LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Donli ekinlar payhon bo‘lishiga yo‘l qo‘ymaslik va ularni saqlashni ta’minlash, qishloq xo‘jalik mahsulotlari nazoratsiz nest-nobud bo‘lishi hollarining oldini olish maqsadida:
1. Qoraqalpog‘iston Respublikasining Vazirlar Kengashi viloyatlar, tumanlarning hokimlari, fuqarolarning o‘zini o‘zi boshqarish organlari, mulkchilik shakllaridan qat’i nazar, xo‘jaliklarning rahbarlari qishloq xo‘jaligi ekinzorlarida chorva va parrandalar boqish, shunday ekinzorlar orqali avtotransport yoki qishloq xo‘jalik texnikasini, hayvonlarni olib o‘tish kabi hamda ekinlarning payhon bo‘lishiga olib keladigan boshqa buzg‘unchilik hollariga qarshi kurashni kuchaytirsinlar.
2. Ekinzorlarning egalari yoki mulkdorlari bo‘lmish xo‘jaliklarning rahbarlariga ichki ishlar organlari va fuqarolarning o‘zini o‘zi boshqarish organlari vakillari bilan birgalikda ekinzorlarni payhon qilish hollarini aniqlash va bunday buzg‘unchiliklarga yo‘l qo‘ymaslik borasida muntazam reydlarni o‘tkazib turish vazifasi topshirilsin. Eng ko‘p payhon qilib turiladigan joylarda kuzatish postlari o‘rnatilsin.
Ekinzorlarni payhon qilish faktlari aniqlangan hollarda chorva, parranda, avtotransport, qishloq xo‘jalik texnikasi yoki boshqa payhon qilish vositalarining egalarini yoxud mulkdorlarini aniqlash uchun tezkor choralar ko‘rilsin, aybdorlarni qonunda belgilangan moddiy, ma’muriy yoki jinoiy javobgarlikka tortish uchun hujjatlar tegishli organlarga topshirilsin.
3. Belgilab qo‘yilsinki, mulkchilik shakllaridan qat’i nazar, korxonalarga, tashkilotlarga yoki fuqarolarga qarashli bo‘lgan payhon qilish vositalari bundan buyon to egalari yoki mulkdorlari payhon yetkazgan ziyonning o‘rnini to‘la qoplamagunlariga qadar ushlab turiladi.
4. O‘zbekiston Respublikasining Ichki ishlar vazirligi ekinlar payhon bo‘lishining oldini olishga doir kechiktirib bo‘lmaydigan choralarni ko‘rsin, profilaktika ishlarini olib borish uchun tegishli postlar o‘rnatsin va amaldagi qonunlarga qat’iy muvofiq ravishda buzg‘unchilarga nisbatan qattiq choralarni qo‘llasin, har bir payhon qilish fakti bo‘yicha aybdorlarni javobgarlikka tortmasdan qolmasin.
5. Prokuratura va IIV organlari, sudlar ekinlarning payhon qilinishi to‘g‘risida hujjatlar olinganida ularni tezkorlik bilan ko‘rib chiqsinlar, aybdorlarga nisbatan qat’iy jazo choralarini, hatto ozodlikdan mahrum qilish chorasini qo‘llasinlar.
(5-band O‘zbekiston Respublikasi Prezidentining 2013-yil 2-oktabrdagi PF-4569-sonli Farmoni tahririda — O‘R QHT, 2013-y., 40-son, 525-modda)
6. O‘zbekiston Respublikasining Prokuraturasi ekinlarning saqlanishini ta’minlashga qaratilgan qonunlarning ijrosi ustidan nazoratni kuchaytirsin.
7. Ushbu Farmonning bajarilishini nazorat qilish O‘zbekiston Respublikasining Bosh prokurori B. Mustafoyev, Qoraqalpog‘iston Respublikasi Vazirlar Kengashining raisi, viloyatlar va tumanlarning hokimlari, huquqni muhofaza qilish organlari, xo‘jaliklar hamda fuqarolarning o‘zini o‘zi boshqarish organlari rahbarlarining zimmasiga yuklansin.