабки малакани аниқлаш натижаларини ишчи орган томонидан ҳужжатлар тақдим этилган кундан бошлаб 3 кун мобайнида кўриб чиқади ва тасдиқлайди.

16. Тендер (танлов) таклифларини очиш идоралараро тендер комиссияси мажлисида, оммавий ахборот воситаларида берилган эълонда белгиланган муддатларга қатъий мувофиқ равишда кўрсатилган вақтда ва жойда, қатнашиш истагини билдирган талабгорлар иштирокида амалга оширилади, агар бу тендер тартиботларини ўтказиш тартибида назарда тутилган бўлса.

17. Тендер (танлов) таклифларини ишчи орган томонидан таққослаш ва баҳолаш тасдиқланган баҳолаш мезонларига ва тендер (танлов) ҳужжатларининг бошқа талабларига мувофиқ ҳолда амалга оширилади.

18. Баҳолаш тугалланган кундан бошлаб 3 кун мобайнида баҳолаш материаллари ва тавсиялар кўриб чиқиш ҳамда тасдиқлаш учун идоралараро тендер комиссиясига тақдим этилади.

Тендер ( танлов) савдоларининг натижаларини кўриб чиқиш ва тасдиқлаш ҳужжатлар ишчи орган томонидан тақдим этилган кундан бошлаб 3 кун мобайнида амалга оширилади.

19. Ишчи орган мажлисларида протоколлар юритилади, улар ишчи органнинг барча аъзолари томонидан имзоланади ва раис томонидан тасдиқланади.

20. Ишчи орган мажлисда умумий таркиб аъзоларининг камида 75 фоизи, шу жумладан раҳбар қатнашган тақдирда ваколатли ҳисобланади.

21. Тендер (танлов) савдолари тугагунгача тендер (танлов) таклифларининг ҳаммаси ишчи органда сақланади, савдолар тугаллангач барча тендер (танлов) таклифлари сақлаш учун буюртмачига берилади. Тендер таклифлари контракт тугаган санадан бошлаб 3 йил мобайнида сақланади.

IV. Идоралараро тендер комиссиясининг иш регламенти

22. Идоралараро тендер комиссиясининг қарорлари мажлисларда кўпчилик овоз билан қабул қилинади. Овозлар тенг бўлган тақдирда раиснинг овози ҳал қилувчи ҳисобланади

Идоралараро тендер комиссиясининг қарори мажлисдан кейин уч кун мобайнида протокол билан расмийлаштирилади, протокол мажлисда қатнашган аъзолар томонидан имзоланади ва идоралараро тендер комиссияси раиси томонидан тасдиқланади.

Кейинги таҳрирга қаранг.

23. Идоралараро тендер комиссияси мажлисда унинг аъзоларининг камида 75 фоизи, шу жумладан раиси қатнашган тақдирда ваколатли ҳисобланади.

24. Идоралараро тендер комиссияси ҳар бир аъзосининг овоз бериш натижалари тўғрисидаги ахборот қатъиян махфий тусда бўлади ва ошкор қилинмайди.

25. Тендер (танлов) савдолари ғолиби идоралараро тендер комиссиясининг қарори билан тасдиқланади. Унинг тўғрисидаги ахборот тегишли вазирлик ва идоранинг — буюртмачининг веб-сайтларига жойлаштирилади.

Кейинги таҳрирга қаранг.

26. Идоралараро тендер комиссиясининг қарорлари юзасидан қонун ҳужжатларига мувофиқ шикоят билдирилиши мумкин.

27. Идоралараро тендер комиссияси мажлислари тасдиқланган жадвалларга мувофиқ ўтказилади.

Кейинги таҳрирга қаранг.

V. Идоралараро тендер комиссиясининг жавобгарлиги

28. Идоралараро тендер комиссияси тендер (танлов) савдоларини ўтказиш соҳасидаги қонун ҳужжатларига риоя этилиши юзасидан жавоб беради.

29. Идоралараро тендер комиссияси савдолар бўлиб ўтмаган деб эътироф этилганда ёхуд салбий натижага эга бўлганда мулкий ёки бошқача юридик тарзда жавоб бермайди.

30. Идоралараро тендер комиссияси аъзолари комиссия мажлисларида шахсан иштирок этишлари учун шахсан жавоб берадилар. Фақат узрли сабабларга кўра иштирок этмасликка йўл қўйилади.

Идоралараро тендер комиссияси аъзоси узрли сабабларга кўра иштирок этмаган тақдирда мажлисга олдиндан фирма бланкасида расмийлаштирилган ишончнома асосида тегишли вазирлик ёки идоранинг унинг ўрнини босувчи ходими (раҳбари) юборилади. Тегишли тарзда расмийлаштирилган ишончномага эга бўлмаган унинг ўрнини босувчи ходим (раҳбар) идоралараро тендер комиссияси мажлисига қўйилмайди ҳамда ушбу ҳолат узрсиз сабабларга кўра иштирок этмаслик сифатида расмийлаштирилади.

Комиссия ёки ишчи орган аъзоси мажлисда узрсиз сабабларга кўра иштирок этмаганда идоралараро тендер комиссияси ёки ишчи орган котибининг билдиришномаси асосида унга нисбатан интизомий чоралар кўрилиши мумкин.

31. Тендер (танлов) савдолари натижаларига кўра тузилган шартномага ўзгартиришлар, буюртмачи ва пудратчи ўртасидаги келишувдан қатъи назар, улар идоралараро тендер комиссияси томонидан кўриб чиқилгандан ва белгиланган тартибда тасдиқлангандан кейин қабул қилинган деб ҳисобланади.

СХЕМАСИ

(Ўзбекистон Республикаси қонун ҳужжатлари тўплами, 2015 й., 37-сон, 485-модда; 2017 й., 25-сон, 544-модда)