|
Ҳужжат кучини йўқотган " " 10.07.2017
|
Ўзбекистон Республикаси Президентининг
Фармони
«ЎЗҚИШЛОҚХЎЖАЛИКТАЪМИНОТТУЗАТИШ» ДАВЛАТ-КООПЕРАТИВ ҚЎМИТАСИНИ «ЎЗАГРОМАШСЕРВИС» УЮШМАСИ ЭТИБ ЎЗГАРТИРИШ ТЎҒРИСИДА
LexUZ шарҳиМазкур Фармон Ўзбекистон Республикаси Президентининг 2017 йил 28 июндаги ПФ-5098-сонли «Ўзбекистон Республикаси Президентининг айрим ҳужжатларига ўзгартиришлар киритиш, шунингдек баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг 2016 йил 17 ноябрдаги ««Ўзагротехсаноатхолдинг» акциядорлик жамиятини ташкил этиш тўғрисида» ПФ-4857-сонли Фармони, Ўзбекистон Республикаси Президентининг 2016 йил 17 ноябрдаги ««Ўзагротехсаноатхолдинг» акциядорлик жамияти фаолиятини ташкил этиш чора-тадбирлари тўғрисида» ПҚ-2658-сонли қарори)»ги Фармонига асосан ўз кучини йўқотган.
Қишлоқ хўжалигида иқтисодий ислоҳотларни янада чуқурлаштириш, қишлоқ хўжалик товар ишлаб чиқарувчиларига кўрсатиладиган механизациялаштирилган хизматлар даражаси ва сифатини ошириш, қишлоқда замонавий юқори унумли техникани кенг қўллаш, қишлоқ хўжалик техникасига сервис хизмати кўрсатиш ва уни таъмирлаш, соз ҳолатда сақлаш тизимини такомиллаштириш мақсадида:
1. Ўзбекистон Республикаси Давлат мулк қўмитасининг ҳамда «Ўзқишлоқхўжаликтаъминоттузатиш» Давлат-кооператив қўмитасининг:
Деҳқончилик саноати мажмуини моддий-техникавий таъминлаш ва техникани тузатиш давлат-кооператив қўмитаси («Ўзқишлоқхўжаликтаъминоттузатиш») ни қишлоқ хўжалигига техникавий хизмат кўрсатиш корхоналари уюшмаси – «Ўзагромашсервис» этиб ўзгартириш тўғрисидаги;
Қорақалпоғистон Республикасида ва вилоятларда машина-трактор паркларининг ҳудудий бирлашмаларини ташкил этиш ҳақидаги таклифлари қабул қилинсин.
2. Қуйидагилар «Ўзагромашсервис» уюшмаси фаолиятининг асосий вазифалари ва йўналишлари этиб белгилансин:
машина-трактор паркларини ривожлантириш истиқболларини белгилаш;
тараққий этган мамлакатларнинг тажрибасини ўрганиш ва механизациялаштирилган хизматларнинг замонавий усулларини ҳамда сервис хизматининг бошқа турларини бозор тамойиллари асосида қишлоқ хўжалиги амалиётига тадбиқ этиш;
қишлоқ хўжалик техникаси ва уларнинг эҳтиёт қисмларига, шу жумладан Ҳукумат қарорлари бўйича республикага олиб келинаётган шундай техника ва эҳтиёт қисмларга бўлган талаб-эҳтиёжни ўрганиш;
Фермер ва деҳқон хўжаликларига, бошқа қишлоқ хўжалик товар ишлаб чиқарувчиларига шартнома асосларида сервис ва таъмирлаш хизматининг шакл ҳамда услубларини кенгайтириш;
машина-трактор парклари томонидан қишлоқ хўжалик товар ишлаб чиқарувчиларига сервис хизмати кўрсатиш бўйича ягона меъёрий ва тариф базасини шакллантириш ҳамда Ўзбекистон Республикаси Хусусийлаштириш, монополиядан чиқариш ва рақобатни ривожлантириш давлат қўмитасининг иштирокида унга риоя этилишини назорат қилиш;
(2-банднинг олтинчи хатбошиси Ўзбекистон Республикаси Президентининг 2013 йил 28 августдаги ПФ-4561-сонли Фармони таҳририда — ЎР ҚҲТ, 2013 й., 36-сон, 477-модда)
хорижий сармояларни жалб этиш ва қўшма корхоналар барпо қилиш.
3. Белгилаб қўйилсинки, «Ўзагромашсервис» уюшмаси:
юридик шахс бўлиб, машина-трактор паркларининг ҳудудий бирлашмалари, шунингдек бошқа корхоналар ва ташкилотлар, шу жумладан қишлоқ хўжалигига механизациялаштирилган хизматлар кўрсатиш билан бевосита боғлиқ бўлган хорижий корхона ва ташкилотлар томонидан тузилади;
«Ўзқишлоқхўжаликтаъминоттузатиш» Давлат-кооператив қўмитасининг ҳуқуқий вориси ҳисобланади.
4. Машина-трактор паркларининг ҳудудий бирлашмалари тегишли равишда Қорақалпоғистон Республикасида ва вилоятларда жойлашган машина-трактор паркларини, қишлоқ хўжалик техникасини таъмирловчи корхоналарни ҳамда қишлоқ хўжалик кооперативлари (ширкатлари) га, фермер ва деҳқон хўжаликларига техник ва сервис хизматини таъминловчи бошқа корхоналар ҳамда ташкилотларни бирлаштирувчи очиқ турдаги акциядорлик жамиятлари шаклида ташкил қилиниши белгилаб қўйилсин.
Машина-трактор паркларининг ҳудудий бирлашмалари зиммасига қуйидаги асосий вазифаларни ҳал этиш юклансин:
машина-трактор парклари томонидан республика қишлоқ хўжалик товар ишлаб чиқарувчиларини шартнома асосида механизациялаштирилган хизматлар билан, жумладан шудгорлаш ва экин экиш олдидан тупроққа ишлов бериш, бошоқли дон экинлари, шоли ва хашаки экинларни йиғиштириш, пахтани машинада йиғиб-териб олиш, транспорт ҳамда механизациялаштирилган хизматларнинг бошқа турлари билан таъминлаш;
машина-трактор паркларини ривожлантириш, таъмирлаш базаларини яратиш, тракторлар, ғалла ўриш ва пахта териш комбайнлари ҳамда бошқа қишлоқ хўжалик техникасига сервис хизмати кўрсатиш ва уларни таъмирлаш;
замонавий қишлоқ хўжалик техникасига, шу жумладан импорт техникага буюртманомаларни машина-трактор паркларидан йиғиб олиш ва умумлаштириш;
машина-трактор паркларига лизинг асосида қишлоқ хўжалик техникаси етказиб бериш тўғрисида «Ўзқишлоқхўжаликмашлизинг» компанияси билан шартномалар тузиш;
машина-трактор паркларининг қишлоқ хўжалик кооперативлари (ширкатлари) ва фермер хўжаликлари билан энг аввало Қорақалпоғистон Республикаси ва вилоятлар бўйича тарифларнинг миқдорларига нисбатан ягона меъёрлар ҳамда талабларга риоя этилиши масалаларида шартномалар тузиш борасидаги ишлари устидан назоратни амалга ошириш;
бажарилган ишлар ва сотиб олинган техника учун ўз вақтида ҳисоб-китоб қилинишини, хорижий ва ички кредитлар тўланишини таъминлаш, бирлашма таркибига кирган корхоналар ва ташкилотлар фаолияти устидан молиявий ҳамда бухгалтерик назоратини амалга ошириш.
5. Ўзбекистон Республикаси Вазирлар Маҳкамасининг Агросаноат комплекси, Давлат мулк қўмитаси, Қорақалпоғистон Республикаси Вазирлар Кенгаши ва вилоят ҳокимликлари 2000 йилнинг 1 декабрига қадар белгиланган тартибда «Ўзагромашсервис» уюшмасини шакллантиришни ҳамда машина-трактор паркларининг ҳудудий бирлашмаларини ташкил қилишни ниҳоясига етказиб, уларни малакали, касб жиҳатдан тайёрланган кадрлар билан таъминласинлар.
6. Белгилаб қўйилсинки, марказлаштирилган молиявий маблағлар ҳисобига импорт бўйича харид қилинадиган қишлоқ хўжалик техникасини тақсимлаш машина-трактор парклари ҳудудий бирлашмаларининг буюртманомалари асосида Ўзбекистон Республикаси Вазирлар Маҳкамасининг қарори билан амалга оширилади.
7. «Ўзбекистон ССР Моддий техника таъминоти ва агросаноат комплекси техникасини ремонт қилиш давлат-кооператив комитетини ташкил этиш ҳақида» Ўзбекистон ССР Президентининг 1991 йил 15 апрелдаги Фармони ўз кучини йўқотган деб ҳисоблансин.
8. Вазирлар Маҳкамаси ўн кун муддатда «Ўзагромашсервис» уюшмасининг фаолиятини ташкил этиш тўғрисида қарор қабул қилсин.
Ўзбекистон Республикасининг Президенти И. КАРИМОВ
Тошкент ш.,
2000 йил 31 октябрь,
ПФ-2741-сон
(Ўзбекистон Республикаси Олий Мажлисининг Ахборотномаси, 2000 й., 9-10-сон, 281-модда; Ўзбекистон Республикаси қонун ҳужжатлари тўплами, 2005 й., 28-29-сон, 204-модда; 2010 й., 17-сон, 130-модда; 2013 й., 36-сон, 477-модда)
