LexUZ шарҳи
Мазкур қарор Ўзбекистон Республикаси Президентининг 2018 йил 3 майдаги ПФ-5428-сонли «Ўзбекистон Республикаси Президентининг ҳамда Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида»ги Фармонига асосан ўз кучини йўқотган.
Туркманистон автотранспорт воситаларининг Ўзбекистон Республикаси ҳудуди орқали ўтиши учун йўл йиғимлари ставкаларининг тенг амал қилувчи миқдорларини ўзаро тартибга солишни таъминлаш мақсадида Вазирлар Маҳкамаси қарор қилади:
1. 1999 йил 1 октябрдан бошлаб Туркманистон автотранспорт воситаларининг Ўзбекистон Республикасига кириб келиши ва унинг ҳудуди орқали транзит бўйича ўтиши учун йиғимлар миқдорлари иловага мувофиқ белгилансин.
2. Белгилаб қўйилсинки, Туркманистоннинг автотранспорт воситаларидан йиғимлар ундириш миллий валюта «сўм»да нақд пулсиз шаклда ёки тижорат банклари томонидан бевосита божхона постларида Ўзбекистон Республикаси Марказий банкининг тўлов кунидаги курси бўйича нақд пул шаклида амалга оширилади, олинган маблағлар Ўзбекистон Республикаси тижорат банклари бўлимлари орқали Ўзбекистон Республикаси Вазирлар Маҳкамаси ҳузуридаги Республика йўл жамғармаси ҳисоб рақамларига ўтказилади.
(2-банд Ўзбекистон Республикаси Вазирлар Маҳкамасининг 2018 йил 15 мартдаги 202-сонли қарори таҳририда — Қонун ҳужжатлари маълумотлари миллий базаси, 16.03.2018 й., 09/18/202/0904-сон)
3. Божхона органлари томонидан автотранспорт воситаси ҳайдовчисига бериладиган, бўлиш муддатлари ва ҳаракатланиш йўналиши кўрсатилган, белгиланган намунадаги йўналиш варақаси Ўзбекистон Республикасига кириб келиш ёки унинг ҳудуди орқали транзит бўйича ўтиш ҳуқуқига рухсатнома ҳисобланади.
Ҳаракатланиш йўналишини ва бўлиш муддатларини ўзгартиришга фақат Ўзбекистон Республикаси Давлат божхона қўмитасининг жойлардаги органлари рухсати билан йўл қўйилади.
4. Автотранспорт воситалари Ўзбекистон Республикасининг божхона чегараси орқали ўтганда, божхона назоратидан ташқари, божхона органлари томонидан қонун ҳужжатларига мувофиқ чора-тадбирлар кўрилади.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Л.А. Ахметов ва Р.Р. Юнусов зиммасига юклансин.
Автотранспорт воситасининг тури | Ставкалар |
1. Қуйидаги миқдорда юк кўтарадиган юк автотранспорт воситалари: | |
10 тоннагача | 50 |
10 тоннадан 20 тоннагача | 100 |
20 тоннадан ортиғи | 150 |
2. Ўринлар сони қуйидагича бўлган автобуслар: | |
12 ўриндан кам | 25 |
13 ўриндан 30 ўрингача | 50 |
30 ўриндан ортиғи | 100 |
3. Транзит бўйича ўтувчи енгил автотранспорт воситалари | 30 |
4. Транзит бўйича ўтувчи мотоцикллар | 15 |
(илова Ўзбекистон Республикаси Вазирлар Маҳкамасининг 2015 йил 6 ноябрдаги 318-сонли қарорига асосан изоҳ билан тўлдирилган — ЎР ҚҲТ, 2015 й., 44-сон, 565-модда)