|
Ҳужжат 28.04.2000 00 санаси ҳолатига
Амалдаги версияга ўтиш |
Ўзбекистон Республикаси Президентининг
Фармони
Нефть ва газ конларини разведка қилиш ҳамда уларни қазиб чиқаришга бевосита хорижий сармояларни жалб этиш чора-тадбирлари тўғрисида
Қидириш ва разведка қилиш ишлари самарадорлигини ошириш, углеводород хом ашёсининг қидириб топиладиган захира ҳажмларини кўпайтириш ва республика иқтисодиётининг нефть-газ тармоғига бевосита хорижий сармояларни жалб этиш учун қулай шарт-шароитларни яратиш мақсадида:
1. Белгилаб қўйилсинки, Устюрт ва республиканинг нефть ва газга бой бошқа истиқболли минтақаларида қидирув ва разведка ишларини жадал олиб бориш, шу мақсадда бевосита хорижий сармояларни кенг кўламда жалб этиш Ўзбекистон Республикасининг нефть-газ тармоғини ривожлантиришда ғоят муҳим устувор йўналиш ҳисобланади.
2. Шу нарса белгилансинки, Устюрт минтақасида янги очилган нефть ва газ конлари мазкур конларда геология-қидирув ишларини амалга оширган хорижий компанияларга концессия асосида 25 йилга қадар муддатга ишлатишга (ишлатиш муддатини узайтириш ҳуқуқи билан) берилиши мумкин.
3. Нефть ва газ конларини қидириш ҳамда разведка қилиш ишларини олиб бориш учун жалб этиладиган хорижий компанияларга қуйидагиларни таъминлайдиган энг кўп қулайлик режими яратиб берилсин:
муайян ҳудудда қидирув ва разведка ишларини ўтказиб, кейинчалик мазкур ҳудудда аниқланган конлардан исталган бирини қўшма корхона барпо этиш йўли билан ёки концессия асосида ишлатишга бўлган танҳо ҳуқуқни;
мазкур ишларни ўтказишга шартномада кўрсатилган ҳудудларда саноат қимматига эга бўлган ресурслар топилмаган ҳолларда қидирув ва разведка ишларини давом эттириш учун янги ҳудуд берилишига устун ҳуқуқни;
қўшма корхонанинг таъсис ҳужжатларида ёки концессия шартномасида кўзда тутилган қазиб олинган углеводородларнинг бир қисмини, шунингдек уларни толлинг асосида қайта ишлаш маҳсулотларини мулкка эгалик ҳуқуқи ҳамда монесиз олиб чиқиб кетиш ҳуқуқини;
саноат қимматига эга бўлган конларни кейинчалик «Ўзбекнефтгаз» Миллий холдинг компаниясига ишлатиш учун топшириладиган ҳолларда ана шу конларни очиш чоғида қидирув ва разведка ишларига амалда сарфланган харажатларни қоплаш кафолатини.
Кейинги таҳрирга қаранг.
4. Нефть ва газ конларини қидириш ва разведка қилиш ишларини амалга оширувчи хорижий компаниялар, шунингдек улар томонидан жалб этиладиган хорижий пудрат ва ёрдамчи пудрат ташкилотлари қуйидагиларни тўлашдан озод қилинсин:
геология-разведка ишларини ўтказиш даврида Ўзбекистон Республикаси ҳудудида амал қилувчи барча турдаги солиқлар, ажратмалар ва тўловларни;
Кейинги таҳрирга қаранг.
қидириш, разведка қилиш ва бошқа тегишли ишларни амалга ошириш учун зарур бўлган машина-ускуналарни, моддий-техника ресурслари ва хизматларни импорт қилиш чоғида божхона тўловларини (божхонада расмийлаштириладиган ишлар учун олинадиган йиғимлардан ташқари).
Кейинги таҳрирга қаранг.
5. Белгилансинки, нефть ва газ конларини қидириш ва разведка қилиш ишларини олиб бораётган хорижий компанияларга материаллар етказиб бериш, ишлар ва хизматларни бажариш билан шуғулланувчи Ўзбекистон Республикасининг резидент корхоналари ва ташкилотлари қўшилган қиймат солиғини тўлашдан озод этиладилар.
Кейинги таҳрирга қаранг.
6. Қуйидагилар белгилаб қўйилсин:
хорижий компаниялар кўрсатилган ҳудудларда танҳо ҳуқуқ асосида олиб борадиган қидирув ва разведка ишларининг давом этиш умумий муддати 5 йилдан ошиши мумкин эмас;
геология-қидирув ишларини давом эттириш учун қизиқиш уйғотувчи майдонлар аниқланган ҳолларда хорижий компанияларга яна 3 йилгача муддат билан ана шу майдонлар доирасида ишларни давом эттириш имконияти берилади;
хорижий компаниялар ер қаъридан мўлжалланган аниқ мақсадга мувофиқ фойдаланишни, геологик жиҳатдан ўрганиш тўла-тўкис бўлишини, ер қаъридан оқилона комплекс фойдаланиш ҳамда унинг муҳофаза этилишини таъминлайдилар.
7. Нефть ва газ конларини қидириш ва разведка қилиш ишларини амалга оширган хорижий компаниялар иштирокида ташкил этиладиган нефть ва газ қазиб чиқарувчи қўшма корхоналар қуйидагилардан озод қилинсин:
нефть ёки газ қазиб олинишидан бошлаб етти йил муддатга фойда солиғи тўлашдан. Ушбу муддат тугагандан сўнг мазкур қўшма корхоналарнинг фойдасидан олинадиган солиқ ставкаси амалдаги ставканинг 50 фоизи миқдорида белгиланади;
мулк солиғи ва хорижий қатнашчиларнинг қўшма корхоналардаги улуши иштирокидан олинадиган даромад солиғини тўлашдан;
қидирув ва разведка ишларига сарфланган маблағларни қоплаш даврида нефть ва газ қазиб чиқариш ҳамда қайта ишлаш борасидаги фаолият натижасида олинган маҳсулотни сотишдан тушган валюта тушумининг бир қисмини мажбурий сотишдан.
Кейинги таҳрирга қаранг.
Кейинги таҳрирга қаранг.
8. Вазирлар Маҳкамасига айрим ҳолларда қуйидагиларга рухсат берилсин:
Ўзбекистон Республикасида нефть ва газ конларини қидириш, разведка қилиш ҳамда қазиб чиқариш билан шуғулланувчи хорижий компанияларга қўшимча имтиёзлар ва преференциялар бериш;
танлов ва аукционларни ўтказмаган ҳолда вакил орган билан стратегик сармоядор ўртасида тўғридан-тўғри музокаралар олиб бориш асосида концессиялар бериш.
9. «Ўзбекнефтгаз» Миллий холдинг компанияси зиммасига Ўзбекистон Республикаси ҳудудида нефть-газ фаолиятини (нефть ва газни қидириш, разведка қилиш, қазиб чиқаришни) тартибга солувчи вакил орган ҳамда нефть-газ тармоғида концессия муносабатини давлат йўли билан бошқариш вазифалари юкланиб, Вазирлар Маҳкамасининг қарорига биноан қуйидаги ҳуқуқ берилсин:
Кейинги таҳрирга қаранг.
нефть-газ фаолиятини юритишга шартномалар тузиш, уларнинг амалга оширилишини ҳамда қонунчилик ва шартномаларда белгиланган фаолият шартларига риоя этилишини назорат қилиш;
углеводород конларини қидириш ва разведка қилиш, нефть ва газ қазиб чиқариш учун махсус рухсатномалар (лицензиялар) бериш.
Кейинги таҳрирга қаранг.
10. «Ўзбекнефтгаз» Миллий холдинг компаниясига нефть ва газ конлари тўғрисидаги маълумотни, шу жумладан уларнинг қаерда жойлашгани, захиралари, қазиб чиқариш ҳажмлари, ишлатилаётган, капитал таъмирланаётган ва консервация қилинган қудуқларнинг сони ҳақидаги ахборотни махфийлик тўғрисидаги битимлар асосида халқаро консультантларга ва хорижий сармоядорларга топшириш ҳуқуқи берилсин.
Кейинги таҳрирга қаранг.
11. «Ўзбекнефтгаз» Миллий холдинг компанияси 2000—2005 йилларга мўлжалланган геология-разведка ишлари дастурини кўриб чиқиб, белгиланган тартибда Вазирлар Маҳкамасига тасдиқлаш учун киритсин.
12. Ўзбекистон Телерадиокомпанияси, Ўзбекистон Миллий ахборот агентлиги, «Жаҳон» ахборот агентлиги, Ўзбекистон Республикаси Давлат матбуот қўмитаси Ўзбекистоннинг нефть-газ тармоғини ривожлантириш истиқболлари оммавий ахборот, шу жумладан хорижий оммавий ахборот воситаларида кенг ёритилишини таъминласинлар.
13. Ўзбекистон Республикаси Вазирлар Маҳкамаси ўн кун муддатда ушбу Фармон ижроси юзасидан қарор қабул қилсин.
Ўзбекистон Республикасининг Президенти И. КАРИМОВ
Тошкент ш.,
2000 йил 28 апрель,
ПФ-2598-сон
(Ўзбекистон Республикаси Олий Мажлисининг Ахборотномаси, 2000 й., 4-сон, 123-модда; Ўзбекистон Республикаси қонун ҳужжатлари тўплами, 2007 й., 23-сон, 233-модда; 2009 й., 8-сон, 76-модда, 25-сон, 282-модда; 2014 й., 29-сон, 356-модда; Қонун ҳужжатлари маълумотлари миллий базаси, 18.10.2017 й., 06/17/5207/0139-сон; 18.06.2020 й., 06/20/6010/0776-сон, 19.06.2020 й., 06/20/6011/0780-сон)
