Ўзбекистон Республикаси Президентининг «Ангрен» махсус индустриал зонасини барпо этиш тўғрисида» 2012 йил 13 апрелдаги ПФ-4436-сон Фармонини бажариш юзасидан Вазирлар Маҳкамаси қарор қилади:

1. Қуйидагилар:

«Ангрен» махсус индустриал зонаси тўғрисидаги низом 1-иловага мувофиқ;

«Ангрен» махсус индустриал зонасининг Маъмурий кенгаши тўғрисидаги низом 2-иловага мувофиқ тасдиқлансин.

2. Бошқарув ходимлари сони 8 нафар ва 3-иловага мувофиқ тузилмага эга бўлган «Ангрен» махсус индустриал зонаси дирекцияси» (кейинги ўринларда «Ангрен» МИЗ дирекцияси деб аталади) давлат унитар корхонаси ташкил этилсин.

«Ангрен» МИЗнинг Маъмурий кенгашига «Ангрен» МИЗ ҳудудида амалга ошириладиган лойиҳалар сони кўпайишига қараб «Ангрен» МИЗ дирекцияси тузилмасига ва ходимлари сонига ўзгартиришлар киритиш ҳуқуқи берилсин.

3. Белгилансинки, «Ангрен» МИЗ дирекцияси:

Ўзбекистон Республикаси Вазирлар Маҳкамаси томонидан таъсис этилади;

«Ангрен» МИЗ бюджети маблағлари ҳисобига таъминланади;

«Ангрен» МИЗ Маъмурий кенгаши томонидан қабул қилинган қарорларга мувофиқ «Ангрен» МИЗ қатнашчиларини рўйхатдан ўтказади;

инвесторлар билан «Ангрен» МИЗ ҳудудида инвестициялаш тўғрисида битимлар, давлат эгалигидаги мол-мулкни нолга тенг харид қиймати бўйича сотиш тўғрисида «Ангрен» МИЗ Маъмурий кенгашининг қарорларига мувофиқ «Ангрен» МИЗ қатнашчилари билан шартномалар тузади;

ўз зиммасига қабул қилинган мажбуриятларнинг инвесторлар томонидан зарур тарзда бажарилишини назорат қилади, кейинчалик унинг натижаларини «Ангрен» МИЗ Маъмурий кенгашига тақдим этади;

«Ангрен» МИЗ фаолиятини тезкор бошқариш бўйича бошқа функцияларни амалга оширади.

4. Ўзбекистон Республикаси Молия вазирлиги 2012-2013 йиллар даврида «Ангрен» МИЗ дирекцияси таъминоти учун, кейинги йилларда унинг ўзини ўзи молиялаштиришга ўтиши шарти билан, асосланган ҳисоб-китоблар бўйича Вазирлар Маҳкамасининг захира жамғармасидан маблағлар ажратсин.

5. «Ангрен» МИЗ Маъмурий кенгаши бир ой муддатда «Ангрен» МИЗ дирекцияси уставини тасдиқлаш учун Вазирлар Маҳкамасига киритсин.

6. «Ангрен» МИЗ дирекцияси қуйидаги манзил бўйича Ангрен шаҳар ҳокимлиги биносида жойлаштирилсин: Тошкент вилояти, Ангрен шаҳри, Истиқлол кўчаси, 2-уй.

Тошкент вилояти ҳокимлиги «Ангрен» МИЗ дирекциясини кўрсатилган манзил бўйича хизмат хоналари билан бепул таъминласин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С.Азимов зиммасига юклансин.

1. Ушбу Низом «Ангрен» махсус индустриал зонаси фаолият кўрсатишининг ҳуқуқий асосларини белгилайди.

2. Ушбу Низом мақсадлари учун қуйидаги тушунчалардан фойдаланилади:

«Ангрен» махсус индустриал зонаси (кейинги ўринларда — «Ангрен» МИЗ деб аталади) — Ўзбекистон Республикаси Президентининг ««Ангрен» махсус индустриал зонасини барпо этиш тўғрисида» 2012 йил 13 апрелдаги ПФ-4436-сон Фармонига 1-иловага мувофиқ ва «Ангрен» МИЗ Маъмурий кенгашининг қарорларига биноан чегаралар билан Ўзбекистон Республикаси Тошкент вилояти ҳудудининг бир қисми;

«Ангрен» МИЗнинг Маъмурий кенгаши (кейинги ўринларда Маъмурий кенгаш деб аталади) — Ўзбекистон Республикаси Президентининг Фармони билан «Ангрен» МИЗ фаолиятини мувофиқлаштириш ва давлат томонидан бошқариш функциясини амалга оширадиган, давлат ва хўжалик бошқаруви органлари вакилларидан тузиладиган коллегиал орган;

«Ангрен» МИЗ дирекцияси (кейинги ўринларда Дирекция деб аталади) — «Ангрен» МИЗ фаолиятини тезкор бошқариш учун ташкил этиладиган давлат унитар корхонаси шаклидаги юридик шахс;

инвестор — белгиланган тартибда танловдан ўтган ҳамда «Ангрен» МИЗ ҳудудида инвестициялашни амалга оширадиган инвестиция фаолияти субъекти;

«Ангрен» МИЗ ҳудудида инвестициялаш тўғрисидаги битим (кейинги ўринларда инвестициялаш тўғрисидаги битим деб аталади) — Дирекция билан инвестор ўртасида тузиладиган, уларнинг ҳуқуқлари, мажбурияти ва жавобгарлигини белгилайдиган битим;

«Ангрен» МИЗ хўжалик фаолияти қатнашчиси (кейинги ўринларда «Ангрен» МИЗ қатнашчиси деб аталади) — белгиланган тартибда «Ангрен» МИЗ ҳудудида рўйхатдан ўтказилган ва Дирекция томонидан «Ангрен» МИЗ қатнашчилари реестрига киритилган хўжалик юритувчи субъект;

ер участкасидан фойдаланиш тўғрисидаги шартнома — Тошкент вилояти ҳокимлиги билан «Ангрен» МИЗ қатнашчиси ўртасида тузиладиган «Ангрен» МИЗ ҳудудида ер участкасидан муддатли фойдаланиш тўғрисидаги шартнома;

«Ангрен» МИЗ ҳудудидаги фаолият — «Ангрен» МИЗ қатнашчисининг «Ангрен» МИЗ ҳудуди доирасида инвестициялаш тўғрисидаги битимда назарда тутилган товарлар ва маҳсулотларни ишлаб чиқариш ҳамда қайта ишлаш, шунингдек уларни сотиш бўйича хўжалик фаолияти.

3. «Ангрен» МИЗ ҳудудида давлат органларининг фаолияти ва Ўзбекистон Республикаси қонун ҳужжатларининг қўлланилиши Ўзбекистон Республикаси Президентининг «Ангрен» махсус индустриал зонасини барпо этиш тўғрисида» 2012 йил 13 апрелдаги ПФ-4436-сон Фармонида ва уни ижро этиш мақсадида қабул қилинган норматив-ҳуқуқий ҳужжатларда, инвестициялаш тўғрисидаги халқаро шартномалар ва битимларда, шунингдек ушбу Низомда назарда тутилган хусусиятлар ҳисобга олинган ҳолда амалга оширилади.

4. «Ангрен» МИЗ ҳудудида архитектура ва шаҳарсозлик фаолияти қуришнинг дастлабки режасига ёки «Ангрен» МИЗни ривожлантириш бош режасига мувофиқ амалга оширилади. Лойиҳа-смета ҳужжатлари Ўзбекистон Республикаси Давлат архитектура ва қурилиш қўмитаси билан келишилади.

5. «Ангрен» МИЗ ҳудудидаги ер участкалари тўғридан-тўғри Тошкент вилояти ҳокимлиги тасарруфида бўлади ва унинг томонидан «Ангрен» МИЗ қатнашчиларига Маъмурий кенгашнинг қарори асосида, белгиланган тартибда берилади.

6. «Ангрен» МИЗнинг фаолият кўрсатиш муддати 30 йилни ташкил этади. Ушбу муддат Ўзбекистон Республикаси Президентининг қарори билан узайтирилиши мумкин.

7. Қуйидагилар «Ангрен» махсус индустриал зонаси фаолиятининг асосий вазифалари ва йўналишлари ҳисобланади:

ички ва жаҳон бозорларида рақобатбардошли бўлган юқори қўшилган қийматга эга маҳсулот ишлаб чиқариш бўйича замонавий, юқори технологияли ишлаб чиқаришларни барпо этиш ва уларнинг самарали фаолият юритиши учун инвестициялар, энг аввало тўғридан-тўғри инвестицияларни жалб этиш борасида қулай шарт-шароитларни шакллантириш;

махсус индустриал зонага кирувчи минтақанинг ишлаб чиқариш ва ресурс салоҳиятидан комплекс ва самарали фойдаланишни таъминлаш, минерал-хом ашё ресурсларини янада чуқур қайта ишлаш бўйича янги ишлаб чиқаришларни барпо этиш;

махсус индустриал зона ва умуман республика корхоналари ўртасида мустаҳкам кооперация алоқалари ўрнатиш ҳамда саноат кооперациясини ривожлантириш асосида маҳаллий хом ашё ва материаллар негизида юқори технологияли маҳсулот ишлаб чиқаришни маҳаллийлаштириш жараёнларини чуқурлаштириш;

транспорт, муҳандислик-коммуникация ва ижтимоий инфратузилмани жадал ривожлантириш ҳамда улардан самарали фойдаланиш, «Ангрен» логистика маркази салоҳиятини, юкларни автомобиль ва контейнерларда ташиш борасида яратилган тизимни янада ривожлантириш ҳамда улардан кенг кўламда фойдаланишни таъминлаш.

8. «Ангрен» МИЗ фаолиятини мувофиқлаштириш ва давлат томонидан тартибга солиш функцияси Маъмурий кенгаш томонидан амалга оширилади. Маъмурий кенгаш тўғрисидаги низом Ўзбекистон Республикаси Вазирлар Маҳкамаси томонидан тасдиқланади.

9. «Ангрен» МИЗ фаолиятини тезкор бошқариш Дирекция томонидан амалга оширилади.

10. «Ангрен» МИЗ дирекцияси:

«Ангрен» МИЗ Маъмурий кенгашининг қабул қилинган қарорларига мувофиқ «Ангрен» МИЗ қатнашчиларини рўйхатдан ўтказади;

инвесторлар билан «Ангрен» МИЗ ҳудудида инвестициялаш тўғрисида битимлар, давлат эгалигида бўлган мол-мулкни нолга тенг харид қиймати бўйича сотиш тўғрисида ва «Ангрен» МИЗнинг Маъмурий кенгаши қарорларига мувофиқ ер участкаларидан фойдаланиш тўғрисида «Ангрен» МИЗ қатнашчилари билан шартномалар тузади;

белгиланган тартибда танлаб олинган инвесторлар томонидан ўз зиммаларига қабул қилинган мажбуриятларнинг зарур тарзда бажарилишини назорат қилади, кейинчалик унинг натижаларини Маъмурий кенгашга тақдим этади;

«Ангрен» МИЗ ҳудудида жойлашган давлат мулки бўлган кўчмас мулк объектларини ўзига берилган ваколатлар доирасида бошқаради;

қабул қилинган мажбуриятлар бажарилмаган тақдирда инвестициялаш тўғрисидаги битимларни бекор қилиш тўғрисида даъво аризалари билан Маъмурий кенгашнинг қарорлари асосида судга мурожаат қилади;

«Ангрен» МИЗ фаолиятини тезкор бошқариш бўйича бошқа функцияларни амалга оширади.

11. «Ангрен» МИЗ дирекцияси Ўзбекистон Республикаси Молия вазирлиги билан келишган ҳолда, ҳар йили тегишли молиявий йил учун «Ангрен» МИЗнинг мустақил бюджети лойиҳасини ишлаб чиқади ва тасдиқлаш учун Маъмурий кенгашга тақдим этади.

«Ангрен» МИЗнинг мустақил бюджети:

давлат мулки бўлган ва «Ангрен» МИЗ ҳудудидаги бинолар ва иншоотларни ижарага беришдан тушумлар;

хизматлар кўрсатишдан олинган даромадлар;

«Ангрен» МИЗ қатнашчиларининг Маъмурий кенгаш томонидан белгиланадиган миқдорлардаги ажратмалари;

инвестиция дастурида назарда тутилган мақсадли бюджет маблағлари;

қонун ҳужжатларида тақиқланмаган бошқа тушумлар ҳисобига шакллантирилади.

12. «Ангрен» МИЗ бюджети маблағларидан:

маблағлари «Ангрен» МИЗ инфратузилмасини ривожлантиришга ва унинг фаолият кўрсатиши самарадорлигини оширишга йўналтириладиган «Ангрен» МИЗни ривожлантириш жамғармасини ташкил этиш;

белгиланган тартибда «Ангрен» МИЗ дирекцияси таъминоти;

Ўзбекистон Республикаси Президентининг «Ангрен» махсус индустриал зонасини барпо этиш тўғрисида» 2012 йил 13 апрелдаги ПФ-4436-сон Фармонини бажаришга йўналтирилган бошқа вазифалар амалга оширилишини молиялаштириш учун фойдаланилади.

«Ангрен» МИЗни ривожлантириш жамғармаси тўғрисидаги низом Маъмурий кенгаш томонидан тасдиқланади.

13. Дирекциянинг штат жадвали ва харажатлари сметаси Маъмурий кенгаш томонидан тасдиқланади.

14. Қуйидагилар «Ангрен» МИЗ қатнашчиси мақомини бериш учун хўжалик юритувчи субъектларни танлаб олиш мезонлари ҳисобланади:

замонавий ишлаб чиқаришлар ташкил этиш ёки ишлаб турган корхоналарни чуқур модернизация қилиш, уларни юқори технологик асбоб-ускуналар ва технологиялар билан жиҳозлаш;

табиий хом ашё ресурсларини қазиб олиш ва дастлабки қайта ишлаш корхоналаридан ташқари, фаолият ихтисослашувининг «Ангрен» МИЗнинг асосий вазифаларига мувофиқлиги;

муассисларнинг ўз маблағлари ва улар томонидан Ўзбекистон Республикасининг кафолатлари берилмаган жалб этилган кредитлар ҳисобига инвестицияларни амалга ошириш;

«Ангрен» МИЗда харидоргир бўлган, импортнинг ўрнини босувчи ва экспортга йўналтирилган рақобатбардошли маҳсулотлар ишлаб чиқариш бўйича технологик боғлиқликни босқичма-босқич шакллантириш;

имтиёзлар амал қилиши мобайнида уларнинг қўлланилишидан олинган даромаднинг камида 50 фоизини корхонага қайта инвестициялаш бўйича инвесторлар томонидан мажбуриятлар қабул қилиниши.

15. «Ангрен» МИЗ қатнашчисига бериладиган гувоҳнома унинг «Ангрен» МИЗ ҳудудидаги фаолиятига нисбатан унинг алоҳида солиқ режими ва божхона имтиёзларини қўллаш ҳуқуқларининг тасдиғи ҳисобланади.

16. «Ангрен» МИЗ қатнашчисига, у белгиланган тартибда рўйхатдан ўтказилгандан кейин «Ангрен» МИЗ ҳудудидаги фаолиятга тегишли қисми юзасидан инвестициялаш тўғрисидаги тегишли битимда мустаҳкамланган мажбуриятлар юкланади.

«Ангрен» МИЗ қатнашчиси инвестициялаш тўғрисидаги битим бўйича ўз ҳуқуқ ва мажбуриятларини бошқа шахсга беришга ҳақли эмас.

17. Ўзбекистон Республикаси Президентининг ««Ангрен» махсус индустриал зонасини барпо этиш тўғрисида» 2012 йил 13 апрелдаги ПФ-4436-сон Фармонида белгиланган имтиёзлар ва устунликлар фақат Дирекция билан тузиладиган инвестициялаш тўғрисидаги битимда назарда тутилган «Ангрен» МИЗ қатнашчиси фаолияти турларига жорий этилади.

18. «Ангрен» МИЗ қатнашчиларига ер участкалари Тошкент вилояти ҳокимлиги томонидан қурилишнинг дастлабки режасига ёки «Ангрен» МИЗнинг Бош режасига мувофиқ ер участкаларидан фойдаланиш тўғрисидаги шартномалар асосида берилади.

19. «Ангрен» МИЗ қатнашчилари бўлмаган хўжалик юритувчи субъектлар «Ангрен» МИЗ ҳудудида фаолиятни қонун ҳужжатларига мувофиқ амалга ошириш ҳуқуқига эга.

20. «Ангрен» МИЗ қатнашчиларининг Ўзбекистон Республикасида «Ангрен» МИЗ ҳудудидан ташқарида ўз филиалларини ташкил этишига йўл қўйилмайди.

21. «Ангрен» МИЗ қатнашчиси мақомидан маҳрум этишга ихтиёрий ёки суд тартибида йўл қўйилади.

22. «Ангрен» МИЗга доир низолар қонун ҳужжатларига ва инвестициялаш тўғрисидаги битимларга мувофиқ ҳал этилади.

23. Махсус солиқ режими ва божхона имтиёзларининг амал қилиши фақат қатнашчиларнинг «Ангрен» МИЗ ҳудудида амалга ошириладиган фаолиятига татбиқ этилади.

24. Қонун ҳужжатларида белгиланган имтиёзлар ва устунликларнинг амал қилиш муддати хўжалик юритувчи субъект «Ангрен» МИЗ қатнашчилари реестрига киритилган санадан бошлаб ҳисобланади.

25. «Ангрен» МИЗ қатнашчиларининг бошқа соҳалардаги фаолиятини тартибга солиш умумий белгиланган тартибда амалга оширилади.

26. «Ангрен» МИЗ фаолияти уни ташкил этишнинг белгиланган муддати тамом бўлгандан кейин тўхтатилиши мумкин.

27. «Ангрен» МИЗ фаолиятининг муддатидан олдин тўхтатилишига Ўзбекистон Республикасининг миллий хавфсизлиги манфаатларини ҳимоя қилишни таъминлаш зарур бўлганда, шунингдек қонун ҳужжатларида белгиланган бошқа ҳолларда йўл қўйилади.

28. «Ангрен» МИЗ фаолиятини тўхтатиш тўғрисидаги қарор Ўзбекистон Республикаси Президенти томонидан қабул қилинади.

1. Ушбу Низом «Ангрен» махсус индустриал зонасининг Маъмурий кенгаши (кейинги ўринларда Маъмурий кенгаш деб аталади) фаолият кўрсатиши тартибини белгилайди.

2. Маъмурий кенгаш Ўзбекистон Республикаси Президенти Фармони билан давлат ва хўжалик бошқаруви органлари вакилларидан ташкил этиладиган коллегиал орган ҳисобланади.

3. Маъмурий кенгаш ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, Ўзбекистон Республикасининг бошқа норматив-ҳуқуқий ҳужжатларига, шунингдек ушбу Низомга амал қилади.

Маъмурий кенгашнинг ўз ваколатлари доирасида қабул қилган қарорлари вилоятлар, шаҳарлар ва туманлар ҳокимликлари, шунингдек уларда фаолият кўрсатувчи давлат ва хўжалик бошқаруви органлари, хўжалик юритувчи субъектлар томонидан бажарилиши мажбурий ҳисобланади.

4. Қуйидагилар Маъмурий кенгашнинг асосий вазифалари ҳисобланади:

«Ангрен» махсус индустриал зонаси (кейинги ўринларда «Ангрен» МИЗ деб аталади) қатнашчилари бўлган хўжалик юритувчи субъектларга МИЗ ҳудудида амалга ошириш учун истиқболли инвестиция лойиҳаларини ишлаб чиқиш, хорижий инвесторларни жалб этиш, молиялаштириш манбаларини белгилаш бўйича ишларнинг бутун комплексини амалга оширишда кўмаклашиш;

корхоналарга «Ангрен» МИЗ қатнашчиси мақомини бериш тўғрисида қарорлар қабул қилиш;

«Ангрен» МИЗда лойиҳаларнинг амалга оширилиши учун масъул бўлган вазирликлар ва идоралар, хўжалик бирлашмаларининг лойиҳа, тендер ва контракт ҳужжатларини ўз вақтида тайёрлаш ҳамда уларни экспертизадан ўтказиш бўйича ишларини, шунингдек маҳаллий давлат ҳокимияти органларининг «Ангрен» МИЗнинг фаолият кўрсатиши билан боғлиқ масалалар бўйича ишларини мувофиқлаштириш;

ишламаётган корхоналарни ва давлат мулкида бўлган мол-мулкларни нолга тенг харид қиймати бўйича «Ангрен» МИЗ қатнашчиларига сотиш тўғрисида қарорлар қабул қилиш;

«Ангрен» МИЗда объектларни қуриш ва ўз вақтида ишга тушириш бўйича тасдиқланган инвестиция лойиҳаларининг амалга оширилишини тизимли асосда назорат қилиш;

«Ангрен» МИЗнинг транспорт, муҳандислик-коммуникация ва ижтимоий инфратузилмасини жадал ривожлантириш дастурлари ва лойиҳаларини ишлаб чиқиш;

«Ангрен» МИЗда фаолиятни амалга ошираётган корхоналарнинг ишлаб чиқариш ва молиявий кўрсаткичлари доимий мониторингини ташкил этиш, уларга инвестиция лойиҳаларида назарда тутилган параметрларга эришишда, ишлаб чиқариш қувватларини энг тўлиқ даражада иш билан таъминлашда, барқарор кооперация алоқаларини йўлга қўйишда ва ишлаб чиқарилган маҳсулотларни экспорт қилишда кўмаклашиш;

«Ангрен» МИЗнинг самарали фаолият кўрсатишини ташкил этиш, «Ангрен» МИЗ дирекциясини шакллантириш бўйича чора-тадбирлар комплексини амалга ошириш ва «Ангрен» МИЗ дирекциясининг фаолиятини назорат қилиш;

«Ангрен» МИЗ фаолияти самарадорлигини оширишга йўналтирилган бошқа вазифалар.

5. Юкланган вазифаларга мувофиқ Маъмурий кенгаш қуйидаги функцияларни амалга оширади:

«Ангрен» МИЗни ўртача муддатли ва узоқ муддатли ривожлантириш ҳамда унинг фаолият кўрсатиши самарадорлигини оширишнинг стратегик йўналишлари бўйича таклифларни Ўзбекистон Республикаси Вазирлар Маҳкамасига киритади;

«Ангрен» МИЗ ҳудудида амалга ошириш учун инвесторларни топиш ва танлашни амалга оширади, «Ангрен» МИЗ қатнашчиси мақомини олишга буюртманомаларни ва лойиҳаларнинг бизнес-режаларини кўриб чиқади, инвестициялаш тўғрисидаги битимларнинг асосий шартларини белгилайди;

«Ангрен» МИЗ ҳудудида белгиланган мезонларга мувофиқ бўлган корхоналарни жойлаштириш, уларга «Ангрен» МИЗ қатнашчиси мақомини бериш, шунингдек ишламаётган корхоналарни ва давлат мулки бўлган мол-мулкларни нолга тенг харид қиймати бўйича «Ангрен» МИЗ қатнашчиларига сотиш тўғрисида қарорлар қабул қилади;

«Ангрен» МИЗни ривожлантиришнинг Бош режасини кўриб чиқади ва «Ангрен» МИЗнинг марказлаштирилган манбалар ҳисобига молиялаштириладиган ишлаб чиқариш инфратузилмасини қуриш лойиҳаларини тасдиқлайди;

«Ангрен» МИЗ дирекцияси фаолиятига раҳбарлик қилади ва унинг фаолияти юзасидан назоратни амалга оширади, «Ангрен» МИЗ дирекцияси директорини тайинлайди, «Ангрен» МИЗ дирекцияси иш режасини тасдиқлайди, шунингдек «Ангрен» МИЗнинг мустақил бюджети ва «Ангрен» МИЗни ривожлантириш жамғармаси маблағларидан мақсадли фойдаланилишини назорат қилади;

давлат бошқаруви органлари ва маҳаллий давлат ҳокимияти органларининг «Ангрен» МИЗнинг фаолият кўрсатиши билан боғлиқ фаолиятини мувофиқлаштиришни амалга оширади;

«Ангрен» МИЗнинг ишлаб чиқариш ва транспорт инфратузилмасини, шунингдек «Ангрен» МИЗ ҳудудида жойлашган ижтимоий инфратузилма объектларини жадал ривожлантириш лойиҳаларини амалга ошириш бўйича дастурлар ишлаб чиқади ва таклифлар киритади;

«Ангрен» МИЗ ҳудудида лойиҳаларнинг амалга оширилиши юзасидан доимий мониторинг олиб боради, «Ангрен» МИЗ дирекциясининг молия-хўжалик фаолияти тўғрисидаги ҳисоботларни ҳар чоракда эшитади, вужудга келадиган муаммоли масалаларни ҳал этиш чора-тадбирларини ишлаб чиқади ва уларнинг амалга оширилишини таъминлайди;

қабул қилинган мажбуриятлар бажарилмаган тақдирда инвестициялаш тўғрисидаги битимларни муддатидан олдин бекор қилиш тўғрисида қарор қабул қилади;

«Ангрен» МИЗни ривожлантириш жамғармаси тўғрисидаги Низомни, «Ангрен» МИЗни ривожлантириш жамғармаси маблағларини шакллантириш ва улардан фойдаланишнинг ҳар йилги сметасини тасдиқлайди;

қонун ҳужжатларига мувофиқ бошқа функцияларни амалга оширади.

6. Маъмурий кенгаш ўзига юкланган вазифаларни бажариш учун:

вазирликлар, давлат қўмиталари ва идоралардан, хўжалик бошқаруви органларидан, маҳаллий давлат ҳокимияти органларидан, Маъмурий кенгаш қатнашчиларидан Маъмурий кенгашнинг ваколатига тегишли бўлган ахборотларни белгиланган тартибда сўраш ва олиш;

«Ангрен» МИЗ қатнашчиларининг инвестиция лойиҳалари амалга оширилишини, берилган имтиёзлар ва преференцияларнинг қатнашчилар томонидан қўлланишининг тўғрилигини, шу жумладан жойига борган ҳолда ўрганишни ташкил этиш;

вазирликлар, давлат қўмиталари ва идоралар, хўжалик бошқаруви органлари, маҳаллий давлат ҳокимияти органлари вакилларининг, шунингдек Маъмурий кенгаш аъзоларининг Маъмурий кенгаш ваколатига тегишли масалалар бўйича ҳисоботлари ва маърузаларини мажлисларда эшитиш;

Маъмурий кенгаш фаолиятининг энг муҳим масалалари ва унга юкланган вазифаларни амалга ошириш бўйича таклифларни ўрганиш ва тайёрлаш учун ишчи гуруҳлар ташкил этиш;

вазирликлар, давлат қўмиталари ва идоралардан, хўжалик бошқаруви органларидан, маҳаллий давлат ҳокимияти органларидан, шунингдек «Ангрен» МИЗ ҳудудида ишлаб чиқаришни жойлаштириш учун инвестиция буюртманомалари берадиган инвесторлардан таклиф этилаётган лойиҳа билан боғлиқ статистик ва бошқа маълумотларни сўраш ҳуқуқига эга.

Маъмурий кенгаш қонун ҳужжатларига мувофиқ бошқа ҳуқуқларга ҳам эга бўлиши мумкин.

7. Маъмурий кенгашга раис бошчилик қилади, унинг ваколатига қуйидагилар киради:

Маъмурий кенгаш мажлислари кун тартибини белгилаш ва уларни чақириш;

Маъмурий кенгаш томонидан қабул қилинган қарорларнинг бажарилиши назорат қилинишини ташкил этиш;

Маъмурий кенгаш аъзоларининг юкланган вазифалар бўйича ишларини мувофиқлаштириш;

Маъмурий кенгашнинг самарали ишлашини таъминлаш юзасидан бошқа саъй-ҳаракатларни бажариш.

8. Ўзбекистон Республикаси Ташқи иқтисодий алоқалар, инвестициялар ва савдо вазирлиги Маъмурий кенгашнинг ишчи органи (кейинги ўринларда ишчи орган деб аталади) ҳисобланади.

9. Маъмурий кенгашнинг ишчи органи:

Маъмурий кенгашнинг навбатдаги мажлисига барча зарур материалларнинг ўз вақтида тайёрланишини таъминлайди ҳамда унга «Ангрен» МИЗ дирекциясидан, вазирликлар, давлат қўмиталари ва идоралардан, хўжалик бошқаруви органларидан, маҳаллий давлат ҳокимияти органларидан ва Маъмурий кенгаш аъзоларидан зарур материаллар ва эксперт хулосаларни олиш ҳуқуқи берилади;

кун тартибидаги масалалар бўйича таҳлилий материаллар тайёрланишини ташкил этади ва кўриб чиқиш учун уларни Маъмурий кенгашга тақдим этади;

Маъмурий кенгашнинг қарорларига мувофиқ бошқа материалларни Маъмурий кенгашнинг кўриб чиқиши учун тақдим этади.

10. Маъмурий кенгаш ўз мажлисини заруриятга кўра, бироқ йил чорагида камида бир марта ўтказади.

11. Мажлисни Маъмурий кенгаш раиси, у бўлмаганда эса — Маъмурий кенгаш раисининг ўринбосари ўтказади.

Маъмурий кенгаш мажлиси, агар рўйхатдан ўтказиш тамом бўлиш пайтида мажлисда қатнашиш учун Маъмурий кенгаш аъзоларининг камида учдан икки қисми рўйхатдан ўтган бўлса ҳуқуқий ваколатли бўлади (кворумга эга бўлади).

12. Маъмурий кенгашнинг қарори мажлисда қатнашаётган аъзоларининг оддий кўпчилик овози билан қабул қилинади. Овозлар тенг бўлиб қолган тақдирда Маъмурий кенгаш раисининг овози ҳал қилувчи ҳисобланади.

Маъмурий кенгашнинг ҳар бир аъзоси қабул қилинаётган қарорлар бўйича ўз фикрини ёзма ифодалаш ҳуқуқига эга.

Маъмурий кенгаш раиси қарорларни тезкор қабул қилиш мақсадида комиссия аъзолари билан келишилган айрим масалалар бўйича сўров ўтказиш йўли билан кенгашнинг қарорини тасдиқлаши мумкин.

13. Маъмурий кенгаш қарорлари Маъмурий кенгаш мажлисининг протоколи билан расмийлаштирилади. Маъмурий кенгаш мажлисининг протоколига унинг барча аъзолари виза қўяди, у котиб томонидан имзоланади, Маъмурий кенгаш раиси томонидан тасдиқланади ва бир ҳафта муддатда Маъмурий кенгаш аъзоларига ҳамда манфаатдор ташкилотларга юборилади.

Маъмурий кенгаш протоколининг асл нусхаси ва унга оид материаллар ишчи органда сақланади.

14. Маъмурий кенгаш қарорларининг бажарилишини назорат қилиш ишчи орган томонидан амалга оширилади.

15. Ишчи орган Маъмурий кенгаш қарорларининг бажарилишини мунтазам равишда ўрганади ва кўриб чиқади, зарурият бўлса Маъмурий кенгаш раисига тегишли таклифлар киритади.

16. Маъмурий кенгаш аъзоларидан бирининг ташаббуси билан навбатдан ташқари мажлис ўтказилиши мумкин. Маъмурий кенгашнинг навбатдан ташқари мажлисини ўтказиш тўғрисидаги асосланган талаб ёзма шаклда ишчи органга юборилади.

17. Навбатдаги мажлисда кўриб чиқиш учун Маъмурий кенгаш кун тартибига киритилган масалалар ишчи орган томонидан мажлис ўтказилишидан олдин беш кундан кечикмай Маъмурий кенгашнинг ҳар бир аъзосига юборилади.

18. Кун тартиби ўзгарган тақдирда ишчи орган Маъмурий кенгашнинг ҳар бир аъзосини мажлис бошланишидан олдин уч кундан кечикмай бундай ўзгаришлар тўғрисида хабардор қилади.

19. Маъмурий кенгаш ўз фаолиятини «Ангрен» МИЗ тугатилгандан кейин белгиланган тартибда ёки Ўзбекистон Республикаси Ҳукумати қарори билан муддатидан олдин тўхтатади.