Солиқ тўловчининг шартнома тузиш ва эмиссия маълумотномасини рўйхатдан ўтказиш воситасида қимматли қоғозларга нисбатан мулкий ҳуқуқларни юзага келтиришга қаратилган ҳаракатлари ёки ниятлари қимматли қоғозлар билан амалга ошириладиган операциялар деб эътироф этилади.

Ушбу операцияларни белгиланган тартибда амалга ошираётган юридик ва жисмоний шахслар қимматли қоғозлар билан амалга ошириладиган операциялар учун солиқ тўловчилар ҳисобланадилар.

Шартноманинг баҳоси ва эмиссия маълумотномасини рўйхатдан ўтказиш ушбу Қонунга мувофиқ солиқ солиш объектлари ҳисобланади.

Қимматли қоғозлар билан амалга ошириладиган операциялардан олинадиган солиқ қуйидаги ставкалар бўйича ундирилади:

эмитентдан қимматли қоғозлар эмиссия (чиқариш) маълумотномасини рўйхатдан ўтказишда эмиссия номинал қийматининг 0,5 фоизи миқдорида. Эмиссия маълумотномасини рўйхатдан ўтказиш рад этилган тақдирда тўланган солиқ қайтариб берилмайди;

давлат қимматли қоғозларини сотиб олувчилардан битим суммасининг 0,1 фоизи миқдорида;

битим қатнашчиларининг ҳар биридан қимматли қоғозлар олди-сотдиси юзасидан шартнома тузишда битим суммасининг 0,3 фоизи миқдорида.

Қимматли қоғозлар билан амалга ошириладиган операциялардан олинадиган солиқни тўлашдан қуйидагилар озод қилинадилар:

акциядорлик жамияти томонидан илк бор чиқарилган акцияларни бу жамият давлат рўйхатига олинган пайтдан эътиборан сотиб олувчи юридик ва жисмоний шахслар;

мижознинг ҳисобидан ва унинг топшириғига биноан қимматли қоғозлар билан белгиланган тартибда воситачилик операцияларини амалга оширувчи юридик шахслар;

Самарқанд, Бухоро, Хива ва Тошкент шаҳарларида туристик фаолият билан шуғулланувчи янги ташкил этилган юридик шахслар, ташкил этилган пайтдан бошлаб дастлабки фойда олгунга қадар бўлган даврда, аммо давлат рўйхатидан ўтган пайтидан эътиборан узоғи билан уч йил муддатга.

Солиқ тўловчилар солиқ суммасини мустақил равишда, битимларнинг ҳақиқий суммасига ва тегишли солиқ ставкасига қараб ҳисоблаб чиқарадилар.

Қимматли қоғозлар билан чет эл валютасида амалга оширилган операциялардан олинадиган солиқ мазкур операция ўтказилган кунда валютанинг расмий белгиланган курсига қараб Ўзбекистон Республикасининг пул бирлигида ҳисоблаб чиқарилади.

Қимматли қоғозлар билан амалга ошириладиган операциялардан олинадиган солиқ мазкур операциялар рўйхатга олинаётган чоғда солиқ тўловчилар томонидан тўланади ва уч кунлак муддат ичида қуйидагилар томонидан республика бюджетига ўтказилади:

биржа бозорида битимлар тузишда фонд биржалари ҳамда товар биржалари ва бошқа биржаларнинг фонд бўлимлари томонидан;

эмитентлар, қимматли қоғозлар билан биржадан ташқари амалга ошириладиган операцияларни рўйхатга олувчи ва расмийлаштирувчи банк муассасалари ва бошқа муассасалари, шу жумладан воситачи муассасалар томонидан.

Қимматли қоғозлар дастлабки эмиссияси амалга оширилганда ҳар бир тузилган битим юзасидан олинадиган ҳақ тарзидаги солиқ қимматли қоғозларни сотиб олувчилардангина ундирилади.

Давлат қимматли қоғозлари билан амалга ошириладиган операциялардан олинадиган солиқ сотиб олувчилардангина ҳар бир битимдан ундирилади.

Солиқни ҳисоблаб чиқариш ва тўлашдаги хатоликлар учун солиқ тўловчилар қонун ҳужжатларига мувофиқ жавобгар бўладилар.

Солиқ тўлиқ ва ўз вақтида тўланиши устидан назоратни солиқ органлари амалга оширади.