Ўзбекистон Республикаси Президентининг «Ўзбекистон Республикасида паспорт тизимини янада такомиллаштириш чора-тадбирлари тўғрисида» 2009 йил 23 июндаги ПФ-4117-сон Фармонини бажариш юзасидан, шунингдек кредитларга хизмат кўрсатишни ҳисобга олган ҳолда биометрик паспортларни ишлаб чиқариш бўйича харажатларни қоплаш мақсадида Вазирлар Маҳкамаси қарор қилади:

1. Белгилаб қўйилсинки:

а) Ўзбекистон Республикаси фуқароларига биометрик паспортлар, Ўзбекистон Республикаси фуқароларига хорижга чиқиш биометрик паспортлари ва фуқаролиги бўлмаган шахсларга биометрик ҳаракатланиш ҳужжатлари берганлик учун давлат божи суммасининг 45 фоизи миқдоридаги маблағлар Адлия вазирлиги ҳузуридаги Персоналлаштириш агентлигининг бюджетдан ташқари ҳисоб рақамига тушади;

б) Адлия вазирлиги ҳузуридаги Персоналлаштириш агентлигининг бюджетдан ташқари ҳисоб рақамига тушган маблағлар қатъий равишда мақсадли тартибда:

биометрик паспортлар, хорижга чиқиш биометрик паспортлар ва биометрик ҳаракатланиш ҳужжатлари буклетларини сотиб олиш;

биометрик ҳужжатларни персоналлаштириш жараёнида қўлланиладиган ва биометрик ҳужжатларнинг ажралмас қисми бўлган импорт сарфлаш материалларини сотиб олиш;

биометрик паспорт тизимини модернизация қилиш учун импорт ускуна ва дастурий таъминлаш ҳамда ишлаб чиқариш асбоб-ускуналарини таъмирлаш учун эҳтиёт қисмлар сотиб олиш;

Давлат хизматлари марказларининг хорижга чиқиш биометрик паспортларини расмийлаштириш ва бериш учун махсус асбоб ускуналар ва дастурий таъминот билан жиҳозлаш ва техник хизмат кўрсатиш учун фойдаланилади;

хорижий пудратчилар ёки Ўзбекистон Республикасининг пудрат ташкилотлари томонидан ускуналарга техник хизмат кўрсатиш ва биометрик паспорт тизимининг дастурий таъминоти қийматига ҳақ тўлаш учун фойдаланилади;

в) Адлия вазирлиги ҳузуридаги Персоналлаштириш агентлигининг бюджетдан ташқари ҳисоб рақамидаги маблағлар қолдиғи календарь йил охирида республика бюджети даромадига ўтказилади.

2. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов ва Ўзбекистон Республикаси Бош вазирининг ўринбосари А.Н. Арипов зиммасига юклансин.