“OʻzDEUavto” qoʻshma korxonasi ishlab chiqargan avtomobillarni samarali sotish va ularga texnik xizmat koʻrsatishni tashkil etish uchun shart-sharoitlar yaratish maqsadida Vazirlar Mahkamasi qaror qiladi:

1. “Oʻzavtosanoat”, “Oʻzbeksavdo” uyushmalari, Oʻzbekbirlashuv Oʻzbekiston Respublikasi Tashqi iqtisodiy aloqalar vazirligi bilan birgalikda:

“Mersedes-Bens”, “DEU” kompaniyalarining va boshqa yirik avtomobil firmalarining mutaxassislarini jalb etgan holda “OʻzDEUavto” qoʻshma korxonasi avtomobillarini ham respublika ichida, ham Oʻzbekiston tashqarisida sotish boʻyicha marketing tadqiqotlari markazini tashkil etish, uning tuzilmasi va funksiyalari toʻgʻrisidagi taklifni oʻn kun muddatda Vazirlar Mahkamasiga kiritsinlar;

Qoraqalpogʻiston Respublikasi Vazirlar Kengashi viloyatlar va Toshkent shahar hokimliklari ishtirokida bir oy muddatda 1996-1997-yillarda respublika mintaqalarida avtomobillarni sotish boʻyicha marketing tadqiqotlari oʻtkazsinlar;

bir oy muddatda “OʻzDEUavto” qoʻshma korxonasi uchun buyurtmalar portfelini shakllantirishga va 2000-yil oxirigacha boʻlgan davrda avtomobillarni ham respublika ichida, ham eksportga sotishga doir takliflarni ishlab chiqsinlar;

1996-yil oxirigacha marketing tadqiqotlari natijalarini hisobga olgan holda avtomobil modellarini yangilashga doir “DEU” korporatsiyasi bilan kelishilgan tadbirlarni taqdim etsinlar.

2. 1997-yilda “OʻzDEUavto” qoʻshma korxonasi avtomobillarini 1-ilovaga* muvofiq sotish dasturiga asosan rozilik bildirilsin, bunda avtomobillarni eksportga ustuvor sotishga, shuningdek respublika ichida erkin almashtiriladigan valyutaga sotishga, valyuta tushumi oʻz vaqtida tushishini taʼminlashga alohida eʼtibor berilsin.

“Oʻzavtosanoat” uyushmasi “OʻzDEUavto” qoʻshma korxonasi bilan birgalikda respublikada xaridorlar talabini oʻrganish va marketing tadqiqotlari oʻtkazish, shuningdek buyurtmalar portfelini shakllantirish natijalari boʻyicha 1997-yilda avtomobillarni sotish dasturiga zarur tuzatishlar kiritsin.

3. “Oʻzavtosanoat” uyushmasi “OʻzDEUavto” qoʻshma korxonasi bilan shartnoma asosida “Oʻzbeksavdo” uyushmasi, Oʻzbekbirlashuv va boshqa savdo tashkilotlarini jalb etish yoʻli bilan avtomobillarni sotish tarmogʻini kengaytirsin.

“Oʻzistiqbolstat” davlat qoʻmitasi “OʻzDEUavto” qoʻshma korxonasi avtomobillarini sotish, shu jumladan “Oʻzbeksavdo” uyushmasi va Oʻzbekbirlashuv tizimlarida sotish boʻyicha statistika hisobotini joriy etsin.

4. “Asaka” banki “Oʻzavtotexxizmat” aksionerlik jamiyati bilan birgalikda “OʻzDEUavto” qoʻshma korxonasi avtomobillarini Oʻzbekiston Respublikasi fuqarolariga Vazirlar Mahkamasining 1996-yil 26-martdagi 118-son qarori bilan tasdiqlangan tartibga muvofiq navbatda turuvchilarning alohida roʻyxati boʻyicha kredit asosida sotishni taʼminlasin.

6. “Oʻzavtosanoat” uyushmasi va “Oʻzavtotexxizmat” aksionerlik birlashmasi:

1996-yil oxirigacha 2-ilovaga* muvofiq avtomobillarga texnik xizmat koʻrsatish stansiyalari qurishni va ularni foydalanishga topshirishni taʼminlasinlar;

texnik xizmat koʻrsatish viloyat stansiyalari huzurida avtomobillarga texnik xizmat koʻrsatish boʻyicha uch-beshtadan koʻchma punktlar tashkil etishning hududiy sxemasini oʻn kun muddatda koʻrib chiqish uchun Vazirlar Mahkamasiga kiritsinlar.

7. I.H. Joʻrabekov, Q.J. Haqqulov, K.R. Parpiyev Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari bilan birgalikda bir oy muddatda:

avtomobillarga yonilgʻi quyish punktlarini;

avtoservis va texnik xizmat koʻrsatish xizmatlarini;

savdo va maishiy xizmat koʻrsatish obyektlarini oʻz ichiga oluvchi 2000-yilgacha avtomobil yoʻllari boʻylab xalqaro standartlarga javob beruvchi zamonaviy servis xizmati koʻrsatish kompleks punktlari barpo etish dasturi loyihasini;

mablagʻ bilan taʼminlash manbalarini belgilagan holda 1997-yilda amalga oshiriladigan tadbirlarni ishlab chiqsinlar va Vazirlar Mahkamasiga kiritsinlar.

8. “Oʻzbekiston temir yoʻllari” kompaniyasi:

“Oʻzavtosanoat” uyushmasi va “Oʻzavtotexxizmat” aksionerlik jamiyati bilan birgalikda avtomobillarni zavodlardan ularni sotish punktlarigacha tashish yoʻnalishlarini va tartibini bir hafta muddatda ishlab chiqsin va tasdiqlasin;

Oʻzbekiston Respublikasi Tashqi iqtisodiy aloqalar vazirligi bilan birgalikda 1997-yilning birinchi yarim yilligida avtomobillarni tashish uchun 200 ta ixtisoslashtirilgan yopiq vagonlar xarid qilish masalasini ishlab chiqsin;

tashiladigan avtomobillarni saqlashni taʼminlash maqsadida “Oʻzavtotexxizmat” aksionerlik jamiyati va “Texnolog” aksionerlik jamiyati bilan birgalikda ikki oy muddatda mavjud 110 ta ikki qavatli ixtisoslashtirilgan ochiq platformani puxta jihozlasin.

Pul-kredit siyosati boʻyicha respublika komissiyasi koʻrsatib oʻtilgan tadbirlarni mablagʻ bilan taʼminlash uchun kredit resurslari ajratish masalalarini belgilangan tartibda koʻrib chiqsin.

“Oʻzbekiston temir yoʻllari” kompaniyasi boshqaruvining raisi N. Ermetovga avtomobillar tashilishi va saqlanishi uchun shaxsiy javobgarlik yuklansin.

Oʻzbekiston Respublikasi Adliya vazirligi, “Oʻzbekiston temir yoʻllari” kompaniyasi Oʻzbekiston Respublikasi Ichki ishlar vazirligi va boshqa manfaatdor vazirliklar va idoralar bilan birgalikda ikki hafta muddatda temir yoʻl transportida tashiladigan yuklarning saqlanishini taʼminlash uchun mansabdor shaxslarning javobgarligini oshirish toʻgʻrisidagi qonun hujjatlari loyihalari boʻyicha Vazirlar Mahkamasiga taklif kiritsin.

9. “Oʻzdavstandart” markazi:

“Oʻzavtosanoat” uyushmasi bilan birgalikda “OʻzDEUavto” qoʻshma korxonasi avtomobillariga berilgan, ularning toʻsiqsiz eksport qilinishini taʼminlaydigan sertifikatlarning chet mamlakatlarda eʼtirof etilishiga doir ishlarni bir oy muddatda amalga oshirsin;

“Oʻzavtosanoat” uyushmasi, “Oʻzavtotrans” korporatsiyasi, “Oʻzavtoyoʻl” davlat-aksionerlik konserni, Oʻzbekiston Respublikasi Ichki ishlar vazirligi, Toshkent avtomobil yoʻllari instituti bilan birgalikda 1997-yilning birinchi choragida avtotransport vositalarini sertifikatlash tizimini ishlab chiqishni tugallasin.

Moliya vazirligi sertifikatlash tizimini ishlab chiqish uchun hisob-kitoblarga muvofiq zarur mablagʻlar ajratsin.

10. “Oʻzavtosanoat” uyushmasi, Moliya vazirligi, Davlat mulki qoʻmitasi, “Oʻzdavstandart” markazi bir oy muddatda xalqaro talablarni hisobga olgan holda davlat sertifikatsiya sinovlarini oʻtkazish uchun Janubiy avtomotopoligon qurilishini tugallash boʻyicha kelishilgan takliflarni kiritsinlar.

15. Bosh vazirning oʻrinbosari S.S. Saidqosimov respublikada ishlab chiqariladigan avtomobillarni sotish, ulardan foydalanish va ularga texnik xizmat koʻrsatish masalalariga bagʻishlangan har haftada namoyish qilinadigan telekoʻrsatuvlar tashkil etsin.

“Asaka” bankiga koʻrsatib oʻtilgan telekoʻrsatuvlarni mablagʻ bilan taʼminlash uchun “Oʻzavtosanoat” uyushmasiga kredit resurslari ajratish tavsiya qilinsin.

16. “Oʻzavtosanoat” uyushmasi Davlat matbuot qoʻmitasi, “Oʻzavtotrans” korporatsiyasi, “Oʻzavtoyoʻl” konserni bilan birgalikda Oʻzbekiston Respublikasi Ichki ishlar vazirligini jalb etgan holda ikki oy muddatda respublikada avtomobil ishi rivojlanishiga bagʻishlangan oylik jurnal belgilangan tartibda nashr etilishini tashkil etsin.

17. Oʻzbekiston Respublikasi Moliya vazirligi 1997-yil budjeti loyihasini ishlab chiqishda “OʻzDEUavto” qoʻshma korxonasida ishlab chiqarilgan 1200 ta “Damas” tez yordam avtomashinasini sotib olish uchun Sogʻliqni saqlash vazirligiga zarur mablagʻlar ajratishni nazarda tutsin.

18. Vazirlar Mahkamasining 1996-yil 20-martdagi 114-son qarori bilan yengil avtomobillarga belgilangan import boj poshlinalari stavkalari 1996-yil 1-oktabrdan boshlab oʻz kuchini yoʻqotgan deb hisoblansin.

19. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.