LexUZ sharhi
Mazkur qaror O‘zbekiston Respublikasi Vazirlar Mahkamasining 2019-yil 23-fevraldagi 161-sonli “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Idoralararo kollegial organlarni tubdan qisqartirish va yanada optimallashtirish chora-tadbirlari to‘g‘risida” 2018-yil 28-avgustdagi PF-5527-son Farmoni)”gi qaroriga asosan o‘z kuchini yo‘qotgan.
O‘zbekiston Respublikasi Prezidentining “Respublika aholisini axborot-kutubxona bilan ta’minlashni tashkil etish to‘g‘risida” 2006-yil 20-iyundagi PQ-381-son qaroriga muvofiq Vazirlar Mahkamasi qaror qiladi:
1. Respublika axborot-kutubxona tizimi faoliyatini muvofiqlashtirish bo‘yicha Idoralararo kengash to‘g‘risidagi nizom ilovaga muvofiq tasdiqlansin.
2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Qosimov zimmasiga yuklansin.
1. Respublika axborot-kutubxona tizimi faoliyatini muvofiqlashtirish bo‘yicha Idoralararo kengash (keyingi o‘rinlarda Idoralararo kengash deb ataladi) O‘zbekiston Respublikasi axborot-resurs markazlari, axborot-kutubxona markazlari va kutubxonalari faoliyatini uning yo‘nalishlariga muvofiq muvofiqlashtirishni amalga oshiruvchi kollegial idoralararo organ hisoblanadi.
2. Idoralararo kengash o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, shuningdek ushbu Nizomga amal qiladi.
3. Idoralararo kengash Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, kutubxona shoxobchalariga ega bo‘lgan vazirliklar va idoralar bilan o‘zaro hamkorlik qiladi.
O‘zbekiston Respublikasining milliy axborot-kutubxona tizimi va milliy axborot-kutubxona fondi faoliyat ko‘rsatishi va rivojlantirilishi sohasidagi strategik ustuvor vazifalarni amalga oshirish;
tarmoqlararo tashkiliy-metodik rahbarlikni amalga oshirish, axborot-resurs markazlarini, axborot-kutubxona markazlarini va kutubxonalarni ular faoliyatining barcha yo‘nalishlari bo‘yicha rivojlantirish ishlarini muvofiqlashtirish;
axborot-resurs markazlari, axborot-kutubxona markazlari va kutubxonalarning, kutubxona-axborot xizmati ko‘rsatish tizimining maqbul faoliyat ko‘rsatishi bo‘yicha, mamlakatimiz va xorijdagi ilmiy-axborot faoliyati rivojlanishini hisobga olgan holda tavsiyanomalar ishlab chiqish.
O‘zbekiston Respublikasining yagona axborot-kutubxona tizimi sifatida axborot-resurs markazlarini, axborot-kutubxona markazlarini va kutubxonalarni rivojlantirishning asosiy yo‘nalishlarini belgilaydi;
axborot-resurs markazlarini, axborot-kutubxona markazlarini va kutubxonalarni komplektlashning asosiy yo‘nalishlari, mamlakatimizdagi adabiyotlar (shu jumladan hujjatlarning majburiy nusxalari), qog‘oz va elektron manbalardagi xorijiy nashrlar (shu jumladan xalqaro kitoblar almashish), ma’lumotlar bazalari va banklari bilan eng to‘liq ta’minlash bo‘yicha tavsiyanomalar ishlab chiqadi va ishlarni muvofiqlashtiradi;
axborot-resurs markazlari, axborot-kutubxona markazlari va kutubxonalar fondlarining fizik holatini nashrlarning, ayniqsa noyob fondlar va madaniy meros yodgorliklarining saqlanishini ta’minlash bo‘yicha chora-tadbirlar hamda tavsiyanomalar ishlab chiqish yo‘li bilan nazorat qilishni tashkil etadi;
respublika axborot-resurs markazlari, axborot-kutubxona markazlari va kutubxonalar uchun mamlakatimizdagi va xorijiy nashrlarga obuna bo‘lishga budjet, shu jumladan valyuta mablag‘larini taqsimlash, shuningdek kutubxona ishlarini yuritishning ilg‘or texnologiyalari negizida kutubxona kadrlarini tayyorlash va qayta tayyorlash bo‘yicha takliflarni ko‘rib chiqadi hamda O‘zbekiston Respublikasi Vazirlar Mahkamasiga kiritadi;
respublika axborot-resurs markazlari, axborot-kutubxona markazlari va kutubxonalari faoliyatini tartibga soluvchi normativ hujjatlarning ishlab chiqilishini ta’minlaydi;
axborot-resurs markazlarida va axborot-kutubxona markazlarida yangi axborot texnologiyalarini joriy etish ishlarini muvofiqlashtiradi;
respublikada axborot-kutubxona ishlarini istiqbolli rivojlantirishning kompleks dasturlarini va asosiy yo‘nalishlarini ishlab chiqish va amalga oshirish ishlarini muvofiqlashtiradi;
axborot-resurs markazlari, axborot-kutubxona markazlari va kutubxonalarning nashriyotlar, kitob savdosi tashkilotlari hamda ommaviy axborot vositalari bilan o‘zaro hamkorligini yaxshilash chora-tadbirlarini ishlab chiqadi;
axborot-resurs markazlari, axborot-kutubxona markazlari va kutubxonalar fondlarini shakllantirish va ulardan foydalanish, adabiyotlarni nashr etish va qayta nashr etish hamda ularning tirajlarini belgilash bo‘yicha takliflar tayyorlaydi;
respublika axborot-resurs markazlari, axborot-kutubxona markazlari va kutubxonalarida mehnat sharoitlarini yaxshilashga va ularni kadrlar bilan mustahkamlashga yo‘naltirilgan takliflar tayyorlaydi;
respublikaning axborot-kutubxona shoxobchalarini rivojlantirish, shu jumladan elektron kataloglar tashkil etish tizimini rivojlantirish, elektron ilmiy-ta’lim resurslaridan foydalanishning korporativ tizimlarini, noyob fondlarni raqamlashtirish markazlarini va shu kabilarni tashkil etish bo‘yicha ilmiy-texnik loyihalarni ishlab chiqish va amalga oshirishda tashabbus ko‘rsatadi;
ish tajribalarini o‘rganish, xalqaro kutubxonalararo abonementni rivojlantirish, axborotlarni o‘zaro ayirboshlash, xalqaro kutubxona anjumanlarida va tashkilotlarida qatnashish uchun chet el kutubxonalari, nashriyotlari, axborot markazlari bilan xalqaro hamkorlikni rivojlantirish bo‘yicha tavsiyanomalar ishlab chiqadi;
xalqaro va respublika kutubxona konferensiyalari va seminarlarini tashkil etishda va o‘tkazishda tashabbus ko‘rsatadi.
6. Idoralararo kengash o‘ziga yuklangan vazifalar va funksiyalarni bajarish uchun quyidagi huquqlarga ega:
respublika axborot-resurs markazlari, axborot-kutubxona markazlari va kutubxonalari faoliyatining muvofiqlashtirilishini yaxshilashga yo‘naltirilgan qarorlar qabul qilish;
vazirliklar va idoralardan, mahalliy davlat hokimiyati organlaridan Idoralararo kengash vakolatiga taalluqli axborot va ma’lumotnoma materiallarini belgilangan tartibda so‘rash va olish;
axborot-resurs markazlari, axborot-kutubxona markazlari va kutubxona muassasalari vakillarining axborot-kutubxona ishlari sohasidagi ishlarni ta’minlash va takomillashtirishning ahvoli va chora-tadbirlari to‘g‘risidagi hisobotlari va ma’ruzalarini eshitish;
axborot-resurs markazlari, axborot-kutubxona markazlari va kutubxonalar faoliyatining eng muhim masalalari bo‘yicha takliflarni o‘rganish va takliflar tayyorlash uchun ishchi komissiyalar va ekspert guruhlar tashkil etish, shuningdek mutaxassislar va ilmiy xodimlarni ushbu komissiyalar va guruhlarda ishlashga jalb etish;
respublika axborot-kutubxona shoxobchalarini rivojlantirishga doir ilmiy-texnik loyihalarni qo‘llab-quvvatlash yoki rad etish bo‘yicha ekspert xulosalari va tavsiyalar berish.
Idoralararo kengash o‘ziga yuklangan vazifalarning samarali bajarilishi uchun javob beradi va har yili Vazirlar Mahkamasiga hisobot beradi.
7. Idoralararo kengashning shaxsiy tarkibi O‘zbekiston Respublikasi Prezidenti tomonidan tasdiqlanadi.
8. Idoralararo kengash o‘z majlislarini zaruriyatga ko‘ra, lekin har yili kamida ikki marta o‘tkazadi.
9. O‘ziga yuklangan asosiy vazifalarga muvofiq Idoralararo kengash har yili o‘z ishlari rejasini tasdiqlaydi, shuningdek rais o‘rinbosarlari, mas’ul kotib va kengashning boshqa a’zolari vazifalarini belgilaydi.
10. Alisher Navoiy nomidagi O‘zbekiston milliy kutubxonasi Idoralararo kengashning ishchi organi hisoblanadi.
11. Idoralararo kengash o‘z blankasiga ega bo‘ladi. Idoralararo kengash faoliyati bilan bog‘liq yozishmalarni yuritishda xatlar, Idoralararo kengash raisi (uning o‘rinbosari) yoki mas’ul kotibi tomonidan imzolanadi.
12. Idoralararo kengash majlisini o‘tkazish joyi, sanasi va tartibi rais yoki uning o‘rinbosarlari tomonidan belgilanadi, qarorlar esa majlisda qatnashganlarning ko‘pchilik ovozi bilan qabul qilinadi. Idoralararo kengash majlisda tarkibidagilarning kamida yarmi qatnashgan taqdirda masalalarni hal etish vakolatiga ega bo‘ladi.
13. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan Idoralararo kengash bilan kelishgan holda Idoralararo kengashga bo‘ysunadigan ana shunday hududiy kengashlar tashkil etilishi mumkin.
14. Idoralararo kengash qarorlari protokol bilan rasmiylashtiriladi, uni rais yoki uning o‘rinbosarlaridan biri, shuningdek mas’ul kotib imzolaydi.
15. Idoralararo kengash qarorlari barcha manfaatdor shaxslarga yetkaziladi hamda kutubxona shoxobchalariga ega bo‘lgan vazirliklar, idoralar va tashkilotlar tomonidan bajarilishi majburiy hisoblanadi.