LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Boshoqli don ekinlari seleksiyasi va urug‘chiligini yaxshilash hamda ularning hosildorligini oshirish maqsadida Vazirlar Mahkamasi qaror qiladi:
1. O‘zbekiston Respublikasi Qishloq xo‘jaligi vazirligi, O‘zbekiston Qishloq xo‘jaligi fanlari akademiyasining urug‘chilik xo‘jaliklari tomonidan 1995-yil hosilidan 52 ming tonna hajmdagi navli urug‘larni davlat resurslariga sotish va urug‘chilik xo‘jaliklarini viloyatlar bo‘yicha 1 va 2-ilovalarga* ko‘ra joylashtirish to‘g‘risidagi takliflari qabul qilinsin.
2. Ma’lumot uchun qabul qilinsinki, respublika xo‘jaliklari tomonidan 1995-yil hosilidan 286,4 ming tonna miqdorida boshoqli don ekinlari urug‘i 3-ilovaga* muvofiq to‘planadi.
3. O‘zbekiston Qishloq xo‘jaligi fanlari akademiyasi, “G‘alla” ilmiy-ishlab chiqarish birlashmasi, 1995-yil hosilidan boshlab, har yili ixtisoslashtirilgan urug‘chilik xo‘jaliklariga, uchastkalar va brigadalarga elita va birinchi reproduksiya urug‘larni 4-ilovaga* muvofiq miqdorlarda sotishni ta’minlasinlar.
4. O‘zbekiston Respublikasi Qishloq xo‘jaligi vazirligi, Buxoro, Jizzax, Qashqadaryo, Sirdaryo viloyatlari hokimliklari “G‘alla” ilmiy-ishlab chiqarish birlashmasiga dastlabki urug‘chilikni tashkil etish uchun 400-500 gektardan sug‘oriladigan yer maydonlari ajratsinlar.
5. Buxoro, Qashqadaryo, Andijon viloyatlarida g‘alla ilmiy-tadqiqot institutining bo‘limlarini tashkil etish maqsadga muvofiq deb hisoblansin.
6. Urug‘chilik xo‘jaliklarining boshoqli don ekinlari urug‘lari yetishtirishdagi manfaatdorliklarini oshirish maqsadida don uchun amaldagi xarid narxlariga elita urug‘lar sotishda — 150 foiz, birinchi reproduksiya urug‘larni sotishda — 120 foiz, ikkinchi-uchinchilarga — 100 foiz, to‘rtinchi-beshinchilarga — 50 foiz miqdorida ustamalar belgilansin.
7. “O‘zqishloqxo‘jalikta’minottuzatish” davlat qo‘mitasi, O‘zbekiston Respublikasi Qishloq xo‘jaligi vazirligi va “O‘zmashsanoat” uyushmasi urug‘chilik xo‘jaliklarini urug‘ tayyorlash uchun ularning buyurtmalariga ko‘ra urug‘ tozalovchi texnika, boshqa mashina va mexanizmlar bilan ta’minlash chora-tadbirlarini ko‘rsinlar.
8. O‘zbekiston Respublikasi fan va texnika davlat qo‘mitasi O‘zbekiston Qishloq xo‘jaligi fanlari akademiyasi, Qishloq xo‘jaligi vazirligi don ekinlari seleksiyasi bo‘yicha tadqiqotlarni kengaytirish, ilmiy negizni mustahkamlash va respublikada urug‘chilikni rivojlantirish uchun har yili zarur bo‘lgan mablag‘ va moddiy resurslar ajratishni nazarda tutsinlar.