LexUZ sharhi
Mazkur qaror O‘zbekiston Respublikasi Vazirlar Mahkamasining 2009-yil 15-iyuldagi 200-sonli “Davlat daromadiga o‘tkaziladigan mol-mulkni olib qo‘yish, sotish yoki yo‘q qilib tashlash tartibini takomillashtirish to‘g‘risida”gi qaroriga asosan o‘z kuchini yo‘qotgan.
Qonun hujjatlarida belgilangan tartibda olib qo‘yilgan va davlat daromadiga o‘tkaziladigan mol-mulkni sotish bo‘yicha savdo tashkilotlarini tanlab olish samaradorligini oshirish maqsadida Vazirlar Mahkamasi qaror qiladi:
1. Vazirlar Mahkamasining 2004-yil 25-martdagi 140-son qarori bilan tasdiqlangan Davlat daromadiga o‘tkaziladigan mol-mulkni olib qo‘yish, sotish yoki yo‘q qilib tashlash tartibi to‘g‘risidagi nizomga (O‘zbekiston Respublikasi QT, 2004-y., 3-son, 35-modda) ilovaga muvofiq o‘zgartirish va qo‘shimchalar kiritilsin.
2. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.
“Mol-mulkni sotish tanlov asosida Qoraqalpog‘iston Respublikasi Vazirlar Kengashi, viloyatlar va Toshkent shahar hokimlari qaroriga muvofiq belgilanadigan savdo tashkilotlari tomonidan amalga oshiriladi.
Savdo tashkilotlarini belgilashda ularning ixtisoslashuvi, joylashgan joyi va iste’molchi uchun borish oson bo‘lishi (viloyat va tuman (shahar) markazlari, bozorlar va boshqalar), tegishli omborxona binolarining mavjudligi, avvalgi faoliyatida belgilangan savdo faoliyati qoidalarini buzish holatlariga yo‘l qo‘yilmaganligi va boshqalar hisobga olinadi.
Mol-mulkni sotish bo‘yicha xizmatlar ko‘rsatish yuzasidan shartnomalar ushbu savdo tashkilotlari bilan Sud qarorlarini ijro etish, sudlar faoliyatini moddiy-texnika jihatidan va moliyaviy ta’minlash departamentining hududiy boshqarmalari tomonidan tuziladi.
Mol-mulkni sotish xizmatlari ko‘rsatish yuzasidan shartnomaning amal qilish muddatini uzaytirishda mazkur shartnoma shartlariga rioya etish va mol-mulkni sotish tartibi buzilishiga yo‘l qo‘yilmaganligi ham hisobga olinadi”.
“Zaxiralarni shakllantirish uchun zarur bo‘lgan oziq-ovqat tovarlari pulli asosda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga beriladi hamda savdo tashkilotlarining ixtisoslashtirilgan omborxonalarida saqlanadi (g‘amlab qo‘yiladi). Ushbu tovarlar faqat Qoraqalpog‘iston Respublikasi Vazirlar Kengashi, viloyatlar va Toshkent shahar hokimlari qaroriga ko‘ra, tovarlarning saqlanish muddatlaridan va bozordagi ehtiyojdan kelib chiqqan holda sotiladi”.