LexUZ sharhi
Mazkur qaror O‘zbekiston Respublikasi Vazirlar Mahkamasining 2019-yil 22-martdagi 242-sonli “Fuqarolar yig‘inining “O‘zbekiston Respublikasi Vazirlar Mahkamasining Reglamentini tasdiqlash to‘g‘risida”gi qaroriga asosan o‘z kuchini yo‘qotgan.
O‘zbekiston Respublikasining “O‘zbekiston Respublikasi Konstitutsiyasining ayrim moddalariga o‘zgartish va qo‘shimchalar kiritish to‘g‘risida (32, 78, 93, 98, 103 va 117-moddalariga)” 2014-yil 16-apreldagi O‘RQ-366-son hamda “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida” 2015-yil 10-avgustdagi O‘RQ-389-son qonunlariga muvofiq Vazirlar Mahkamasi qaror qiladi:
1. Vazirlar Mahkamasining 2005-yil 14-fevraldagi 62-son qarori (O‘zbekiston Respublikasi QT, 2005-y., 2-son, 8-modda) bilan tasdiqlangan O‘zbekiston Respublikasi Vazirlar Mahkamasining Reglamentiga ilovaga muvofiq qo‘shimcha kiritilsin.
2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari hamda O‘zbekiston Respublikasi Vazirlar Mahkamasi apparatining boshqaruvchisi R.V. Abduqodirov zimmasiga yuklansin.
Vazirlar Mahkamasining 2005-yil 14-fevraldagi 62-son qarori (O‘zbekiston Respublikasi QT, 2005-y., 2-son, 8-modda) bilan tasdiqlangan O‘zbekiston Respublikasi Vazirlar Mahkamasining Reglamentiga quyidagi mazmundagi IV1 bob qo‘shilsin:
321. Vazirliklar, davlat qo‘mitalari va davlat boshqaruvining boshqa organlarini tuzish hamda tugatish to‘g‘risidagi takliflarni ishlab chiqish Vazirlar Mahkamasi tomonidan O‘zbekiston Respublikasi Prezidentining hujjatlari va topshiriqlarini bajarish yuzasidan yoxud tashabbus tartibida ta’minlanadi.
322. Vazirliklar, davlat qo‘mitalari va davlat boshqaruvining boshqa organlarini tuzish hamda tugatish masalasi yuzasidan O‘zbekiston Respublikasi Konstitutsiyasi 93-moddasi birinchi qismining 8-bandiga muvofiq O‘zbekiston Respublikasi Prezidentining farmoni loyihasi ishlab chiqiladi.
323. Vazirliklar, davlat qo‘mitalari va davlat boshqaruvining boshqa organlarini tuzish hamda tugatish to‘g‘risidagi O‘zbekiston Respublikasi Prezidentining farmoni loyihasiga quyidagi hujjatlar ilova qilinadi:
ushbu loyiha qabul qilinishining maqsadga muvofiqligini asoslashdan iborat bo‘lgan tushuntirish xati;
tashkil etilayotgan organning asosiy vazifalari, funksiyalari, faoliyatining huquqiy va tashkiliy asoslari (tuzilmasi, xodimlarining, shu jumladan boshqaruv xodimlarining cheklangan soni), tugatilayotgan organning funksiyalarini qayta taqsimlash va boshqa masalalar bo‘yicha tahliliy materiallar.
Vazirliklar, davlat qo‘mitalari va davlat boshqaruvining boshqa organlarini tuzish hamda tugatish to‘g‘risidagi O‘zbekiston Respublikasi Prezidentining farmoni loyihasini kelishish va kiritish, shuningdek uni Vazirlar Mahkamasida ko‘rib chiqish ushbu Reglament talablariga muvofiq amalga oshiriladi.
324. Vazirliklar, davlat qo‘mitalari va davlat boshqaruvining boshqa organlarini tuzish hamda tugatish to‘g‘risidagi taklif, O‘zbekiston Respublikasi Prezidentining tegishli farmoni loyihasi va unga ilova qilinadigan hujjatlar Vazirlar Mahkamasi Rayosati majlisida ko‘rib chiqiladi.
Vazirliklar, davlat qo‘mitalari va davlat boshqaruvining boshqa organlarini tuzish hamda tugatish to‘g‘risidagi taklif ma’qullangan taqdirda Vazirlar Mahkamasi Rayosatining tegishli qarori qabul qilinadi va O‘zbekiston Respublikasi Prezidentiga taqdimnoma kiritiladi.
325. Taqdimnoma O‘zbekiston Respublikasi Bosh vaziri tomonidan imzolanadi va O‘zbekiston Respublikasi Prezidenti farmoni loyihasi va zarur tahliliy materiallar ilova qilingan holda belgilangan tartibda O‘zbekiston Respublikasi Prezidenti Devoniga kiritiladi”.