LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Xalq xo‘jaligida hisob-kitoblarni tezlashtirish va xo‘jalik yurituvchi subyektlarning to‘lov intizomi uchun mas’uliyatini oshirish maqsadida Vazirlar Mahkamasi qaror qiladi:
1. Shu yilning 1-fevralidan boshlab mulkchilikning barcha shakllaridagi xo‘jalik yurituvchi subyektlar o‘rtasidagi hisob-kitoblar qat’iyan hisob-kitob, joriy, budjet va boshqa schyotlarda mavjud bo‘lgan mablag‘lar doirasida, faqat to‘lov topshiriqlari, cheklar, akkreditivlar, shuningdek tijorat banklari veksellari bilan amalga oshirilsin.
Keyingi tahrirga qarang.
Davlat budjeti, budjetdan tashqari fondlar bilan, gaz, issiqliq va elektr energiyasi, neft mahsulotlari, aloqa va avtotransport xizmatlari uchun hisob-kitoblar doimiy to‘lovlar tarzidagi to‘lov topshiriqlari vositasida amalga oshirilsin.
2. Markaziy bank hamda Moliya vazirligi tomonidan ishlab chiqilgan tijorat banklari veksellarini chiqarish va ularning muomalada bo‘lishi qoidalari ma’qullansin.
Keyingi tahrirga qarang.
3. Belgilab qo‘yilsinki, tovarlar, ishlar va xizmatlarning haqi sifatida to‘lovchilardan avans to‘lovlari tarzida pul mablag‘lari olgan korxonalar va tashkilotlar mablag‘lar o‘tkazilgan kundan boshlab bir oy mobaynida o‘z majburiyatlarini bajarishga yoki qonunchilikda va shartnomalarda boshqacha hol nazarda tutilmagan bo‘lsa, olingan summani to‘lov topshiriqlari bilan qaytarishga majburdirlar.
4. Davlat va davlat-aksionerlik korxonalari hamda tashkilotlari rahbarlarining mehnatiga haq to‘lashni yetkazib berilgan mahsulot hamda ko‘rsatilgan xizmatlar uchun hisob-kitoblar bo‘yicha muddati o‘tkazib yuborilgan qarz miqdoriga bog‘liq qilib qo‘yish zarur deb hisoblansin.
O‘zbekiston Respublikasi Mehnat vazirligi, Moliya vazirligi Markaziy bank va “O‘zistiqbolstat” davlat qo‘mitasi bilan birgalikda O‘zbekiston Respublikasi Adliya vazirligi bilan kelishgan holda bir oy muddatda mazkur masala yuzasidan tegishli takliflarni ishlab chiqsinlar va Vazirlar Mahkamasiga taqdim etsinlar.
5. O‘zbekiston Respublikasi Adliya vazirligi manfaatdor vazirliklar va idoralar ishtirokida joriy yilning birinchi yarim yilligida xo‘jalik yurituvchi subyektlar tomonidan shartnoma majburiyatlari bajarilmaganligi va to‘lov intizomi buzilganligi uchun qat’iy jarima sanksiyalarini nazarda tutuvchi “Mahsulot va tovarlarni yetkazib berish to‘g‘risida”gi Qonun loyihasini ishlab chiqsin va keyinchalik Oliy Majlisga kiritish uchun Vazirlar Mahkamasiga taqdim etsin.