[
ОКОЗ:
1.
19.00.00.00 Халқаро муносабатлар. Халқаро ҳуқуқ / 19.03.00.00 Ижтимоий-маданий масалалар бўйича ҳамкорлик / 19.03.06.00 Фан ва таълим соҳасидаги ҳамкорлик]
[
ТСЗ:
1.
Ташқи сиёсат ва халқаро муносабатлар / Умумий масалалар]
Ўзбекистон Республикаси Ҳукумати билан Беларусь Республикаси Ҳукумати ўртасида
Битим
Фан ва технологиялар соҳасида ҳамкорлик тўғрисида
Тошкент, 13 сентябрь 2018 йил
(Ўзбекистон Республикаси учун 2018 йил 13 сентябрдан кучга кирган)
Ўзбекистон Республикаси Ҳукумати ва Беларусь Республикаси Ҳукумати, кейинги ўринларда «Томонлар» деб аталувчилар,
икки давлат иқтисодиётини ривожлантиришда фан ва технологияларнинг ўрни муҳимлигини англаб,
давлатлар ўртасида илмий-техникавий ҳамкорликни ривожлантириш ва мустаҳкамлашни истаган ҳолда,
икки мамлакатнинг илмий ташкилотлари ва олимлари ўртасидаги самарали ва жадал ҳамкорликка кўмаклашишни ният қилиб,
қуйидагилар тўғрисида келишиб олдилар:
1-модда
Томонлар мазкур Битим қоидаларини давлатлардан ҳар бирининг миллий қонунчилиги ва халқаро мажбуриятларига мувофиқ қўллайдилар.
2-модда
Томонлар тенг ҳуқуқлилик ва ўзаро манфаатдорлик принципларига асосланиб, икки мамлакат ўртасида фан ва технологиялар соҳасида ҳамкорликни ривожлантирадилар ва мустаҳкамлайдилар.
3-модда
Томонлар икки мамлакатнинг илмий, илмий-ишлаб чиқариш ташкилотлари ўртасида бевосита фан ва технологиялар соҳасида ушбу ташкилотлар ўртасида тузилган битимлар асосида узоқ муддатли ҳамкорликни ривожлантиришга кўмаклашадилар
4-модда
Томонлар илғор технологияларни ишлаб чиқиш, шу жумладан, ахборотлаштириш, шунингдек, амалий тадқиқотлар соҳасида илмий- техникавий ҳамкорликни ривожлантирадилар.
5-модда
Мазкур Битимга мувофиқ Томонлар ўртасида илмий-техникавий ҳамкорлик қуйидаги шаклларда амалга оширилади:
илмий-техникавий ахборот алмашинуви;
қўшма илмий-техникавий лойиҳалар ва дастурларни амалга ошириш;
ўзаро қизиқиш уйғотадиган тадқиқотлар ва ишланмалар ўтказиш учун олимлар, тадқиқотчилар ва мутахассислар алмашинуви;
Томонлар ўртасида олдиндан келишувга мувофиқ илмий тадбирларда (конференциялар, симпозиумлар, семинарлар, амалиётларда) иштирок этиш;
илмий-техникавий соҳада қўшма тадбирлар ташкил этиш ва ўтказиш;
Томонлар ўртасида олдиндан келишувга мувофиқ ҳамкорликнинг бошқа шакллари.
6-модда
Томонлар икки мамлакат ташкилотлари ўртасида қуйидаги устувор йўналишлар бўйича ҳамкорликка ҳар томонлама кўмаклашадилар:
энергетика ва энергияни тежаш, қайта тикланадиган энергитика;
тиббиёт ва тиббиёт технологияси, фармация;
нано- ва биотехнологиялар;
кимёвий технологиялар;
янги материаллар;
ахборот-коммуникация технологиялари;
рақамли иқтисодиёт;
аэрокосмик соҳа;
робототехника;
озиқ-овқат хавфсизлиги;
агро-саноат технологиялари;
табиий ресурслардан оқилона фойдаланиш, табиий офатлар оқибатларини бартараф этиш ва уларнинг олдини олиш;
сув ресурсларини бошқариш технологиялари;
фойдали қазилма бойликларини қазиб олиш технологиялари;
атроф-муҳитни муҳофаза қилиш;
лазерли технологиялар ва фотоника.
Томонларнинг ўзаро келишувига кўра, кейинчалик ушбу рўйхат бошқа устувор йўналишлар билан тўлдирилиши мумкин.
7-модда
Мазкур Битимнинг
6-моддасини
амалга ошириш доирасида Томонлар иккала мамлакат ташкилотлари ўртасида самарали ҳамкорлик қилишга кўмаклашадилар ва шу мақсадда:
ўзаро қизиқиш уйғотадиган аниқ илмий-техникавий ҳамда инновацион лойиҳаларни кўриб чиқиш;
кўрсатилган лойиҳаларни амалга ошириш учун шерикларни танлашга кўмаклашиш;
илмий-техникавий ва инновацион лойиҳаларни молиялаштириш, техник ва иқтисодий самарадорлиги, уларнинг натижаларини жорий этиш ва улардан фойдаланиш тартиби ва шартларини биргаликда аниқлаш;
илмий-техникавий, шунингдек, инновацион лойиҳаларни биргаликда амалга ошириш учун зарур бўлган контрактларни (битимлар, келишувларни) тузишда кўмаклашиш, шу жумладан, ташкилий жиҳатдан қўллаб-қувватлаш;
ишлаб чиқилган технологияларни жорий этиш учун зарур бўлган мутахассисларни ўқитишга кўмаклашиш.
8-модда
Мазкур Битим доирасидаги қўшма фаолият натижасида олинган илмий-техникавий маълумотлар Томонларнинг ёзма розилигига биноан ва Томонлар давлатларидан ҳар бирининг халқаро мажбуриятларига, Томонлар давлатларидан ҳар бирининг қонунчилигига, шунингдек, ҳамкорлик қилувчи ташкилотларнинг низомларига мувофиқ учинчи шахсларга топширилиши мумкин, тижорат сири ҳисобланган маълумотлар бундан мустасно.
Мазкур Битим доирасида амалга оширилаётган тадқиқотлар ва бошқа қўшма фаолият натижалари Томонлар ўртасида тенг тақсимланади ва башарти Томонлар ўзгача тарзда келишиб олмаган бўлсалар, учинчи шахсларга ошкор қилинмайди.
9-модда
Мазкур Битим доирасида ҳамкорликни мувофиқлаштириш учун Томонлар ўз ваколатли органларининг вакилларидан иборат таркибда Фан ва технологиялар соҳасида ҳамкорлик бўйича Қўшма комиссия (кейинги ўринларда — Комиссия) тузадилар. Комиссия ўз фаолиятини ташкил этиш учун тегишли Низомни тасдиқлайди.
10-модда
Мазкур Битим қоидаларини талқин қилиш ва (ёки) қўллаш бўйича келишмовчиликлар Томонлар ўртасида музокара ва маслаҳатлашувлар орқали ҳал этилади.
11-модда
Томонларнинг ўзаро келишувига кўра мазкур Битимга алоҳида баённомалар билан расмийлаштириладиган ўзгартириш ва қўшимчалар киритилиши мумкин. Бундай ўзгартириш ва қўшимчалар мазкур Битимнинг ажралмас қисми ҳисобланади ва унинг
12-моддасида
белгиланган тартибда кучга киради.
12-модда
Мазкур Битим имзоланган санадан бошлаб кучга киради.
Мазкур Битим беш йиллик муддатга тузилади, башарти Томонлардан бири унинг амал қилишини тугатиш нияти тўғрисида жорий беш йиллик муддат тугашидан камида олти ой олдин дипломатик каналлар орқали бошқа Томонни ёзма равишда хабардор этмаса, унинг амал қилиши навбатдаги беш йиллик муддатларга ўз-ўзидан узаяверади
Мазкур Битим амал қилишининг тугатилиши Битимга мувофиқ амалга оширилаётган, аммо унинг амал қилиш муддати тугагунига қадар якунланмаган қўшма лойиҳалар, дастурлар ва бошқа тадбирларнинг бажарилишига дахл қилмайди.
Мазкур Битим қоидаларини талқин қилишда келишмовчиликлар юзага келган тақдирда, Томонлар рус тилидаги матнга таянадилар.
Тошкент шаҳрида 2018 йил 13 сентябрда, икки нусхада, ҳар бири ўзбек ва рус тилларида тузилди, бунда барча матнлар тенг аутентикдир.
(имзолар)