Ҳужжат 08.09.2014 00 санаси ҳолатига
Амалдаги версияга ўтиш

Ўзбекистон Республикаси Президентининг

Тошкент давлат шарқшунослик институти таркибида хитойшунослик факультетини ташкил этиш тўғрисида

Замонавий педагогик ва ахборот-коммуникация технологияларидан фойдаланган ҳолда илғор ўқитиш услубларини жорий этиш асосида Хитой тарихи, маданияти, сиёсати ва иқтисодиёти соҳасида чуқур билимларга эга бўлган ва хитой тилини эркин биладиган юқори малакали хитойшунос мутахассисларни тайёрлаш мақсадида:

1. Ўзбекистон Республикаси Олий ва ўрта махсус таълим вазирлиги, Иқтисодиёт вазирлиги ва Молия вазирлигининг Тошкент давлат шарқшунослик институти таркибида хитойшунослик факультетини ташкил этиш тўғрисидаги таклифи маъқуллансин.

2. Тошкент давлат шарқшунослик институтининг бошқарув ходимлари чекланган сони 33 кишидан иборат янгиланган ташкилий тузилмаси 1-иловага мувофиқ тасдиқлансин.

Тошкент давлат шарқшунослик институти ректорига, зарур ҳолларда, Ўзбекистон Республикаси Олий ва ўрта махсус таълим вазирлиги билан келишилган ҳолда институт тузилмасига бошқарув ходимларининг белгиланган сони доирасида ўзгартишлар киритиш ҳуқуқи берилсин.

Кейинги таҳрирга қаранг.

3. Ўзбекистон Республикаси Олий ва ўрта махсус таълим вазирлиги, Тошкент давлат шарқшунослик институти ректорати 2014/2015 ўқув йили учун бакалавриатга қабул квоталари ҳисобидан қуйидаги таълим йўналишлари бўйича хитойшуносликка ихтисослаштириладиган талабаларнинг ўқув гуруҳларини шакллантирсин:

хитой филологияси — 34 киши;

жаҳон сиёсати — 25 киши;

мамлакатлар иқтисодиёти ва мамлакатшунослик — 25 киши.

Кейинги таҳрирга қаранг.

4. Тошкент давлат шарқшунослик институти таркибида хитойшунослик факультетини ташкил этиш билан боғлиқ ташкилий масалаларни ҳал қилиш учун 2-иловага мувофиқ таркибда махсус комиссия тузилсин.

Махсус комиссия (А.И. Икрамов) Ўзбекистон Республикаси Олий ва ўрта махсус таълим вазирлиги, Молия вазирлиги билан биргаликда бир ой муддатда:

хитойшунослик факультетини ташкил этиш ва институтнинг низом ҳужжатларига киритиладиган ўзгартишларни давлат рўйхатидан ўтказиш, шунингдек хитойшунослик факультетининг 2014 йил 20 сентябрдан тўлақонли фаолият кўрсата бошлашини таъминлаш учун бошқа ташкилий масалаларни ҳал этиш бўйича комплекс чора-тадбирларни амалга оширсин;

хитойшунослик факультетини амалий иш тажрибасига эга бўлган ҳамда хитой тили ва адабиётини, Хитой тарихи, сиёсати ва иқтисодиётини ўрганиш соҳасида илмий-амалий тадқиқотларни ўтказиш ва таълим бериш жараёнида замонавий педагогик ва ахборот-коммуникация технологияларидан фаол фойдаланувчи юқори малакали ташаббускор кадрлар билан таъминласин;

замонавий таълим технологияларини, энг янги ахборот ва ўқув-лаборатория ускуналарини татбиқ этиш ҳамда улардан кенг фойдаланиш асосида ўқув режалари ва дастурларини янгилаган ҳолда хитойшунослик масалалари бўйича ўқув жараёнини ташкил қилишни илғор халқаро тажрибани ҳисобга олиб, танқидий таҳлил қилсин ва қайта кўриб чиқсин.

5. Ўзбекистон Республикаси Олий ва ўрта махсус таълим вазирлиги Ўзбекистон Республикаси Ташқи иқтисодий алоқалар, инвестициялар ва савдо вазирлиги, Ташқи ишлар вазирлиги билан биргаликда уч ой муддатда Тошкент давлат шарқшунослик институти билан Хитойнинг шу йўналишдаги етакчи университетлари ва институтлари ўртасида институтда ишлаш ҳамда ўқитувчилик қилиш учун таниқли мутахассислар ва хитойшунос олимларни жалб этиш, институтнинг хитойшунослик факультети талабалари ва ўқитувчиларининг стажировкаларини ташкил қилиш, биргаликдаги ўқув ва тадқиқот дастурларини амалга ошириш мақсадида шериклик алоқаларини йўлга қўйиш, Тошкент давлат шарқшунослик институти ҳузуридаги Конфуций Институти фаолиятини янада ривожлантириш, шунингдек институт фаолиятини ташкил қилиш учун грантларни жалб этиш бўйича комплекс чора-тадбирларни ишлаб чиқсин ва амалга оширсин.

6. Ўзбекистон Республикаси Олий ва ўрта махсус таълим вазирлиги, Молия вазирлиги:

икки ҳафта муддатда Тошкент давлат шарқшунослик институтининг штатлар жадвали хитойшунослик факультети ташкил этилишини ҳисобга олган ҳолда қайта кўриб чиқилиши ва тасдиқланишини таъминласин;

ташкил этилаётган факультетнинг ўқув жараёни ва илмий-методик ишларини ташкил қилиш, унинг моддий-техника базасини мустаҳкамлаш, ўқитувчилар ва талабаларнинг чет эллардаги олий таълим муассасаларида стажировкадан ўтишлари учун Ўзбекистон Республикасининг Давлат бюджети параметрларида «Таълим» соҳасига ажратиладиган маблағлар доирасида 2014 йилда пул ажратсин ва 2015 йилдан бошлаб ушбу мақсадларга маблағ ажратилишини назарда тутсин.

7. Мазкур қарорнинг ижросини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Ўзбекистон Республикаси Президенти И. КАРИМОВ

Тошкент ш.,

2014 йил 3 сентябрь,

ПҚ-2228-сон

Ўзбекистон Республикаси Президентининг 2014 йил 3 сентябрдаги ПҚ-2228-сон қарорига
1-ИЛОВА

Тошкент давлат шарқшунослик институтининг

ташкилий тузилмаси

Институт кенгаши

РЕКТОР

Васийлик кенгаши

Ўқув ишлари бўйича биринчи проректор

Маънавий-маърифий ишлар бўйича проректор

Илмий ишлар бўйича проректор

Молия-иқтисод ишлари бўйича проректор

Мониторинг ва ички назорат бўлими

3 (1)

Ўқув-услубий бўлим

5 (1)

Маънавият ва маърифат, иқтидорли ёшлар билан ишлаш бўлими

3 (1)

Илм-фан ва илмий-педагогик кадрларни тайёрлаш бўлими

2 (1)

Молия-иқтисодиёт бўлими

5 (3)

Маркетинг бўлими

2 (1)

Магистратура бўлими

2 (1)

Кадрлар бўлими

3 (3)

Фуқаролик ҳимояси ва меҳнат муҳофазаси бўлими

3

Ахборот-ресурс

маркази

23 (1)

Бухгалтерия

8 (6)

Академик лицейлар ва касб-ҳунар коллежлар билан ишлаш бўлими

2 (1)

1 ва 2-бўлимлар

3 (1)

Ахборот

технологиялари

маркази

10 (2)

Техник хизмат

бўлими*

1 (1)

Канцелярия ва архив

5 (1)

5 та факультетлараро умумий таълим кафедралари

Нашриёт ва таҳрир бўлими

7 (1)

Таълимни техник воситалар билан таъминлаш бўлими

3

Халқаро алоқалар бўлими

2 (1)

Бош энергетик

1 (1)

Юрисконсульт

1 (1)

Факультетлар

Шарқ филологияси

Хитойшунослик

Жаҳон сиёсати, тарихи ва фалсафаси

Хорижий мамлакатлар иқтисодиёти ва мамлакатшунослик

Турдош кафедралар

9 та кафедра

3 та кафедра

4 та кафедра

2 та кафедра

Ходимларинг чекланган сони (техник, хизмат кўрсатувчи, ўқув-ёрдамчи ходимлар ва профессор ўқитувчилар таркиби бундан мустасно) — 100 нафар, шу жумладан бошқарув ходимлар — 33 нафар.

* Техник, хизмат кўрсатувчи ва ўқув-ёрдамчи ходимлар сони қонунчиликда ўрнатилган нормативлар бўйича белгиланади.

1-илова норасмий таржима

Кейинги таҳрирга қаранг.

Ўзбекистон Республикаси Президентининг 2014 йил 3 сентябрдаги ПҚ-2228-сон қарорига
2-ИЛОВА

Ўзбекистон давлат жаҳон тиллари университетининг хитой филологияси факультетини ташкил этиш билан боғлиқ ташкилий масалаларни ҳал қилиш бўйича махсус комиссия

А.И. Икрамов	—	Ўзбекистон Республикаси Бош вазирининг ўринбосари, Махсус комиссия раҳбари
А.В. Вахабов	—	Ўзбекистон Республикаси олий ва ўрта махсус таълим вазири
И.У. Мажидов	—	Олий ва ўрта махсус таълим вазирлиги бош бошқарма бошлиғи
А.М. Маннонов	—	Тошкент давлат шарқшунослик институти ректори
Ш.Ш. Қаюмов	—	Ўзбекистон давлат жаҳон тиллари университети ректори
Б.Х. Раҳимов	—	Олий ва ўрта махсус таълимни ривожлантириш маркази директори
М.Р. Болтабаев	—	Ўзбекистон Республикаси Вазирлар Маҳкамасининг АТД мудири, Махсус комиссия котиби

LexUZ шарҳи

2-илова норасмий таржима

(Ўзбекистон Республикаси қонун ҳужжатлари тўплами, 2014 й., 36-сон, 453-модда; 2017 й., 23-сон, 447-модда; Қонунчилик маълумотлари миллий базаси, 25.12.2021 й., 07/21/60/1177-сон; 31.08.2022 й., 06/22/214/0791-сон)