LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Iqtisodiy islohotlarni yanada chuqurlashtirish va qishloq xo‘jalik mashinasozligida boshqaruvni takomillashtirish, jahon standartlariga javob beradigan qishloq xo‘jalik texnikasini ishlab chiqarishga xorijiy investitsiyalarni keng jalb etish, tarmoq korxonalari ishi samaradorligini oshirish maqsadida:
1. “O‘zqishloqxo‘jalikmash-xolding” xolding kompaniyasi va uning tarkibiga kiruvchi korxonalar aksiyadorlarining, O‘zbekiston Respublikasi Iqtisodiyot vazirligi, Moliya vazirligi, Qishloq va suv xo‘jaligi vazirligi, Davlat mulki qo‘mitasi, Monopoliyadan chiqarish, raqobat va tadbirkorlikni qo‘llab-quvvatlash davlat qo‘mitasining “O‘zqishloqxo‘jalikmash-xolding” xolding kompaniyasini tugatish to‘g‘risidagi taklifi qabul qilinsin.
2. “O‘zqishloqxo‘jalikmash-xolding” xolding kompaniyasini tugatish va uning korxonalarini qaytadan tashkil etish bo‘yicha ilovaga* muvofiq tarkibda Hukumat komissiyasi tashkil etilsin.
* Ilova rus tilidagi matnda berilgan.
“O‘zqishloqxo‘jalikmash-xolding” xolding kompaniyasini tugatish bo‘yicha chora-tadbirlar qonun hujjatlarida belgilangan muddatlarda amalga oshirilishini ta’minlasin;
O‘zbekiston Respublikasi Mehnat va aholini ijtimoiy muhofaza qilish vazirligi bilan birgalikda “O‘zqishloqxo‘jalikmash-xolding” xolding kompaniyasining bo‘shaydigan mutaxassislarini, birinchi navbatda, qishloq xo‘jalik mashinasozligi korxonalariga ishga joylashtirish chora-tadbirlari amalga oshirilishini ta’minlasin;
bir oy muddatda, chuqur tahlil asosida, qishloq xo‘jaligi texnikasi ishlab chiqarilishini oqilona jamlashni, shuningdek, qayta tashkil etiladigan korxonalarning ko‘chmas mulkini bo‘shaydigan maydonlarda ishlab chiqarishlarni joylashtirish sharti bilan zamonaviy uskunalardan foydalanish bo‘yicha investitsiya majburiyatlarini qabul qilgan xorijiy investorlarga sotishni nazarda tutgan holda, tarmoq korxonalarini qayta tashkil etish bo‘yicha takliflarni Vazirlar Mahkamasiga kiritsin.
4. O‘zbekiston Respublikasi Davlat mulki qo‘mitasi Moliya vazirligi, Adliya vazirligi bilan birgalikda tugatilayotgan “O‘zqishloqxo‘jalikmash-xolding” xolding kompaniyasining ustav kapitalidagi xorijiy qatnashchi ulushining miqdori va kompensatsiya shaklini belgilangan tartibda u bilan hal qilib olsin.
5. O‘zbekiston Respublikasi Adliya vazirligi tegishli vazirliklar va idoralar bilan birgalikda ikki oy muddatda O‘zbekiston Respublikasining qonun hujjatlariga mazkur qarordan kelib chiqadigan o‘zgartish va qo‘shimchalar to‘g‘risida takliflar kiritsin.
6. Ushbu qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.