O‘zbekiston Respublikasi Oliy Majlisining Senati qaror qiladi:
2. O‘zbekiston Respublikasi Oliy Majlisi Senatining Reglamenti qabul qilingan paytdan e’tiboran amalga kiritilsin.
O‘zbekiston Respublikasi
Oliy Majlisi Senatining
2005-yil 6-maydagi 29–I-sonli Qarori bilan
TASDIQLANGAN
O‘zbekiston Respublikasi Oliy Majlisi Senatining Reglamenti (bundan buyon matnda Reglament deb yuritiladi) O‘zbekiston Respublikasining Konstitutsiyasiga, “O‘zbekiston Respublikasi Oliy Majlisining Senati to‘g‘risida”gi O‘zbekiston Respublikasi Konstitutsiyaviy Qonuni hamda “O‘zbekiston Respublikasi Oliy Majlisi Senatining Reglamenti to‘g‘risida”gi O‘zbekiston Respublikasi Qonuniga muvofiq O‘zbekiston Respublikasi Oliy Majlisi Senatining (bundan buyon matnda Senat deb yuritiladi) yalpi majlislarini o‘tkazish, qonunchilik tartib-taomillarini amalga oshirish tartibini belgilaydi hamda Senat faoliyatini tashkil etish bilan bog‘liq boshqa masalalarni tartibga soladi.
Senat ishi Senatning yalpi majlislariga (bundan buyon matnda majlislar deb yuritiladi) va uning qo‘mitalari majlislariga to‘planadigan senatorlar faoliyatiga asoslanadi.
Senat faoliyati masalalarni birgalikda va erkin muhokama qilishga, oshkoralikka, jamoatchilik fikrini hisobga olishga asoslanadi.
Senatda doimiy asosda ishlovchi Senat a’zolari senatorlik vakolatlari davrida ilmiy va pedagogik faoliyatdan tashqari haq to‘lanadigan boshqa turdagi faoliyat bilan shug‘ullanishlari mumkin emas.
Ayni bir shaxs bir paytning o‘zida Senat a’zosi (senator) va O‘zbekiston Respublikasi Oliy Majlisi Qonunchilik palatasining (bundan buyon matnda Qonunchilik palatasi deb yuritiladi) deputati bo‘lishi mumkin emas.
Senatorlik huquqlari va majburiyatlarini moneliksiz hamda samarali amalga oshirish kafolatlari “O‘zbekiston Respublikasi Oliy Majlisi Qonunchilik palatasi deputatining va Senati a’zosining maqomi to‘g‘risida”gi O‘zbekiston Respublikasi Qonuni, boshqa qonunlar hamda ushbu Reglament bilan belgilanadi.
Senat faoliyatining tashkiliy shakli uning zaruratga qarab, lekin yiliga kamida uch marta o‘tkaziladigan majlislaridir.
Senat majlislari, agar ularning ishida senatorlar umumiy sonining kamida yarmi ishtirok etayotgan bo‘lsa, vakolatli hisoblanadi. O‘zbekiston Respublikasining Konstitutsiyasini, konstitutsiyaviy qonunlarni ma’qullash, ularga o‘zgartishlar va qo‘shimchalar kiritish to‘g‘risidagi masalalarni ko‘rib chiqishda senatorlar umumiy sonining kamida uchdan ikki qismi hozir bo‘lishi shart.
Senatning navbatdan tashqari majlisi O‘zbekiston Respublikasi Prezidenti, Senat Raisi taklifiga binoan yoki senatorlar umumiy sonining kamida uchdan bir qismi taklifiga binoan chaqirilishi mumkin.
Senat qo‘mitalarining majlislari, agar ularda qo‘mita a’zolarining kamida yarmi hozir bo‘lgan bo‘lsa, vakolatli hisoblanadi.
Senat majlisida ko‘rib chiqilishi lozim bo‘lgan masalalar ularni ko‘rib chiqish navbati, palataning har bir masalani ko‘rib chiqishga tayyorlash uchun mas’ul bo‘lgan qo‘mitalari, ma’ruzachilar (qo‘shimcha ma’ruza bilan so‘zga chiqadiganlar), shuningdek boshqa ma’lumotlar ko‘rsatilgan holda majlis kun tartibi loyihasiga kiritiladi.
Senatorlar Senat majlisining kun tartibi loyihasiga kiritilgan masalalar to‘g‘risida oldindan xabardor qilinadilar.
Zarurat bo‘lganda Senat yopiq majlis o‘tkazish to‘g‘risida qaror qabul qilishi mumkin. Bunday qaror, agar bu xususdagi taklif O‘zbekiston Respublikasi Prezidenti, Senat Raisi, O‘zbekiston Respublikasi Bosh vaziri, Senat Kengashi yoki qo‘mitasi tomonidan kiritilgan bo‘lsa, qabul qilinishi mumkin.
O‘zbekiston Respublikasi Prezidenti, Qonunchilik palatasi Spikeri, Bosh vazir, Vazirlar Mahkamasining a’zolari, O‘zbekiston Respublikasi Konstitutsiyaviy sudi, Oliy sudi, Oliy xo‘jalik sudi raislari, Bosh prokuror Senatning ochiq va yopiq majlislarida ishtirok etishga haqli. Senatning yopiq majlislarida boshqa shaxslar Senat qaroriga binoan hozir bo‘lishlari mumkin.
Senat majlislarida ish davlat tilida olib boriladi va zarurat bo‘lganda Senat yoki uning Kengashi qarori asosida boshqa tillarga hamohang (sinxron) tarjimasi ta’minlanadi.
Senat majlisida qilinadigan ma’ruzalar va qo‘shimcha ma’ruzalarning hamda so‘zlanadigan yakunlovchi so‘zning muddati raislik qiluvchi tomonidan ma’ruzachilar (qo‘shimcha ma’ruza bilan so‘zga chiqadiganlar) bilan kelishgan holda, qoida tariqasida, ma’ruzalar uchun 30 minutga qadar, qo‘shimcha ma’ruzalar uchun 20 minutga qadar va yakunlovchi so‘z uchun 15 minutga qadar muhlat bilan belgilanadi.
Muzokaralarda so‘zga chiquvchilarga 10 minutga qadar vaqt beriladi. Muzokaralarda takroriy so‘zga chiqish uchun, shuningdek majlisning olib borilishi tartibi yuzasidan, ovoz berish sabablari bo‘yicha, nomzodlar yuzasidan so‘zga chiqish, bayonotlar, savollar, takliflar, xabarlar va ma’lumotlar berish uchun 3 minutga qadar vaqt ajratiladi.
Raislik qiluvchi majlisda hozir bo‘lgan senatorlarning ko‘pchiligi roziligi bilan Senat majlisining kun tartibidagi masala muhokamasining umumiy muddatini, savol-javoblarga ajratiladigan vaqtni belgilashi, so‘zlash vaqtini uzaytirishi mumkin.
Senat majlislarida senator bitta masala yuzasidan muzokaralarda ko‘pi bilan ikki marta so‘zga chiqishi mumkin.
Ma’ruzachi va qo‘shimcha ma’ruza bilan so‘zga chiqqan shaxs muzokaralarni tugatish to‘g‘risida qaror qabul qilinganidan keyin yakunlovchi so‘zga chiqish huquqiga ega.
Agar so‘zga chiqqan senator so‘zlash uchun ajratilgan muddatdan ko‘proq vaqt mobaynida gapirayotgan bo‘lsa yoki muhokama etilayotgan masala yuzasidan gapirmayotgan bo‘lsa, Senat majlisida raislik qiluvchi bir marta ogohlantirganidan keyin uni so‘zlash huquqidan mahrum etadi.
Senatning majlislari, qoida tariqasida, ish kunlari: soat 10.00 dan 13.00 gacha va (tanaffusdan keyin) soat 15.00 dan 18.00 gacha o‘tkaziladi.
Senat Qarori bilan palata majlislarini boshlash va tugallashning hamda tanaffus qilishning boshqa vaqti belgilanishi mumkin.
Senat va Qonunchilik palatasining qo‘shma majlislari O‘zbekiston Respublikasi Prezidenti qasamyod qilganda, O‘zbekiston Respublikasi Prezidenti mamlakat ijtimoiy-iqtisodiy hayotining, ichki va tashqi siyosatining muhim masalalari yuzasidan nutq so‘zlaganda, chet davlatlarning rahbarlari nutq so‘zlaganda o‘tkaziladi. Palatalarning kelishuviga muvofiq qo‘shma majlislar boshqa masalalar yuzasidan ham o‘tkazilishi mumkin.
O‘zbekiston Respublikasi Oliy Majlisi palatalarining qo‘shma majlislari O‘zbekiston Respublikasi Prezidenti, Senat Raisi, Qonunchilik palatasi Spikeri taklifi bilan yoki tegishincha senatorlar yoxud deputatlar umumiy sonining kamida uchdan bir qismi taklifiga binoan chaqirilishi mumkin. O‘zbekiston Respublikasi Oliy Majlisi palatalarining qo‘shma majlisini chaqirish to‘g‘risidagi masala yuzasidan Senat Raisi bilan Qonunchilik palatasi Spikeri o‘rtasida maslahatlashuvlar o‘tkazilib, qo‘shma majlisni o‘tkazish sanasi belgilab olinadi hamda kun tartibiga doir takliflar muhokama etiladi.
O‘zbekiston Respublikasi Oliy Majlisi palatalarining qo‘shma majlisi, agar unda tegishincha senatorlar va deputatlar umumiy sonining kamida uchdan ikki qismi hozir bo‘lgan bo‘lsa, vakolatli hisoblanadi.
O‘zbekiston Respublikasi Oliy Majlisi palatalarining qo‘shma majlislarida, agar qo‘shma majlisda boshqacha qoida belgilangan bo‘lmasa, Senat Raisi va Qonunchilik palatasi Spikeri navbatma-navbat raislik qiladi.
O‘zbekiston Respublikasi Oliy Majlisi palatalarining qo‘shma majlisida eshitilgan masalalar muhokamasi natijalari asosida palatalarning qo‘shma qarori qabul qilinishi mumkin. Bunda ovoz berish, qoida tariqasida, alohida-alohida o‘tkaziladi.
Senatning qarorlari uning majlislarida ochiq yoki yashirin ovoz berish orqali qabul qilinadi. Ochiq ovoz berish nomma-nom bo‘lishi mumkin.
Senat majlislarida ovoz berish ovozlarni hisoblashning elektron tizimidan yoki yashirin ovoz berish byulletenlaridan foydalangan holda amalga oshirilishi mumkin.
Senat majlisida ovozlarni hisoblashning elektron tizimidan foydalanilishi ustidan nazoratni senatorlar jumlasidan bo‘lgan guruh amalga oshiradi.
Ovoz berish shakli va usuli to‘g‘risidagi qaror Senat tomonidan ochiq ovoz berish orqali qabul qilinadi, u yoki bu masala yuzasidan ovoz berish shakli va usuli O‘zbekiston Respublikasining Konstitutsiyasida hamda konstitutsiyaviy qonunlarida belgilangan hollar bundan mustasno.
Senat qarorlari, agar O‘zbekiston Respublikasining Konstitutsiyasida va “O‘zbekiston Respublikasi Oliy Majlisining Senati to‘g‘risida”gi O‘zbekiston Respublikasi Konstitutsiyaviy Qonunida boshqacha tartib nazarda tutilgan bo‘lmasa, senatorlar umumiy sonining ko‘pchilik ovozi bilan qabul qilinadi.
4) Qonun qabul qilinishi munosabati bilan qonun hujjatlariga o‘zgartishlar va qo‘shimchalar kiritish to‘g‘risidagi, shuningdek qonun hujjatlarini o‘z kuchini yo‘qotgan deb topish to‘g‘risidagi qonun;
5) o‘zgartirilishi, qo‘shimcha kiritilishi, o‘z kuchini yo‘qotgan deb topilishi yoki qabul qilinishi lozim bo‘lgan qonun osti hujjatlarining ro‘yxati;
7) davlat daromadlarining qisqartirilishini yoki davlat xarajatlarining ko‘paytirilishini, shuningdek O‘zbekiston Respublikasi Davlat budjetining (bundan buyon matnda Davlat budjeti deb yuritiladi) moddalari bo‘yicha o‘zgartishlarni nazarda tutuvchi qonunlar yuzasidan O‘zbekiston Respublikasi Vazirlar Mahkamasining xulosasi.
Senatga kelib tushgan qonun ro‘yxatga olinadi va Senat Raisi tomonidan qonunni dastlabki tarzda ko‘rib chiqadigan hamda uning yuzasidan xulosa tayyorlaydigan qo‘mitaga (bundan buyon matnda mas’ul qo‘mita deb yuritiladi) topshiriladi.
Senat qo‘mitalarining qonun muhokamasiga bag‘ishlangan majlislari ochiq o‘tkaziladi. Zarurat bo‘lganda Senat qo‘mitalari yopiq majlis o‘tkazish haqida qaror qabul qilishi mumkin.
Qo‘mitalarning majlislariga davlat organlari va nodavlat notijorat tashkilotlarining, ilmiy muassasalarning namoyandalari, mutaxassislar va olimlar, matbuot organlari, televideniye, radio va boshqa ommaviy axborot vositalarining vakillari taklif etilishi mumkin.
Mas’ul qo‘mitaning xulosasida qonunni ma’qullash yoki rad etish to‘g‘risidagi tavsiya ifodalangan baho bo‘lishi kerak. Qonunni rad etish zarurligi to‘g‘risidagi xulosada mas’ul qo‘mitaning qonunni rad etish zarur deb hisoblashining vajlari bayon etilishi lozim. Mas’ul qo‘mitaning xulosasi Senat Kengashiga taqdim etiladi, Kengash qonunni Senat majlisining kun tartibi loyihasiga kiritish-kiritmaslik to‘g‘risida qaror qabul qiladi.
Senatning majlisida qonunni ko‘rib chiqish ma’ruzachining mas’ul qo‘mita xulosasini o‘qib eshittirishidan boshlanadi. Ko‘rib chiqilayotgan qonun yuzasidan uning muhokamasi tartibida senatorlar so‘zga chiqishlari mumkin.
Qonun Senat tomonidan senatorlar umumiy sonining ko‘pchilik ovozi bilan ma’qullanadi, ushbu Reglamentning 32-moddasida nazarda tutilgan hollar bundan mustasno.
Senat tomonidan ma’qullangan qonun imzolanishi va e’lon qilinishi uchun Senat qarori bilan birgalikda belgilangan tartibda O‘zbekiston Respublikasi Prezidentiga yuboriladi.
Senatning qonunni rad etish to‘g‘risidagi qarorida rad etish vajlari ko‘rsatilishi kerak. Unda bir vaqtning o‘zida qonunga o‘zgartishlar va qo‘shimchalar kiritish zarurligi to‘g‘risidagi, shuningdek kelishuv komissiyasi tuzish haqidagi takliflar bayon etilishi mumkin.
Senatning qonunni ma’qullash yoki rad etish to‘g‘risidagi qarori mazkur qaror qabul qilingan kundan e’tiboran o‘n kun ichida Qonunchilik palatasiga yuboriladi.
Senat tomonidan rad etilgan qonun yuzasidan Senat va Qonunchilik palatasi yuzaga kelgan kelishmovchiliklarni bartaraf etish uchun Senat a’zolari va Qonunchilik palatasi deputatlari orasidan tenglik asosida kelishuv komissiyasini tuzishi mumkin.
Senatda kelishuv komissiyasini tuzish to‘g‘risidagi tashabbus Senat Raisidan, shuningdek Senat a’zolari umumiy sonining kamida beshdan bir qismini tashkil etuvchi senatorlardan chiqishi mumkin.
Kelishuv komissiyasi tarkibiga nomzodlar yuzasidan Senat Raisi va Qonunchilik palatasining Spikeri tomonidan o‘zaro maslahatlashuvlar o‘tkaziladi.
Kelishuv komissiyasining Senatdan ko‘rsatilgan tarkibi uning majlisida, Senat majlislari oralig‘idagi davrda esa uning Kengashi tomonidan tasdiqlanadi.
Kelishuv komissiyasining har bir palatadan saylangan a’zolari o‘z tarkibidan ko‘pchilik ovoz bilan komissiya hamraislarini saylaydilar.
Kelishuv komissiyasi qonunning yagona matnini ishlab chiqish maqsadida Senatning har bir e’tirozini alohida-alohida ko‘rib chiqadi.
Kelishuv komissiyasi qarorlari kelishuv komissiyasi tarkibiga kirgan senatorlar va deputatlarning alohida-alohida ovoz berishi orqali qabul qilinadi. Qaror, agar komissiyaning har bir palatadan saylangan a’zolarining ko‘pchiligi uni yoqlab ovoz bergan bo‘lsa, qabul qilingan hisoblanadi.
Kelishuv komissiyasi o‘z ishining natijalari yuzasidan kelishmovchiliklarni bartaraf etish bo‘yicha takliflarni o‘z ichiga olgan xulosa qabul qiladi. Xulosaga qonunga doir o‘zgartishlar va qo‘shimchalar loyihasining matni ilova qilinadi.
Xulosa Senat va Qonunchilik palatasidan saylangan kelishuv komissiyasining hamraislari tomonidan imzolanib, tegishincha Senat va Qonunchilik palatasiga topshiriladi.
Senat kelishuv komissiyasining takliflarini qabul qilgan taqdirda qonun Qonunchilik palatasi tomonidan odatdagi tartibda qayta ko‘rib chiqilishi kerak.
Kelishuv komissiyasining loaqal bitta taklifi rad etilgan taqdirda Senat kelishuv komissiyasiga yangi takliflarni taqdim etishi uchun palata tomonidan ma’qullangan tuzatishlarni inobatga olgan holda ishni davom ettirishni taklif qilishi mumkin.
Agar Senat qonunni kelishuv komissiyasining tahririda ma’qullamasa, u rad etilgan qonun sifatida Qonunchilik palatasiga qaytarilishi kerak.
O‘zbekiston Respublikasi Prezidenti tomonidan qaytarilgan va Qonunchilik palatasi qayta ko‘rib chiqishda ilgari qabul qilingan tahrirda ma’qullagan qonun belgilangan tartibda Senatga yuboriladi.
Mas’ul qo‘mita O‘zbekiston Respublikasi Prezidenti tomonidan qaytarilgan va Qonunchilik palatasi ilgari qabul qilingan tahrirda ma’qullagan qonun yuzasidan xulosa beradi.
Mas’ul qo‘mitaning xulosasi olinganidan keyin qonunni Senat tomonidan qayta ko‘rib chiqish to‘g‘risidagi masala belgilangan tartibda Senat majlisining kun tartibi loyihasiga kiritiladi. Senat qayta ko‘rib chiqish natijalari bo‘yicha qonunni ma’qullash yoki rad etish to‘g‘risida qaror qabul qiladi.
Senat tomonidan qayta ko‘rib chiqishda senatorlar umumiy sonining uchdan ikki qismidan iborat ko‘pchilik ovozi bilan ma’qullangan qonun imzolanishi va e’lon qilinishi uchun Senat qarori bilan birgalikda belgilangan tartibda O‘zbekiston Respublikasi Prezidentiga yuboriladi.
Senatning qayta ko‘rib chiqish natijalari bo‘yicha qonunni ma’qullash yoki rad etish to‘g‘risidagi qarori mazkur qaror qabul qilingan kundan e’tiboran o‘n kun ichida Qonunchilik palatasiga yuboriladi.
Agar Senat rad etgan yoki O‘zbekiston Respublikasi Prezidenti tomonidan qaytarilgan qonun Qonunchilik palatasida qayta ko‘rib chiqilganda O‘zbekiston Respublikasi Prezidentining yoki Senatning e’tirozlarini hisobga olgan holda yangi tahrirda qabul qilinsa, ushbu Qonunni Senat yangidan qabul qilingan qonun sifatida belgilangan tartibda ko‘rib chiqadi.
O‘zbekiston Respublikasining Konstitutsiyasini, konstitutsiyaviy qonunni, ularga o‘zgartishlar va qo‘shimchalar kiritish to‘g‘risidagi qonunlarni ma’qullash uchun senatorlar umumiy sonining uchdan ikki qismidan iborat ko‘pchilik ovozi talab qilinadi.
Navbatdagi moliya yili uchun Davlat budjetining loyihasi O‘zbekiston Respublikasi Vazirlar Mahkamasi tomonidan joriy yilning 15-oktabridan kechiktirmay Senatga yuboriladi.
Qonunchilik palatasi tomonidan qabul qilingan Davlat budjeti Senatning ko‘rib chiqishi uchun topshiriladi va mas’ul qo‘mita tomonidan dastlabki tarzda ko‘rib chiqiladi.
Davlat budjetiga doir materiallar senatorlarga oldindan, mazkur budjet Senat majlisida ko‘rib chiqilgunga qadar yuboriladi.
Davlat budjetini Senatning majlisida muhokama qilish O‘zbekiston Respublikasi moliya vaziri yoki uning vazifasini bajaruvchi shaxsning ma’ruzasi bilan boshlanadi.
Davlat budjeti bo‘yicha qaror Senat tomonidan joriy yilning 15-dekabridan kechiktirmay qabul qilinishi kerak.
Davlat budjetiga O‘zbekiston Respublikasi Vazirlar Mahkamasining taqdimnomasiga binoan belgilangan tartibda o‘zgartishlar va qo‘shimchalar kiritilishi mumkin.
Davlat budjetiga o‘zgartishlar va qo‘shimchalar kiritish to‘g‘risidagi masala Senatning yaqin oradagi majlisida ko‘rib chiqilishi kerak.
Davlat budjetiga o‘zgartishlar va qo‘shimchalar mazkur budjetni qabul qilish uchun belgilangan tartibda kiritiladi.
O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risidagi qonunning Senatda ko‘rib chiqilishi Qonunchilik palatasining tegishli qarori Senatga kiritilganidan keyin amalga oshiriladi.
O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risida Qonunchilik palatasi tomonidan qabul qilingan va Senat ma’qullagan qonun belgilangan tartibda e’lon qilinishi lozim.
Qaror loyihasi Senatga kiritilayotganda unga qisqacha tushuntirish xati va boshqa zarur materiallar ilova qilinadi.
Senat Raisi Senat qarorining loyihasini dastlabki tarzda ko‘rib chiqish uchun mas’ul qo‘mita va muddat belgilaydi.
Senat Kengashi mas’ul qo‘mita vakilining axborotini eshitib, qaror loyihasini Senat majlisining kun tartibiga kiritish to‘g‘risida qaror qabul qiladi va ma’ruzachini belgilaydi.
Senat majlisida mas’ul qo‘mita vakilining axboroti eshitiladi va muhokama natijalari yuzasidan senatorlar umumiy sonining ko‘pchilik ovozi bilan Senat qarori qabul qilinadi.
Agar ovoz berish yakunlariga ko‘ra qaror loyihasini qabul qilish to‘g‘risidagi taklif zarur miqdorda ovoz to‘plamagan bo‘lsa, taklif rad etilgan hisoblanadi.
Senatning Qonunchilik palatasi bilan birgalikdagi vakolatlariga kiritilgan masala yuzasidan qabul qilingan qarori mazkur qaror qabul qilingan kundan e’tiboran besh kun ichida, agar ushbu Reglamentda boshqacha qoida belgilangan bo‘lmasa, Qonunchilik palatasiga yuboriladi.
Senat O‘zbekiston Respublikasining referendumini o‘tkazish kerakligi to‘g‘risidagi materiallarni, Qonunchilik palatasining referendum o‘tkazish va uning o‘tkaziladigan sanasini tayinlash to‘g‘risidagi qarorini, shuningdek mazkur masala bo‘yicha mas’ul qo‘mitaning xulosasini ko‘rib chiqib, quyidagi qarorlardan birini qabul qilishi mumkin:
Senatning O‘zbekiston Respublikasining referendumi masalasi yuzasidan qarori mazkur qaror qabul qilingan kundan e’tiboran uch kun ichida Qonunchilik palatasiga, shuningdek referendum o‘tkazish tashabbuskorlariga yuboriladi.
Senat O‘zbekiston Respublikasi referendumini o‘tkazish va uning o‘tkaziladigan sanasini tayinlash to‘g‘risida qaror qabul qilgan taqdirda mazkur masala yuzasidan Senat va Qonunchilik palatasining qarorlari ushbu masala yuzasidan Senat qaror qabul qilgan kundan e’tiboran uch kundan kechiktirmay matbuotda va boshqa ommaviy axborot vositalarida e’lon qilinadi.
Tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish to‘g‘risidagi masala Senatga tegishli materiallar kelib tushganidan keyin Senat tomonidan ko‘rib chiqiladi.
Tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish to‘g‘risida Senat tomonidan qabul qilingan qaror belgilangan tartibda e’lon qilinishi lozim.
Senat o‘z tasdig‘iga kiritilgan O‘zbekiston Respublikasi Prezidentining vazirliklar, davlat qo‘mitalarini va davlat boshqaruvining boshqa organlarini tuzish hamda tugatish to‘g‘risidagi farmonlari yuzasidan qarorlar qabul qiladi.
Senatning O‘zbekiston Respublikasi Prezidentining vazirliklar, davlat qo‘mitalarini va davlat boshqaruvining boshqa organlarini tuzish hamda tugatish to‘g‘risidagi farmonlarini tasdiqlash masalasi yuzasidan qarorlari mazkur qarorlar qabul qilingan kundan e’tiboran uch kun ichida Qonunchilik palatasiga, shuningdek O‘zbekiston Respublikasi Prezidentiga yuboriladi.
Qonunchilik palatasining O‘zbekiston Respublikasi Markaziy saylov komissiyasi a’zolarini saylash to‘g‘risidagi qarori Senatga kelib tushganidan keyin Senat o‘z majlisida O‘zbekiston Respublikasi Markaziy saylov komissiyasi a’zolarini saylash haqidagi masalani ko‘rib chiqadi.
Senatning O‘zbekiston Respublikasi Markaziy saylov komissiyasi a’zolarini saylash masalasi yuzasidan qarori mazkur qaror qabul qilingan kundan e’tiboran uch kun ichida Qonunchilik palatasiga yuboriladi.
O‘zbekiston Respublikasi Prezidentining O‘zbekiston Respublikasi Bosh vaziri nomzodini tasdiqlash to‘g‘risidagi taqdimnomasi Senat tomonidan Senatning yaqin oradagi majlisida ko‘rib chiqiladi.
Senatning O‘zbekiston Respublikasi Bosh vaziri nomzodini tasdiqlash masalasi yuzasidan qarori mazkur qaror qabul qilingan kundan e’tiboran uch kun ichida O‘zbekiston Respublikasi Prezidentiga yuboriladi.
Senat taqdim etilgan O‘zbekiston Respublikasi Bosh vaziri nomzodini uch marta rad etgan taqdirda, O‘zbekiston Respublikasi Prezidenti Bosh vazirni tayinlaydi, Senatni tarqatib yuboradi va yangi saylov tayinlaydi.
Qonunchilik palatasining O‘zbekiston Respublikasi Oliy Majlisining Inson huquqlari bo‘yicha vakilini saylash to‘g‘risidagi qarori Senatga kelib tushganidan keyin Senat o‘z majlisida O‘zbekiston Respublikasi Oliy Majlisining Inson huquqlari bo‘yicha vakilini saylash haqidagi masalani ko‘rib chiqadi.
Senatning O‘zbekiston Respublikasi Oliy Majlisining Inson huquqlari bo‘yicha vakilini saylash masalasi yuzasidan qarori Qonunchilik palatasiga yuboriladi.
O‘zbekiston Respublikasi Oliy Majlisining Inson huquqlari bo‘yicha vakili nomzodi O‘zbekiston Respublikasi Oliy Majlisi palatalarining majlislarida ko‘rib chiqilganidan keyin ushbu masala yuzasidan qabul qilingan uzil-kesil qaror qonunda belgilangan tartibda O‘zbekiston Respublikasi Prezidentiga yuboriladi.
Senat o‘z tasdig‘iga kiritilgan O‘zbekiston Respublikasi Prezidentining urush holati e’lon qilish to‘g‘risidagi farmonini ushbu farmon kelib tushgan paytdan e’tiboran 48 soatdan kechiktirmay, O‘zbekiston Respublikasi Prezidentining umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini esa ular kelib tushgan paytdan e’tiboran 72 soatdan kechiktirmay ko‘rib chiqadi.
O‘zbekiston Respublikasi Prezidentining urush holati, umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini tasdiqlash haqidagi masala Senat qo‘mitalarida dastlabki tarzda muhokama qilinmasdan Senat tomonidan ko‘rib chiqiladi.
Senatning O‘zbekiston Respublikasi Prezidentining urush holati, umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini tasdiqlash masalasi yuzasidan qarorlari darhol O‘zbekiston Respublikasi Prezidentiga yuboriladi.
O‘zbekiston Respublikasi Konstitutsiyaviy sudi, Oliy sudi va Oliy xo‘jalik sudi raislari, rais o‘rinbosarlari va sudyalari lavozimlariga saylash uchun nomzodlar O‘zbekiston Respublikasi Prezidenti tomonidan Senatga taqdim etiladi.
Senat O‘zbekiston Respublikasi Konstitutsiyaviy sudi, Oliy sudi va Oliy xo‘jalik sudi raislari, rais o‘rinbosarlari va sudyalarini saylash to‘g‘risidagi masalani o‘zining navbatdagi majlisida ko‘rib chiqadi. Bu masalalar yuzasidan qarorlar Senat a’zolari umumiy sonining ko‘pchilik ovozi bilan qabul qilinadi.
Senatning O‘zbekiston Respublikasi Konstitutsiyaviy sudi, Oliy sudi va Oliy xo‘jalik sudi raislari, rais o‘rinbosarlari va sudyalarini saylash masalasi yuzasidan qarorlari mazkur qarorlar qabul qilingan kundan e’tiboran uch kun ichida O‘zbekiston Respublikasi Prezidentiga yuboriladi.
Agar O‘zbekiston Respublikasi Konstitutsiyaviy sudi, Oliy sudi va Oliy xo‘jalik sudi raislari, rais o‘rinbosarlari va sudyalari lavozimlariga taqdim etilgan nomzodlar ovoz berish paytida Senat a’zolari ovozlarining yetarli sonini ololmasalar, O‘zbekiston Respublikasi Prezidenti Senat ko‘rib chiqishi uchun shu nomzodlarni qaytadan taqdim etishi mumkin. Agar ular qayta rad etilsa, O‘zbekiston Respublikasi Prezidenti tomonidan Senat ko‘rib chiqishi uchun boshqa nomzodlar taqdim etiladi.
O‘zbekiston Respublikasi Prezidentining O‘zbekiston Respublikasi Bosh prokurori va uning o‘rinbosarlarini, O‘zbekiston Respublikasi Milliy xavfsizlik xizmati raisini tayinlash hamda ularni lavozimidan ozod etish to‘g‘risidagi farmonlarini tasdiqlash haqidagi masalalar Senatning navbatdagi majlisida ko‘rib chiqiladi.
Senatning O‘zbekiston Respublikasi Prezidentining O‘zbekiston Respublikasi Bosh prokurori va uning o‘rinbosarlarini, O‘zbekiston Respublikasi Milliy xavfsizlik xizmati raisini tayinlash hamda lavozimidan ozod etish to‘g‘risidagi farmonlarini tasdiqlash masalasi yuzasidan qarorlari mazkur qarorlar qabul qilingan kundan e’tiboran uch kun ichida O‘zbekiston Respublikasi Prezidentiga yuboriladi.
O‘zbekiston Respublikasi Tabiatni muhofaza qilish davlat qo‘mitasi raisi, O‘zbekiston Respublikasi Markaziy banki Boshqaruvining raisi, O‘zbekiston Respublikasining chet davlatlardagi diplomatik va boshqa vakillari lavozimlariga tayinlash uchun nomzodlarni O‘zbekiston Respublikasi Prezidenti Senatga taqdim etadi.
O‘zbekiston Respublikasi Tabiatni muhofaza qilish davlat qo‘mitasi raisini, O‘zbekiston Respublikasi Markaziy banki Boshqaruvining raisini, O‘zbekiston Respublikasining chet davlatlardagi diplomatik va boshqa vakillarini tayinlash hamda ularni lavozimidan ozod etish to‘g‘risidagi masalani Senat o‘zining navbatdagi majlisida ko‘rib chiqadi. Bu masalalar yuzasidan qarorlar Senat a’zolari umumiy sonining ko‘pchilik ovozi bilan qabul qilinadi.
Senatning O‘zbekiston Respublikasi Tabiatni muhofaza qilish davlat qo‘mitasi raisini, O‘zbekiston Respublikasi Markaziy banki Boshqaruvining raisini, O‘zbekiston Respublikasining chet davlatlardagi diplomatik va boshqa vakillarini tayinlash yoki ularni lavozimidan ozod etish to‘g‘risidagi qarorlari mazkur qarorlar qabul qilingan kundan e’tiboran uch kun ichida O‘zbekiston Respublikasi Prezidentiga yuboriladi.
Agar O‘zbekiston Respublikasi Tabiatni muhofaza qilish davlat qo‘mitasi raisi, O‘zbekiston Respublikasi Markaziy banki Boshqaruvining raisi, O‘zbekiston Respublikasining chet davlatlardagi diplomatik va boshqa vakillari lavozimlariga tayinlash uchun taqdim etilgan nomzodlar ovoz berish paytida Senat a’zolari ovozlarining yetarli sonini ololmasalar, O‘zbekiston Respublikasi Prezidenti Senat ko‘rib chiqishi uchun shu nomzodlarni qaytadan taqdim etishi mumkin. Agar ular qayta rad etilsa, Senat ko‘rib chiqishi uchun O‘zbekiston Respublikasi Prezidenti tomonidan boshqa nomzodlar taqdim etiladi.
O‘zbekiston Respublikasi Bosh prokurorining senatorni jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik olish to‘g‘risidagi taqdimnomalari Senat tomonidan uning majlisida, Senatning majlislari oralig‘idagi davrda esa Senatning Kengashi tomonidan ko‘rib chiqiladi.
Senatning yoki Senat Kengashining senatorni daxlsizlik huquqidan mahrum etishga rozilik berish to‘g‘risidagi qarori yashirin ovoz berish orqali qabul qilinadi.
Senatning yoki Senat Kengashining senatorni jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik berish masalasi yuzasidan qarori darhol O‘zbekiston Respublikasi Bosh prokuroriga yuboriladi.
Senat amnistiya to‘g‘risidagi hujjatni qabul qilish to‘g‘risidagi masalani O‘zbekiston Respublikasi Prezidentining taqdimiga binoan o‘zining navbatdagi majlisida ko‘rib chiqadi.
Amnistiya to‘g‘risidagi hujjat mazkur hujjat qabul qilingan kundan e’tiboran besh kun ichida e’lon qilinishi kerak.
Reglamentga o‘zgartish va qo‘shimchalar kiritish to‘g‘risidagi takliflarni qo‘mitalar kiritadi, bu takliflar Senat majlisining kun tartibi loyihasiga Kengash tomonidan kiritiladi hamda birinchi navbatda ko‘rib chiqiladi.
Senat majlislarini o‘tkazishning, Senat faoliyatiga taalluqli boshqa masalalarni ko‘rib chiqishning Reglamentda nazarda tutilmagan tartib-taomillari Senat majlisida senatorlar umumiy sonining ko‘pchilik ovozi bilan qabul qilinadi, bayonnoma bilan rasmiylashtiriladi va qabul qilingan kundan e’tiboran amal qiladi.
Senat, shuningdek senator davlat hokimiyati va boshqaruvi organlarining mansabdor shaxslariga ularning vakolatlariga kiradigan masalalar yuzasidan asoslantirilgan tushuntirish berish yoki nuqtai nazarini bayon qilish talabi bilan parlament so‘rovi yuborishga haqli.
Parlament so‘roviga javobni davlat hokimiyati va boshqaruvi organlarining mansabdor shaxslari Senat majlislarida beradilar.
O‘zbekiston Respublikasi Oliy sudining raisi, Oliy xo‘jalik sudining raisi, Bosh prokurori, surishtiruv va tergov organlarining rahbarlari nomiga yo‘llangan parlament so‘rovi ularning ish yurituvidagi muayyan ishlar va materiallarga taalluqli bo‘lishi mumkin emas.
Parlament so‘rovlari bo‘yicha axborot Senat majlisida muhokama qilinishi mumkin. Senat muhokama yakunlari bo‘yicha qaror qabul qiladi.
Senat har yili o‘z majlisida O‘zbekiston Respublikasi Oliy Majlisi Inson huquqlari bo‘yicha vakilining faoliyat to‘g‘risidagi hisobotini eshitadi.
Senatning O‘zbekiston Respublikasi Oliy Majlisi Inson huquqlari bo‘yicha vakilining hisoboti yuzasidan qarori mazkur qaror qabul qilingan kundan e’tiboran o‘n kun ichida Qonunchilik palatasiga yuboriladi.
Senat har yili o‘z majlisida O‘zbekiston Respublikasi Hisob palatasining hisobotini mazkur masala yuzasidan Qonunchilik palatasining qarori Senatga kelib tushganidan keyin eshitadi va muhokama qiladi.
Senatning O‘zbekiston Respublikasi Hisob palatasining hisoboti yuzasidan qarori mazkur qaror qabul qilingan kundan e’tiboran o‘n kun ichida Qonunchilik palatasiga yuboriladi.
O‘zbekiston Respublikasi Bosh prokurorining, O‘zbekiston Respublikasi Tabiatni muhofaza qilish davlat qo‘mitasi raisining, O‘zbekiston Respublikasi Markaziy banki Boshqaruvi raisining qonun hujjatlarida belgilangan tartibda Senatga taqdim etgan har yilgi hisobotlari Senatning navbatdagi majlisida ko‘rib chiqiladi.
Senatning qo‘mitalari, shuningdek senatorlar davlat organlari va boshqa tashkilotlardan, mansabdor shaxslardan hujjatlar, ekspert xulosalari, statistika ma’lumotlari va boshqa ma’lumotlarni talab qilib olishlari mumkin.
Senatning qo‘mitalari yoki senatorlar talab qilib oladigan axborotni tegishli davlat organi, boshqa tashkilot, mansabdor shaxs murojaat olingan kundan e’tiboran o‘n kundan kechiktirmay taqdim etishi kerak.
Senat qo‘mitalarining davlat hokimiyati va boshqaruvi organlari rahbarlarining ular tomonidan qonunlarga qanday rioya etilayotgani, palata qo‘mitalarining qarorlari qanday bajarilayotgani to‘g‘risidagi axborotlarini eshitishi qo‘mitalarning ish rejalariga muvofiq o‘tkaziladi.
Senat boshqa davlatlarning parlamentlari va xalqaro parlament tashkilotlari bilan parlamentlararo hamkorlik to‘g‘risida bitimlar tuzishi, rasmiy parlament delegatsiyalari almashinishi, shuningdek xalqaro aloqalarni mustahkamlashga qaratilgan turli tadbirlarni o‘tkazishi mumkin.
Boshqa davlatlarning parlamentlari rahbarlariga, davlatlar va hukumatlar boshliqlariga, parlament delegatsiyalari rahbarlariga ularning iltimosiga binoan Senat majlisida so‘zga chiqish imkoniyati berilishi mumkin.
Senat, uning organlari va senatorlarning faoliyati bilan bog‘liq xarajatlar smetasi Senat Raisi tomonidan tasdiqlanadi.